Tuesday, December 23, 2008

ശനിയുടെ ക്രിസ്തുമസ്സ് സമ്മാനം ഒരു വലയ നൃത്തം

ഈ ക്രിസ്തുമസ്സ് ആഘോഷിക്കാന്‍ ശനിയും നിങ്ങള്‍ക്കൊപ്പം കൂടുന്നു. ശനിയുടെ വലയത്തിനുള്ള ചെറിയ മാറ്റങ്ങള്‍ ഏറ്റവും നന്നായി ദൃശ്യമാകുന്നത് ആ ദിനങ്ങളോടടുപ്പിച്ചായിരിക്കും.
ഭൂമിയില്‍ നിന്ന് നിരീക്ഷിക്കുമ്പോള്‍ ശനിയുടെ വലയങ്ങള്‍ എല്ലായ്പ്പോഴും ഒരേ പോലെയല്ല കാണപ്പെടുക. ശനിയുടെ പരിക്രമണ പഥവും ഭൂമിയുടെ പരിക്രമണ പഥവും തമ്മിലുള്ള ചരിവ് ശനിയുടെ വലയം നിരീക്ഷിക്കുന്നതിലും പ്രകടമാകും എന്നു മാത്രം.
ശനിയുടെ പരിക്രമണത്തിന് ഏതാണ്ട് മുപ്പത് വര്‍ഷം വേണം . ഇക്കാരണം കൊണ്ടു തന്നെ മന്ദന്‍ എന്നാണ് ജ്യോതിഷികള്‍ പോലും കക്ഷിയെ വിളിക്കുന്നത്. ഭൂമിക്കാകട്ടെ ഒരു വര്‍ഷം മതി., പിന്നെ സൂര്യന്റെ സ്ഥാനം. ഇതെല്ലാം പരിഗണിക്കുമ്പോള്‍ ഈ കാഴ്ച അപൂര്‍വ്വമാണ് എന്നു വേണമെങ്കില്‍ പറയാം.

ഭൂമിയില്‍ നിന്ന് നോക്കുമ്പോള്‍ ശനിയുടെ വലയത്തിനുണ്ടാകുന്ന മാറ്റം ചിത്രം നോക്കിയാല്‍ വ്യക്തമാകും. എല്ലാ പതിനഞ്ചു വര്‍ഷം കൂടുമ്പോളും ഇത് സംഭവിക്കുന്നുണ്ട്. ഭൂമിയുടെ പഥവും ശനിയുടെ വലയത്തിന്റെ തലവും ഒരേ കോണിലാകുന്നത് അടുത്ത വര്‍ഷം സെപ്തംബര്‍ നാലിനാണ്. എന്നാല്‍ അന്ന് ശനിയെ കാണുക അസാധ്യം. കാരണം ശനി അപ്പോള്‍ സൂര്യന്റെ അപഹാരത്തിലായിരിക്കും. ഇപ്പോള്‍ ഏതാണ്ട് 0.8 ഡിഗ്രിയാണ് ഈ ചരിവ്.

നല്ലൊരു ടെലിസ്കോപ്പ് ഉള്ളവര്‍ക്ക് ഈ കാഴ്ച ക്രിസ്തുമസ്സ് രാവില്‍ തന്നെ കാണാം. അതിരാവിലെ ചിങ്ങം നക്ഷത്രഗണത്തിലേക്കു നോക്കുക. അവിടെ ഉത്രം നക്ഷത്രത്തിനടുത്തായി നമുക്ക് ശനിയെ കണ്ടെത്താം. അപ്പോള്‍ മറക്കണ്ട

Friday, December 12, 2008

ഇന്ന് ഈ വര്‍ഷത്തെ ഏറ്റവും വലിയ ചന്ദ്രന്‍

ഇന്ന് ഡിസംബര്‍ 12 ഈ വര്‍ഷത്തെ ഏറ്റവും വലിയ ചന്ദ്രനെക്കാണാന്‍ ആകാശത്തേക്കു നോക്കിയാല്‍ മതി. ചന്ദ്രന്‍ ഭൂമിയുമായി ഏറ്റവും അടുത്തുവരുന്ന ഒരു പൂര്‍ണ്ണചന്ദ്രദിവസമാണിന്ന്. നാസയാണ് ഈ വിവരം ജനങ്ങളെ അറിയിച്ചുകൊണ്ടിരിക്കുന്നത്.

(ഇത് 2004 ല്‍ ഇതേ പോലെ സംഭവിച്ചപ്പോള്‍ ഉണ്ടായ വ്യതിയാനം - കടപ്പാട് : നാസ)

എന്നാല്‍ വളരെ ചെറിയ ഒരു വ്യത്യാസം മാത്രമേ അനുഭവപ്പെടുകയുള്ളൂ. ഉദിച്ചു വരുന്ന സമയത്ത് ചക്രവാളത്തിലേക്ക് നോക്കിയാല്‍ വലിപ്പം കൂടുതല്‍ അനുഭവപ്പെടും. ഇത് ഒരു തോന്നലാണെങ്കിലും അതിന്റെ കൂടെ ചന്ദ്രന്‍ ഭൂമിയുടെ അടുത്ത് വരുന്നു എന്നുള്ളത് കാഴിചക്ക് ചെറിയ ഒരു വ്യതിയാനം സൃഷ്ടിക്കും.

(പെരിജി, അപോജി എന്നിവ വിശദമാക്കുന്ന ചിത്രം... നാസയുടെ ചിത്രം മലയാളത്തില്‍ ആക്കിയത്)

എല്ലാ മാസവും ഇതു പോലെ അടുത്ത് വരുന്നുണ്ടെങ്കിലും അപ്പോഴൊന്നും പൂര്‍ണ്ണചന്ദ്രന്‍ ആയിരുന്നില്ല എന്നു മാത്രം. നാസ തന്ന ചിത്രങ്ങള്‍ കാര്യങ്ങള്‍ കൂടുതല്‍ വ്യക്തമാക്കും. അപോജി, പെരിജി എന്നീ സ്ഥാനങ്ങളില്‍ പെരിജിയിലാണ് ഇന്ന് ചന്ദ്രന്‍ എത്തിച്ചേരുക. ഏതാണ്ട് ഇരുപത്തെട്ടു ദിവസത്തില്‍ ഒരിക്കലാണ് ഇതേ സ്ഥാനത്തു കൂടി ചന്ദ്രന്‍ കടന്നു പോകുന്നത്. അപ്പോള്‍ കാണാന്‍ മറക്കേണ്ട....മ്മ്ണി ബല്യ പൂര്‍ണ്ണചന്ദ്രനെ....

Friday, December 5, 2008

പിഞ്ചോമനകള്‍ക്ക് യാത്രാമൊഴി ഇരിക്കൂര്‍ ഗ്രാമത്തിനൊപ്പം നമുക്കും പങ്കുചേരാം

ഇന്നലെയായിരുന്നു കേരളത്തെ ദുഃഖത്തിലാഴ്ത്തിയ ദുരന്തം സംഭവിച്ചത്. വഴിയരികിലൂടെ സ്കൂള്‍ വിട്ട് വീട്ടിലേക്ക് പോവുകയായിരുന്ന ഒന്‍പത് പിഞ്ചോമനകളാണ് മറ്റൊരു ദുരന്തത്തിന്റെ ഓര്‍മ്മകള്‍ സമൂഹത്തിനായി ബാക്കിവച്ച് നമ്മെ വിട്ടു പോയത്. മൂന്ന് കുട്ടികള്‍ ഇപ്പോഴും ഗുരുതരാവസ്ഥയില്‍ ആശുപത്രിയില്‍ കഴിയുന്നു.

ട്രാഫിക്ക് നിയമങ്ങള്‍ മുതിര്‍ന്നവര്‍ അനുസരിക്കാറില്ലെങ്കിലും കുട്ടികള്‍ അത് തെറ്റിക്കാറില്ല. അദ്ധ്യാപകരുടെ നിര്‍ദ്ദേശങ്ങള്‍ അതേ പടി അനുസരിച്ച് നടന്നുപോയിട്ടും ദുരന്തങ്ങള്‍ നമ്മെ വേട്ടയാടുന്നു. എല്ലാവരും ഒരേ പോലെ അനുസരിക്കുന്ന പരിതസ്ഥിതിയിലേ നിയമങ്ങള്‍ക്ക് സാധുതയുള്ളൂ. പ്രത്യേകിച്ചും ഗതാഗത നിയമങ്ങള്‍. ഈ ദുരന്തത്തിന് നാമോരുരുത്തരും ഉത്തരവാദികളാണ്. നിയമങ്ങള്‍ക്കു നേരെ നാം കാണിക്കുന്ന വിമുഖത ഇനിയും ഇത്തരം വാര്‍ത്തകള്‍ നമ്മെ തേടി വരാന്‍ ഇടയാക്കും.

ഇന്ന വെകിട്ട് ആ പിഞ്ചോമനകള്‍ക്ക് കേരളം യാത്രാമൊഴി നല്‍കുന്നു. മനുഷ്യത്വം വറ്റിയിട്ടില്ലാത്ത മനുഷ്യരേയും നാം കാണുന്നു. മൂന്ന് കുട്ടികളുടെ വീട്ടില്‍ ശവസംസ്കാരത്തിനുള്ള സ്ഥലം പോലും ഇല്ലാതെ വന്നപ്പോള്‍ സ്വന്തം സ്ഥലം വിട്ടുനല്‍കിയ മനസ്സ് മാനുഷികത വറ്റിയിട്ടില്ലാത്തവരുടെ പ്രതീകമാണ്. എട്ടു കുട്ടികളുടേയും സംസ്കാരം ഇവിടെ തന്നെയാണ് നടക്കുന്നത്. എല്ലാവര്‍ക്കും ഒരുമിച്ച് യാത്ര നല്‍കാനുള്ള ഈ തീരുമാനവും മാനുഷികതയുടെ മുഖമാണ് വെളിപ്പെടുത്തുന്നത് . സ്കൂളിലെ ആ കരുന്നുകളുടെ സൌഹൃദങ്ങള്‍ മരണത്തിലും അവസാനിക്കുന്നില്ല. സഹപാഠികള്‍ക്കും മാതാപിതാക്കള്‍ക്കും ഒപ്പം ഇരിക്കൂര്‍ നിവാസികളുടെ വേദനയില്‍ നമുക്കും പങ്കു ചേരാം.

Tuesday, December 2, 2008

ഫെഡോറ ഗ്നു/ലിനസ്ക് ഇന്‍സ്റ്റലേഷന്‍ ദൃശ്യങ്ങള്‍ ( ലൈവ് സിഡിയില്‍ നിന്നും )


ഫെഡോറ - 10 ലൈവ് സി.ഡി.യില്‍ നിന്നും ഇന്‍സ്റ്റാള്‍ ചെയ്യുന്നതിന്റെ ദൃശ്യങ്ങള്‍


ഫെഡോറ 10 ലിനക്സ് ലൈവ് സി.ഡി ആയി ഡൌണ്‍ലോഡ് ചെയ്യാന്‍ കഴിയും. സി.ഡി ഡ്രൈവില്‍ ഇട്ട ശേഷം കമ്പ്യൂട്ടര്‍ റീ ബൂട്ട് ചെയ്യുക. സി.ഡിയില്‍ നിന്നും ഫെഡോറ 10 പ്രവര്‍ത്തിച്ചു തുടങ്ങും. ഡെസ്ക്ടോപ്പില്‍ തന്നെ ഫെഡോറ സിസ്റ്റത്തില്‍ ഇന്‍സ്റ്റാള്‍ ചെയ്യാനുള്ള ഐക്കണ്‍ കാണും. അതില്‍ ഞെക്കുക. താഴെ കാണുന്ന തരത്തിലുള്ള സ്ക്രീനുകള്‍ നിങ്ങള്‍ക്ക് ഇനി കാണുവാന്‍ കഴിയും.


ആദ്യ സ്ക്രീന്‍ NEXT അമര്‍ത്തുക



കീ ബോര്‍ഡ് തിരഞ്ഞെടുക്കുക


ഹോസ്റ്റ് പേര് നല്‍കുക. (സംശയമുണ്ടെങ്കില്‍ വിട്ടുകളയുക )


സമയ മേഖല തിരഞ്ഞെടുക്കാം.( ഏഷ്യ-കൊല്‍ക്കത്ത )


റൂട്ട് ഉപയോക്താവിനുള്ള പാസ്സ് വേര്‍ഡ് നല്‍കുക


ചെറിയ പാസ്സ്വേഡുകള്‍ നല്‍കിയാല്‍ ഇത്തരത്തിലുളള ഒരു സന്ദേശം കാണും.



ഇവിടെ പുതിയ ലെയൌട്ട് എന്നത് തിരഞ്ഞെടുക്കുക (Create Custom Layout)



കമ്പ്യൂട്ടറിലെ നിലവിലുള്ള ഡ്രൈവുകള്‍ ഇവിടെ കാണാം. നേരത്തേ വിന്‍ഡോസ് ഉള്ള ഒരു കമ്പ്യൂട്ടറിലിലാണ് ഇത്തരത്തില്‍ ഒരു ലേയൌട്ട് കാണപ്പെടുക. ലിനക്സ് പാര്‍ട്ടീഷന്‍ ഇല്ലെങ്കില്‍ ഡാറ്റ മാറ്റിയ ഡ്രൈവുകള്‍ ഡിലീറ്റ് ചെയ്ത് പുതിയ ലിനക്സ് പാര്‍ട്ടീഷന്‍ നിര്‍മ്മിക്കാവുന്നതാണ്. ഡിലീറ്റ് ചെയ്യപ്പെട്ട സ്ഥലം ഫ്രീ-സ്പേസ് ആയി കാണാവുന്നതാണ്. ഫ്രീ-സ്പേസില്‍ മറ്റൊരു പാര്‍ട്ടീഷന്‍ കൂടി നിര്‍മ്മിക്കണം. അതിനായി ഫ്രീ-സ്പേസില്‍ ക്ലിക്ക് ചെയ്ത് New എന്ന ബട്ടണ്‍ അമര്‍ത്തുക


പഴയ കുറച്ച് പാര്‍ട്ടീഷനുകള്‍ ഡിലീറ്റ് ചെയ്ത് ഉണ്ടാക്കിയ ഫ്രീ-സ്പേസില്‍ പുതിയ ഒരു പാര്‍ട്ടീഷന്‍ നിര്‍മ്മിക്കുകയാണിവിടെ. സ്വാപ്പ് (swap) എന്ന ഒരു പാര്‍ട്ടീഷന്‍ നിര്‍ബന്ധമായും ഉണ്ടാക്കേണ്ടതുണ്ട്. ഫയല്‍ സിസ്റ്റം ടൈപ്പ് swap ആക്കിയാല്‍ മതി. കമ്പ്യൂട്ടറിലെ മെമ്മറിയുടെ (RAM) ഇരട്ടിയോളം സ്വാപ്പ് വേണ്ടിവരും. ഏറ്റവും കുറഞ്ഞത് തുല്യമെങ്കിലും ആയിരിക്കണം. ഉദാഹരണത്തിന് 512MB RAM ഉള്ള ഒരു കമ്പ്യൂട്ടറില്‍ 1GB (1024 MB) സ്ഥലം swap ആയി കൊടുത്താല്‍ മതി. ഒരു മിഥ്യാ മെമ്മറിയായി ഇത് പ്രവര്‍ത്തിക്കും.



നിര്‍മ്മിച്ചു കഴിഞ്ഞ swap പാര്‍ട്ടീഷന്‍ നിങ്ങള്‍ക്ക് കാണാം. ബാക്കിയുള്ള ഫ്രീ-സ്പേസില്‍ മറ്റൊരു പാര്‍ട്ടീഷന്‍ കൂടി നിര്‍മ്മിക്കണം. അതിനായി ഫ്രീ-സ്പേസില്‍ ക്ലിക്ക് ചെയ്ത് New എന്ന ബട്ടണ്‍ അമര്‍ത്തുക.


റൂട്ട് പാര്‍ട്ടീഷന്‍ ആണ് ഇനി സൃഷ്ടിക്കേണ്ടത്. മൌണ്‍ട് പോയിന്റ് എന്നിടത്ത് / എന്നു മാത്രം നല്‍കുക.
ലിനക്സില്‍ ഇനിയും ആവശ്യത്തിന് മറ്റ് പാര്‍ട്ടീഷനുകളും സൃഷ്ടിക്കാവുന്നതാണ്. /home, /var, /usr തുടങ്ങിയ പാര്‍ട്ടീഷനുകള്‍ നിര്‍മ്മിക്കുന്നത് നല്ലതാണ്. എന്നാല്‍ സ്ഥലപരിമിതി ഉള്ളിടത്ത് റൂട്ട് മാത്രം സൃഷ്ടിച്ചാലും മതിയാകും.
File System type എന്നത് ext3 എന്ന് കൊടുക്കണം. ലിനക്സിന്റെ ഫയല്‍-സിസ്റ്റം ആണിത്.


റൂട്ട് പാര്‍ട്ടീഷന്‍ കൂടി ഉള്ള ലേയൌട്ട്


ഇതോടെ പാര്‍ട്ടീഷനിങ്ങ് എന്ന പരിപാടി പൂര്‍ത്തിയായി. ഹാര്‍ഡ് ഡിസ്കിലേക്ക് പാര്‍ട്ടീഷന്‍ ലേയൌട്ട് എഴുതാന്‍ അനുവദിക്കുക. Write changes to disk എന്നത് ക്ലിക്ക് ചെയ്യണം. ഇതോടെ ഡിലീറ്റ് ചെയ്ത പാര്‍ട്ടീഷനുകളില്‍ എന്തെങ്കിലും ഡാറ്റ ഉണ്ടെങ്കില്‍ അത് പൂര്‍ണ്ണമായും മാഞ്ഞുപോവുകയും. ext3 എന്ന ഫയല്‍സിസ്റ്റത്തിലുള്ള പാര്‍ട്ടീഷനുകള്‍ ആയി മാറുകയും ചെയ്യും.




ഇവിടെ ആദ്യം ബൂട്ട് ചെയ്യേണ്ട് ഓപ്പറേറ്റിങ്ങ് സിസ്റ്റം തിരഞ്ഞെടുക്കാം. Other എന്ന പേരില്‍ കാണുന്നത് വിന്‍ഡോസ് ആണ്. വേണമെങ്കില്‍ അത് എഡിറ്റ് ചെയ്ത് വിന്‍ഡോസ് എന്ന് എഴുതാവുന്നതാണ്. വിന്‍ഡോസ് ഇല്ലാത്ത കമ്പ്യൂട്ടര്‍ ആണെങ്കില്‍ ഇത് കാണുകയില്ല. ഡീഫാള്‍ട്ട് ആയി ഏതു വേണമെങ്കിലും തിരഞ്ഞെടുക്കാം.



എഡിറ്റ് ചെയ്ത് വിന്‍ഡോസ് എന്ന് ചേര്‍ത്തതാണ് കാണിച്ചിരിക്കുന്നത്. ഇനി Next അമര്‍ത്തുന്നതോടെ ഇന്‍സ്റ്റലേഷന്‍ ആരംഭിക്കും.



ഇന്‍സ്റ്റലേഷന്‍ ആരംഭിച്ചിരിക്കുന്നു


ഇന്‍സ്റ്റലേഷന്‍ നടക്കുന്നു


ഇന്‍സ്റ്റലേഷന്‍ പൂര്‍ത്തിയാകാറായി



ഇന്‍സ്റ്റലേഷന്‍ പൂര്‍ത്തിയായിക്കഴിഞ്ഞു.
ഇനി സിസ്റ്റം റീബൂട്ട് ചെയ്യുക. സി.ഡി. ഡ്രൈവില്‍ നിന്നും സി.ഡി. പുറത്തെടുത്തിരിക്കണം.




ഫെഡോറയുടെ ഇന്‍സ്റ്റലേഷന് ശേഷമുള്ള ആദ്യ ബൂട്ടില്‍ ചില കാര്യങ്ങല്‍ കൂടി ചെയ്തു കൊടുക്കേണ്ടതുണ്ട്.
ഇവിടെ Forward നല്‍കുക


ഇവിടെ ലൈസന്‍സ് വിവരങ്ങളാണ് നല്‍കിയിരിക്കുന്നത്. GPL-2 ലൈസന്‍സ് ആണ് ഉപയോഗിച്ചിരിക്കുന്നത്. സോഫ്റ്റവെയറുകള്‍ പകര്‍ത്താനും മാറ്റം വരുത്തുവാനും വിതരണം ചെയ്യുവാനും പഠിക്കുവാനും ഉള്ള എല്ലാ അധികാരങ്ങളോടെയും കൂടെയാണ് സൌജന്യമായി ഫെഡോറ ലഭിക്കുന്നത്



പുതിയ ഒരു ഉപയോക്താവിനെ ഇവിടെ സൃഷ്ടിക്കണം. യൂസര്‍നെയിം, പാസ്സ് വേര്‍ഡ് , പൂര്‍ണ്ണരൂപം എന്നിവ നല്‍കുക.



പാസ്സ് വേര്‍ഡ് ചെറുതാണ് എന്ന് മുന്നറിയിപ്പാണിത്. വേണമെങ്കില്‍ അവഗണിക്കാം. അല്ലെങ്കില്‍ മുന്നോട്ടു പോകാം.


തീയ്യതിയും സമയവും ഇവിടെ നല്‍കുക.



കമ്പ്യൂട്ടറിന്റെ ഹാര്‍ഡ് വേര്‍ വിശദാംശങ്ങളാണിത്. ഇത് ഫെഡോറ കമ്യൂണിറ്റിക്ക് അയച്ചു കൊടുക്കുന്നത് അടുത്ത ഫെഡോറയെ കൂടുതല്‍ മികച്ചതാക്കാന്‍ സഹായിക്കും. അതിനാല്‍ Send Profile എന്നത് തിരഞ്ഞെടുക്കുന്നത് നല്ലതായിരിക്കും.
ഇത്രയും കഴിഞ്ഞാല്‍ ഫെഡോറ - ലൈവ് സി.ഡിയില്‍ നിന്നും ഉള്ള ഇന്‍സ്റ്റലേഷന്‍ പൂര്‍ത്തിയായി.


(വിന്‍ഡോസ് ഉള്ള ഒരു സിസ്റ്റത്തിലാണ് ഇത് ഇന്‍സ്റ്റാള്‍ ചെയ്തത്. മറ്റ് ഓപ്പറേറ്റിംഗ് സിസ്റ്റം പൂര്‍ണ്ണമായി ഒഴിവാക്കി ഗ്നു/ലിനക്സ് ഇന്‍സ്റ്റാള്‍ ചെയ്യുന്നതാണ് പഠിക്കാനും ഉപയോഗിക്കാനും നല്ലത്. ഫെഡോറ 10 Live-CD ആയതിനാല്‍ വളരെക്കുറച്ച് പ്രോഗ്രാമുകള്‍ മാത്രമേ ഇതില്‍ ഉള്‍പ്പെട്ടിട്ടുള്ളൂ. എന്നാല്‍ ഫെഡോറ 10 DVD ഉപയോഗിക്കുകയാണ് എങ്കില്‍ നിരവധി പ്രോഗ്രാമുകള്‍ ലഭ്യമാകും. ഇതില്‍ ഓപ്പണ്‍ ഓഫീസ് ഇല്ല എന്നത് ഒരു പോരായ്മയാണ്. എന്നാല്‍ ഓപ്പണ്‍ ഓഫീസ് ഡൌണ്‍ലോഡ് ചെയ്ത് ഇന്‍സ്റ്റാള്‍ ചെയ്യാവുന്നതാണ്. )


ഫെഡോറ 10 Live CD ഡൌണ്‍ലോഡ് ചെയ്യാനുള്ള ലിങ്ക് താഴെ
http://download.fedoraproject.org/pub/fedora/linux/releases/10/Live/i686/F10-i686-Live.iso

ടോറണ്ട് ലിങ്കുകള്‍
http://torrent.fedoraproject.org/torrents//Fedora-10-i686-Live.torrent
http://torrent.fedoraproject.org/torrents//Fedora-10-x86_64-Live.torrent

മറ്റ് പ്രധാന ലിങ്കുകള്‍ക്ക് ഇവിടെ പോയാല്‍ മതി..
http://torrent.fedoraproject.org/
http://fedoraproject.org/en/get-fedora
http://mirrors.fedoraproject.org/publiclist/Fedora/10/
http://spins.fedoraproject.org/

Wednesday, November 19, 2008

മുഖ്യധാരാ മാധ്യമങ്ങള്‍ ഉപരിപ്ളവ റിപ്പോര്‍ട്ടിംഗ് എന്നു മാറ്റും?

സമൂഹത്തിലെ വിവധ തുറകളില്‍ നടക്കുന്ന സംഭവങ്ങളെയും പരിപാടികളേയും ജനങ്ങളില്‍ എത്തിക്കുക എന്നതാണ് മാധ്യമങ്ങളുടെ കടമ. മുഖ്യധാരാ മാധ്യമങ്ങള്‍ ഏതെടുത്താലും അതങ്ങിനെ തന്നെയാണ് എന്നു തോന്നാം. എന്നാല്‍ നടക്കുന്നത് പലപ്പോഴും ഉപരിപ്ളവ റിപ്പോര്‍ട്ടിംഗ് മാത്രമാണ് എന്നതാണ് സത്യം. ജനങ്ങള്‍ ശ്രദ്ധിക്കുന്നത് മാത്രം സൃഷ്ടിക്കാന്‍ ശ്രമിക്കുന്നവര്‍, അല്ലെങ്കില്‍ ജനങ്ങളെ ശ്രദ്ധിപ്പിക്കാന്‍ വേണ്ടി വാര്‍ത്തകള്‍ സൃഷ്ടിക്കുന്നവര്‍, അല്ലെങ്കില്‍ ജനങ്ങളെ തെറ്റിദ്ധരിപ്പിക്കാന്‍ വേണ്ടി വാര്‍ത്തകള്‍ സൃഷ്ടിക്കുന്നവര്‍ ഇങ്ങിനെയൊക്കെയായി മുഖ്യധാരാ മാധ്യമങ്ങള്‍ മാറിപ്പോവുന്നു.

ഇക്കഴിഞ്ഞ നവംമ്പര്‍ 15,16 തീയ്യതികളില്‍ കൊച്ചിന്‍ യൂണിവേഴ്സിറ്റിയില്‍ വച്ച് സ്വതന്ത്രസോഫ്റ്റവെയര്‍ ദേശീയ സമ്മേളനം നടന്നു. മാധ്യമങ്ങളിലൂടെ സമ്മേളനം നടക്കുന്നതിനു മുന്‍പു തന്നെ വാര്‍ത്തകള്‍ വന്നിരുന്നു. ആരെല്ലാമാണ് അവിടെ നടക്കുന്ന പരിപാടികളില്‍ പങ്കെടുക്കുന്നത് എന്നതിനെക്കുറിച്ചായിരുന്നു ആ വാര്‍ത്തകള്‍. രണ്ടു ദിവസമായി നടന്ന ദേശീയ സമ്മേളനത്തിന്‍റെ ഉദ്ഘാടനം സമ്മേളനവും അന്നു തന്നെ വൈകിട്ടുള്ള സമ്മേളനവും പിറ്റേ ദിവസം വൈകിട്ട് നടന്ന സമാപന സമ്മേളനവും റിപ്പോര്‍ട്ട് ചെയ്യാന്‍ മാധ്യമങ്ങള്‍ കാര്യമായ മടി കാണിച്ചില്ല. രാഷ്ട്രീയ പ്രമുഖര്‍ പങ്കെടുത്ത സമ്മേളനത്തില്‍ ആരെല്ലാം എന്തെല്ലാം പറഞ്ഞു എന്നത് ആവശ്യാനുസരണം മാധ്യമങ്ങള്‍ റിപ്പോര്‍ട്ട ചെയ്യുകയുണ്ടായി. എന്നാല്‍ സമ്മേളനത്തില്‍ നടന്ന നിരവധി പരിപാടികള്‍, സമൂഹത്തിന് നല്‍കുവാനാകുമായിരുന്ന നിരവധി അറിവുകള്‍, സെമിനാറുകള്‍, വര്‍ക്ക്ഷോപ്പുകള്‍ ഇവയൊന്നും റിപ്പോര്‍ട്ട് ചെയ്യാന്‍ ആരെയും കണ്ടില്ല. അറിവിനേക്കാള്‍ മാധ്യമങ്ങള്‍ക്ക് പ്രിയം ജനപ്രിയ നേതാക്കളെ മാത്രം. രാഷ്ട്രീയക്കാരുടെ പ്രസംഗം വളച്ചും വളക്കാതെയും മാത്രം അവര്‍ ജനങ്ങള്‍ക്ക് എത്തിച്ചു കൊടുക്കുന്നു.

ഇത് വെറും ഒറ്റപ്പെട്ട സംഭവമല്ല. എത്രയോ സെമിനാറുകള്‍ മുഖ്യധാരാ മാധ്യമങ്ങള്‍ റിപ്പോര്‍ട്ട് ചെയ്തിരിക്കുന്നത് ഇതേ രീതിയിലാണ്. പല ശാസ്ത്ര സെമിനാറുകളും നടക്കുന്നു എന്ന വിവരം മാത്രം കൊട്ടിഘോഷിച്ച് മാധ്യമങ്ങളിലൂടെ നാം അറിയും.ഉദ്ഘാടന സമയത്തോ സമാപന സമ്മേളനത്തിലോ മന്ത്രിമാര്‍ പറഞ്ഞ കാര്യങ്ങള്‍ മുഖ്യ വാര്‍ത്തയായി വരികയും ചെയ്യും. അവിടെ നടന്ന സെമിനാറുകളിലും മറ്റും നടന്ന പ്രസക്തമായ കാര്യങ്ങള്‍ അവിടെ പങ്കെടുത്തവരില്‍ മാത്രമായി ഒതുങ്ങിപ്പോവുകയും ചെയ്തു. സത്യത്തില്‍ ഒരു ശാസ്ത്ര സാങ്കേതിക പരിപാടിയില്‍ ആരു പറയുന്ന കാര്യങ്ങള്‍ക്കാണ് പ്രാധാന്യം നല്‍കേണ്ടത്? ഉദ്ഘാടനത്തിന് വരുന്ന മന്ത്രിമാര്‍ക്കോ അതോ അവിടെ പരിപാടികള്‍ അവതരിപ്പിക്കുന്നവര്‍ക്കൊ? ശാസ്ത്രം അറിയുന്നതിന് ജനങ്ങള്‍ക്ക് താല്‍പര്യമില്ല എന്ന രീതിയിലാണ് എല്ലാ റിപ്പോര്‍ട്ടിംഗും. ശാസ്ത്രത്തെക്കുറിച്ചുള്ള തെറ്റിദ്ധാരണകള്‍ വര്‍ദ്ധിപ്പിക്കുന്നതിനേ ഇത്തരം റിപ്പോര്‍ട്ടിംഗുകള്‍ ഉതകൂ. വര്‍ദ്ധിച്ചു വരുന്ന അന്ധവിശ്വാസങ്ങള്‍ക്ക് ഇതും ഒരു കാരണമാകുന്നുണ്ട്. നമ്മുടെ മാധ്യമ രീതികള്‍ മാറിയേ തീരൂ. റിപ്പോര്‍ട്ടിംഗ് എന്തിന് വേണ്ടിയാണ് എന്നത് തീരുമാനിക്കേണ്ടിയിരിക്കുന്നു പക്ഷേ അത് ജനങ്ങളുടെ അറിവിന് പുഷ്ടിപ്പെടുത്തേണ്ടതായിരിക്കണം എന്നു മാത്രം.

Friday, November 14, 2008

അന്യഗ്രഹം ഒരു ഹബിള്‍ ചിത്രം

സൌരയൂഥത്തിനു പുറത്ത് ഗ്രഹങ്ങളെ തേടിയുള്ള യാത്ര മനുഷ്യന്‍ തുടങ്ങയിട്ട് നാളേറെയായി. സൌരയൂഥത്തിലെ എല്ലാ വസ്തുക്കളേയും കണ്ടെത്തുന്നതിനു മുന്‍പേ തന്നെ അതാരംഭിച്ചതാണ്. ഹബിള്‍ ടെലിസ്കോപ്പ് എന്ന ബഹിരാകാശത്തിലെ കണ്ണ് മനുഷ്യന് കാണിച്ചു തന്ന കാഴ്ചകള്‍ക്ക് കണക്കില്ല. ഇപ്പോഴിതാ മറ്റൊരു കാഴ്ചയുമായി ഹബിള്‍ വീണ്ടും. ദൃശ്യപ്രകാശത്തില്‍ ഒരു അന്യഗ്രഹത്തിന്‍റെ ചിത്രമെടുത്തു കൊണ്ടാണ് തന്‍റെ കണ്ണിന് ഇനിയും കാഴ്ചകള്‍ കാണാന്‍ ആയുസ്സ് അവശേഷിക്കുന്നു എന്ന് ഹബിള്‍ ഉറപ്പിച്ച് പറഞ്ഞത്.



(പുതിയ അന്യഗ്രഹം ചിത്രകാരിയുടെ ഭാവനയില്‍)

കുഭം രാശിക്കടുത്തുള്ള തെക്കന്‍ മത്സ്യം എന്ന നക്ഷത്രഗണത്തിലാണ് ഇരുപത്തഞ്ച് പ്രകാശവര്‍ഷം അകലെയുള്ള ഒരു നക്ഷത്രത്തെ ചുറ്റുന്ന ഗ്രഹത്തെ ദൃശ്യപ്രകാശത്തില്‍ കണ്ടത്.വ്യാഴത്തേക്കാള്‍ മൂന്നിരട്ടി
വ്യാസമുണ്ടെന്ന് കണക്കാക്കിയിരിക്കുന്ന ഈ ഗ്രഹത്തിന്‍റെ പേര് ഫോമല്‍ഹാട്ട് - ബി. എന്നാണ്. ഫോമല്‍ഹാട്ട് എന്ന നക്ഷത്രത്തിനു ചുറ്റുമാണ് ഈ ഗ്രഹത്തിന്‍റെ സഞ്ചാരം.
1980 ല്‍ ഫോമല്‍ഹാട്ട് എന്ന ഈ നക്ഷത്രത്തിനു ചുറ്റും ഗ്രഹങ്ങളെ കാണാനുള്ള ഒരു സാധ്യത നാസയുടെ ഇന്‍ഫ്രാ റെഡ് ആസ്ട്രോണമി ടെലസ്കോപ്പ് പ്രവചിച്ചിരുന്നു. 2004 ല്‍ ഹബിളിലെ ക്യാമറ ഫോമല്‍ഹാട്ടിനു ചുറ്റുമുള്ള അന്തരീക്ഷത്തിന്‍റെ ഒരു കൊറോണാഗ്രാഫ് ചിത്രം എടുത്തിരുന്നു. നക്ഷത്രങ്ങള്‍ക്ക് ചുറ്റുമുള്ള കാഴ്ചകള്‍ കാണുന്നതിന് നക്ഷത്രത്തി
ന്‍റെ തീവ്രത കൂടിയ പ്രകാശം ഒരു തടസ്സമാണ്. ഇതിനെ ഒഴിവാക്കിക്കൊണ്ട് ചിത്രമെടുക്കാന്‍ കഴിയുന്ന സങ്കേതമാണ് കൊറോണാഗ്രാഫ്. 21 ബില്യണ്‍ മൈല്‍ വിസ്തൃതിയില്‍ ഗ്രഹരൂപീകരണത്തിന്് അനുകൂലമായ ഒരു കാഴ്ചയാണ് കൊറോണാഗ്രാഫ് നമുക്ക് തന്നത്.
ഇപ്പോള്‍ നക്ഷത്രത്തില്‍ നിന്നും വളരെ അകലെ ഒരു പ്രകാശ ബിന്ദുവിനെ ഹബിള്‍ കണ്ടെത്തി.




(ഹബിള്‍ എടുത്ത ചിത്രം)

ഇരുപത്തൊന്നു മാസത്തെ ഇടവേളകള്‍ക്കിടയില്‍ എടുത്ത ചിത്രം സൂചിപ്പിക്കുന്നത് ഈ പ്രകാശബിന്ദു നക്ഷത്രത്തിനു ചുറ്റും ചലിക്കുന്നു എന്നതാണ്.നക്ഷത്രത്തില്‍ നിന്നും ഏതാണ്ട് പത്തു ബില്യണ്‍ മൈല്‍ അകലെയാണ് ഈ ഗ്രഹം. നക്ഷത്രത്തെ അപേക്ഷിച്ച് തിളക്കം വളരെയധികം കുറവാണെങ്കിലും ഗ്രഹത്തിന്‍റെ വലിപ്പത്തിന് ആനുപാതികമായല്ല തിളക്കം കാണുന്നത്. വ്യാഴത്തേക്കാള്‍ മൂന്നിരട്ടി വലിപ്പമുള്ള ഗ്രഹത്തിന് കാണപ്പെടേണ്ട തിളക്കത്തേക്കാള്‍ അധികമാണ് ഈ ഗ്രഹത്തിന്‍റെ തിളക്കം. ശനിയെപ്പോലെ ഐസും പൊടി പടലങ്ങളും ഉള്ള വളയങ്ങള്‍ ഉണ്ടാകാം എന്നാണ് ഇത് സൂചിപ്പിക്കുന്നത്. ഈ വലയങ്ങളില്‍ ഉപഗ്രഹങ്ങള്‍ രൂപപ്പെടാനുള്ള സാധ്യതയും തള്ളിക്കളയേണ്ടതില്ല എന്ന് ശാസ്ത്രജ്ഞര്‍ കരുതുന്നു. 2004 ലും 2006 ലും ഹബിള്‍ എടുത്ത ഫോമല്‍ഹാട്ട് നക്ഷത്രത്തിന്‍റെ ചിത്രങ്ങള്‍ പരിശോധിച്ചാണ് ഈ നിഗമനത്തില്‍ എത്തിയത്. 872 വര്‍ഷം വേണം ഈ ഗ്രഹത്തിന് തന്‍റെ മാതൃ നക്ഷത്രത്തെ ഒന്ന് വലം വയക്കാന്‍ എന്നാണ് ശാസ്ത്രജ്ഞര്‍ കണക്കു കൂട്ടിയിരിക്കുന്നത്. ഇക്കഴിഞ്ഞ നവംമ്പര്‍ 14 സയന്‍സ് മാഗസിനില്‍ ആണ് ഈ വിവരങ്ങള്‍ പുറത്തു വിട്ടിരിക്കുന്നത്. പരീക്ഷണങ്ങള്‍ തുടരുകയാണ്. നാസ 2013 ല്‍ വിക്ഷേപിക്കാന്‍ ഉദ്ദേശിക്കുന്ന ജയിംസ് വെബ് ടെലിസ്കോപ്പ് ഗ്രഹരൂപീകരണത്തെക്കുറിച്ചും മറ്റും കൂടുതല്‍ മികച്ച വിവരങ്ങള്‍ തരും എന്ന് പ്രതീക്ഷിക്കുന്നു.

വിവരങ്ങള്‍ക്ക കടപ്പാട് : NASA

Tuesday, November 11, 2008

ഫീനിക്സ് ഇനി പുനര്‍ജനിക്കുമോ? അവര്‍ കാത്തിരിക്കുന്നു..

അഞ്ചു മാസത്തെ പ്രവര്‍ത്തനത്തിന് ശേഷം നാസയുടെ ഫീനിക്സ് എന്ന പേടകം പ്രവര്‍ത്തനം അവസാനിപ്പിച്ചതായി നാസ അറിയിച്ചു. പ്രതികൂലമായ കാലാവസ്ഥയാണ് പ്രശ്നമായത്. മൂന്ന് മാസത്തെ പ്രവര്‍ത്തന കാലാവധി പ്രതീക്ഷിച്ച ഫീനിക്സ് പക്ഷേ അഞ്ചു മാസത്തോളം ചൊവ്വയിലെ മണ്ണിനെ രുചിച്ചും മണത്തും പരിശോധിച്ചു. കഴിഞ്ഞ നവംമ്പര്‍ 2 ന് ആണ് ഫീന്ക്സില്‍ നിന്നുമുള്ള അവസാന സിഗ്നലുകള്‍ നാസക്ക് ലഭിച്ചത്. ശക്തമായ പൊടിക്കാറ്റും തണുപ്പും പ്രതിരോധിക്കാന്‍ ഫീനിക്സിനെ സഹായിച്ചിരുന്നത് സോളാര്‍ പാനലുകളില്‍ നിന്നും ലഭിക്കുന്ന ഊര്‍ജ്ജമായിരുന്നു. എന്നാല്‍ സൂര്യന് അഭിമുഖമായി ഇനിയും നില്‍ക്കാന്‍ ഫീനിക്സിന് കഴിയില്ല. ചൊവ്വയുടെ കാലാവസ്ഥയാണ് അതിന് കാരണം. ഫീനിക്സ് ഇറങ്ങിയ ചൊവ്വയുടെ ഉത്തരധ്രുവ്വത്തില്‍ ഇനി സൂര്യനെ കാണണമെങ്കില്‍ മാസങ്ങള്‍ കഴിയും. സൂര്യപ്രകാശത്തിന്‍റെ അഭാവമാണ് ഫീനിക്സ് മരണമടയാന്‍ കാരണമായത്. സോളാര്‍ പാനലുകള്‍ പ്രവര്‍ത്തനം അവസാനിപ്പിച്ചതോടെ ബാറ്ററികള്‍ ചാര്‍ജ്ജ് ചെയ്യാന്‍ കഴിയാതെ ആവുകയായിരുന്നു. Aug. 4, 2007 ന് ഭൂമിയില്‍ നിന്നും യാത്ര തിരിച്ച ഫീനിക്സ് May 25, 2008 നാണ് ചൊവ്വയില്‍ സുരക്ഷിതമായി ഇറങ്ങിയത്.

ഏതാണ്ട് 25000 ചിത്രങ്ങളാണ് ഇതിനിടയില്‍ ഫീനിക്സ് നമുക്കായി അയച്ചു തന്നത്. ആറ്റോമിക ബലത്താല്‍ പ്രവര്‍ത്തിക്കുന്ന സൂഷ്മദര്‍ശിനിയുടെ (Atomic force microscope) സഹായത്താല്‍ എടുത്ത ദൃശ്യങ്ങളും ഇതില്‍ ഉള്‍പ്പെടും. 152 ദിവസത്തെ ജീവിതത്തിനിടയില്‍ 149 ദിവസവും ഫീനിക്സ് പ്രവര്‍ത്തന നിരതമായിരുന്നു.

ഔദ്യോഗികമായി ഫീനിക്സിന്‍റെ മരണം പ്രഖ്യാപിച്ചു കഴിഞ്ഞു. പക്ഷേ പ്രതീക്ഷയില്ലെങ്കിലും നാസയിലെ ശാസ്ത്രജ്ഞര്‍ ഇപ്പോഴും ചൊവ്വയിലേക്ക് ചെവിയോര്‍ത്തിരിക്കുകയാണ് ഫീനിക്സ് പുനര്‍ജനിക്കുമോ എന്നറിയാന്‍..

Friday, November 7, 2008

ഒരു വസന്തം കൂടി, സ്വാതന്ത്ര്യത്തിന്‍റെ പൂക്കാലം കയ്യിലേന്തി ലിനക്സ് വരുന്നു

വരുന്നു ഒരു ലിനക്സ് പൂക്കാലം.....

പ്രതീക്ഷിച്ച പോലെ തന്നെ അത് സംഭവിച്ചു തുടങ്ങി. ലോക സാമ്പത്തിക പ്രതിസന്ധി ഇതിന് ആക്കം കൂട്ടി എന്നും പറയാം. സോഫ്റ്റ്വെയര്‍ രംഗത്തെ അതികായരായിരുന്ന മൈക്രോസോഫ്റ്റ് അവസാനം റെയ്ഡ് തുടങ്ങി. ഇതിന്‍റെ ആദ്യപടി എന്ന നിലയില്‍ കൊച്ചിയില്‍ അവര്‍ ഓഫീസ് തുടങ്ങി. ഓഫീസ് തുടങ്ങിയതിനൊപ്പം തന്നെ കൊച്ചിയില്‍ നടത്തിയ റെയ്ഡിലൂടെ ഏഴു കോടി രൂപ അവര്‍ നേടുകയും ചെയ്തു. കേരളത്തില്‍ നിന്ന് മൂവായിരം കോടിയിലധികം രൂപ നേടാനാണ് മൈക്രോസോഫ്റ്റിന്‍റെ ശ്രമം. കേരളത്തില്‍ ഉപയോഗിക്കുന്ന മൈക്രോസോഫ്റ്റ് ഉല്‍പ്പന്നങ്ങളില്‍ 95% ല്‍ അധികവും വ്യാജമാണ് എന്നത് ഏതു കുട്ടിക്കും അറിയാവുന്ന കാര്യമാണ്. മൈക്രോസോഫ്റ്റ് അറിയാതെയൊന്നുമല്ല ഈ ഉപയോഗം. അവര്‍ എല്ലാം അറിയുന്നുണ്ടായിരുന്നു. പക്ഷേ തങ്ങളുടെ സോഫ്റ്റ്വെയറുകള്‍ കൂടാതെ ജീവിക്കാന്‍ വയ്യ എന്ന അവസ്ഥ ജനങ്ങളില്‍ ഉണ്ടാക്കിയെടുക്കുക എന്ന അവസ്ഥ സൃഷ്ടിക്കുക എന്നതായിരുന്നു അവരുടെ പ്രധാന ലക്ഷ്യം.

തീര്‍ച്ചയായും അത് ലക്ഷ്യം കാണുമായിരുന്നു. എന്നാല്‍ കേരളത്തില്‍ സമയോചിതമായ ഇടപെടലിലൂടെ സ്വതന്ത്രസോഫ്റ്റ്വെയര്‍ പ്രവര്‍ത്തകരും സര്‍ക്കാരുകളും ഇതിന് തടയിടുകയായിരുന്നു. കേരളത്തില്‍ കംപ്യൂട്ടര്‍ ഉപഭോക്താക്കളില്‍ ഒട്ടും ചെറുതല്ലാത്ത ഒരു വിഭാഗം സ്വതന്ത്രസോഫ്റ്റ്വെയറുകളിലേക്ക് മാറിക്കഴിഞ്ഞു. ഐ.ടി@സ്കൂള്‍ പദ്ധതിയിലൂടെ കേരളത്തില്‍ എല്ലാ വര്‍ഷവും ലിനക്സ് മാത്രം അറിയാവുന്ന അഞ്ച് ലക്ഷം കുട്ടികളാണ് പത്താം ക്ളാസ് കഴിഞ്ഞ് പുറത്തിറങ്ങുന്നത്. നിരവധി സംഘടനകളും യൂസേഴ്സ് ഗ്രൂപ്പുകളും സൊസേറ്റികളും ലിനക്സ് പ്രചരണത്തിനായി ഇറങ്ങിയതോടെ വിന്‍ഡോസ് ഒരു അവിഭാജ്യ ഘടകമായി കരുതുന്നവരുടെ എണ്ണം ഗണ്യമായി കുറഞ്ഞു. ബി.എസ്.എന്‍.എല്‍ , കെ.എസ്.ഇ.ബി , സഹകരണ ബാങ്കുകള്‍ തുടങ്ങി പലരും മൈക്രോസോഫ്റ്റിനെ കൈവിട്ടു തുടങ്ങിയതോടെ അവര്‍ക്ക് നില്‍ക്കക്കള്ളിയില്ലാതായി.

കേരളത്തില്‍ ഇങ്ങിനെയൊക്കെയാണെങ്കിലും വിന്‍ഡോസ് ഉപഭോക്താക്കളാണ് ഇന്നും കൂടുതല്‍. ഊഹക്കണക്കുകള്‍ പ്രകാരം ഏതാണ്ട് 87% ഗാര്‍ഹിക ഉപയോക്താക്കളും 72% മറ്റു ഉപയോക്താക്കളും വിന്‍ഡോസ് ഉപയോഗിക്കുന്നവരാണ്. എന്നാല്‍ വിന്‍ഡോസിനൊപ്പം ലിനക്സും ഇന്‍സ്റ്റാള്‍ ചെയ്ത കമ്പ്യൂട്ടറുകള്‍ ഏതാണ്ട് പകുതിയോളം വരും കേരളത്തില്‍. സ്കൂളുകളില്‍ ലിനക്സ് ഉപയോഗിക്കാന്‍ തുടങ്ങിയതായിരുന്നു ഈ മാറ്റത്തിന് കാരണം. പക്ഷേ മറ്റ് സംസ്ഥാനങ്ങളെ അപേക്ഷിച്ച് കേരളം ലിനക്സ് ഉപയോഗത്തിന്‍റെ കാര്യത്തില്‍ വളരെയധികം മുന്നിലാണ്. ദിനം പ്രതി എന്നോണം കൂടുതല്‍ പേര്‍ ലിനക്സിലേക്ക് മാറിക്കൊണ്ടിരിക്കുകയും ചെയ്യുന്നു. കേരളത്തില്‍ ഇപ്പോള്‍ സ്വതന്ത്രസോഫ്റ്റ്വെയര്‍ പ്രചരണ പരിപാടികള്‍ നടക്കുകയാണ്. നവംമ്പറില്‍ കൊച്ചി ശാസ്ത്രസാങ്കേതിക സര്‍വ്വകലാശാലയില്‍ വച്ച് നടക്കുന്ന സ്വതന്ത്ര സോഫ്റ്റ്വെയര്‍ ദേശീയ സമ്മേളനം, ഇപ്പോള്‍ നടന്നു കൊണ്ടിരിക്കുന്ന സ്വാതന്ത്ര്യ പദയാത്ര, തിരുവന്തപുരത്ത് ഡിസംമ്പറില്‍ നടക്കാന്‍ പോകുന്ന അന്തര്‍ദേശീയ സമ്മേളനം, സ്വതന്ത്രസോഫ്റ്റ്വെയറിന് മാത്രമായി കൊച്ചിയില്‍ തുടങ്ങുന്ന പരിശീലനകേന്ദ്രം , ലിനക്സ് മലയാളീകരണത്തിനായി നിരന്തരം പ്രവര്‍ത്തിക്കുന്ന സ്വതന്ത്ര മലയാളം ക്മപ്യൂട്ടിംഗ്... അങ്ങിനെ നിരവധി പരിപാടികള്‍. സാങ്കേതിക പ്രവര്‍ത്തകര്‍ക്കൊപ്പം ആശയപ്രചാരകരും രംഗത്തെത്തിയതോടെ ഈ മേഖല ഒരു തരംഗമായി കേരളത്തില്‍ മാറിക്കൊണ്ടിരിക്കുന്നു.

കേരളത്തിലെ ഈ അവസ്ഥ തന്നെയാണ് മൈക്രോസോഫ്റ്റ് നടപടിക്കു പിന്നിലും. മൈക്രോസോഫ്റ്റിന്‍റെ കുത്തക നിലനിര്‍ത്താന്‍ ഏറ്റവും ചുരുങ്ങിയത് കേരളത്തിലെങ്കിലും ഇനി സാധ്യമല്ല എന്നവര്‍ക്ക് മനസ്സിലായിത്തുടങ്ങി. ഇനിയും വൈകിയാല്‍ ഇനിയുള്ളവരും കൂടി ബദല്‍ സോഫ്റ്റ്വെയരുകളില്‍ പ്രവീണ്യം നേടും എന്ന് ബോധ്യമായതോടെ പരമാവധി നേട്ടമുണ്ടാക്കി മടങ്ങുക എന്ന തന്ത്രമാണ് മൈക്രോസോഫ്റ്റ് പുറത്തെടുത്തിരിക്കുന്നത്. ഇപ്പോള്‍ അംഗീകൃതമായ വലിയ സ്ഥാപനങ്ങളില്‍ മാത്രം റെയ്ഡുകള്‍ നടത്തിക്കൊണ്ടിരിക്കുന്ന അവര്‍ താമസിയാതെ ചെറുകിടക്കാരേയും വ്യക്തിഗത ഉപയോക്താക്കളേയും ലക്ഷ്യമിടും എന്നതിന് സംശയമില്ല. സ്വതന്ത്ര സോഫ്റ്റ്വെയര്‍ പ്രോത്സാഹനത്തോടൊപ്പം പൈറസിക്കെതിരേ ശക്തമായ നിലപാടുള്ള കേരളത്തിന്‍റെ ഐ.ടി നയം ഈ റെയ്ഡുകള്‍ക്ക് കരുത്തേകുകയും ചെയ്യുന്നുണ്ട്.

ലിനക്സ് പ്രചരണ പരിപാടികള്‍ക്ക് കരുത്തേകുകയാണ് സത്യത്തില്‍ ഈ റെയ്ഡുകള്‍. എങ്ങോട്ടു നീങ്ങണം എന്ന് സംശയിച്ചു നില്‍ക്കുന്ന ഒരു വലിയ വിഭാഗം ഇനി ലിനക്സിലേക്ക് മാറിത്തുടങ്ങും. പണം കൊടുത്ത് മൈക്രോസോഫ്റ്റ് ഉപയോഗിക്കാന്‍ കഴിയുന്ന ഉപയോക്താക്കള്‍ വളരെ കുറവു തന്നെയാണ്. പല അന്താരാഷ്ട്ര ബാങ്കുകളും വിന്‍ഡോസ് ഉപയോഗിക്കുന്നുണ്ടെങ്കിലും ഓഫീസ് പാക്കേജുകള്‍ ഉള്‍പ്പടെ പലതും സ്വതന്ത്ര സോഫ്റ്റ്വെയറുകളാണ് ഉപയോഗിക്കുന്നത്. നിരവധി സംവിധാനങ്ങള്‍ കൂട്ടിച്ചേര്‍ത്ത് പുറത്തിറങ്ങിയ ഓപ്പണ്‍ഓഫീസ് 3 ഈ മാറ്റത്തെ കൂടുതല്‍ സുഗമമാക്കുകയും െചയ്യും. മാറ്റങ്ങള്‍ അനിവാര്യമാണ്. ഇപ്പോള്‍ അത് ലിനക്സിന് അനുകൂലവും. അതെ ഒരു ലിനക്സ് പൂക്കാലം വരികയാണ്. ആ വസന്തത്തെ വരവേല്‍ക്കാന്‍ നമുക്കും തയ്യാറാവാം...

Monday, November 3, 2008

20:20 സിനിമ അദൃശ്യരാവുന്നതാര്?

സിനിമ പ്രതിസന്ധിയിലാണെന്ന് കേള്‍ക്കാന്‍ തുടങ്ങിയിട്ട് നാളേറെയായി. പരസ്പരം പോരടിക്കുന്ന സിനിമാക്കാരേയും നാം കണ്ടു. ആദ്യം ടിവി വന്നപ്പോള്‍ സീരിയലാണ് സിനിമയുടെ ശത്രു എന്നായിരുന്നു പ്രചരണം. പിന്നെ വ്യാജസിഡികളായി മാറി. ഇപ്പോള്‍ സിനിമ എവിടെ റിലീസ് ചെയ്യണം എന്നതാണ് ചര്‍ച്ചാവിഷയം. ഇതിനിടക്ക് എത്രയോ സിനിമകള്‍ വന്നു പോയി. ചിലതെല്ലാം എട്ടു നിലയിലും പത്തു നിലയിലുമെല്ലാം പൊട്ടിയപ്പോള്‍ ചിലത് റെക്കോഡുകള്‍ തകര്‍ക്കുന്ന പ്രകടനങ്ങളുമായി. എന്നാല്‍ ഒരു കാര്യം വ്യക്തമാണ്. നല്ല സിനിമകള്‍ ഒന്നും പരാജയമടഞ്ഞിട്ടില്ല.

ഇപ്പോള്‍ സിനിമയെ രക്ഷിക്കാനെന്നോണം അമ്മയുടെ പേരില്‍ പുതിയ സിനിമ, 20:20 എത്രയോ പ്രചരണമാണതിന് നടത്തിയത്. ഇപ്പോള്‍ ഇതാ റിലീസിങ്ങ് വക്കിലും. ഇപ്പോള്‍ ഈ സിനിമയും വിവാദങ്ങളുടെ വക്കിലാണ്. സിനിമാ പോസ്റ്ററിനെ സംബന്ധിച്ചാണ് പുതിയ തര്‍ക്കം. മമ്മൂട്ടി മോഹന്‍ലാല്‍ ഫാന്‍സ് കാര്‍ തമ്മില്‍ തെരുവിലടി കൂടുമോ എന്നതാണ് ചര്‍ച്ചാ വിഷയം. അവര്‍ തല്ലു കൂടട്ടെ നമുക്ക് ചുളുവില്‍ മറ്റൊരു സിനിമയും കൂടി കാണാം. നമുക്ക് മറ്റൊരു കാര്യം ചര്‍ച്ച ചെയ്യാം. താരസംഘടനയായ അമ്മയുടേതാണ് ഈ സിനിമ. കേരളത്തിലെ എല്ലാ സിനിമാതാരങ്ങളും ഒത്തുകൂടുമ്പോള്‍ നാം ഒട്ടേറെ പ്രതീക്ഷിക്കുന്നു. അതിലുപരിയായി സാമൂഹ്യപ്രതിബദ്ധതയുള്ള ഒരു സിനിമയയാകാന്‍ ജനങ്ങള്‍ ആഗ്രഹിച്ചാല്‍ അതില്‍ തെറ്റില്ല.


(ചിത്രത്തിന് കടപ്പാട് : http://www.forumkerala.com/malayalam-cinema/31093-20-20-curtain-raiser.html)


നമുക്ക് പോസ്റ്ററിലേക്ക് വരാം. അതില്‍ പലരും ഞെളിഞ്ഞു നില്‍ക്കുന്നുണ്ട്. എന്നാല്‍ അദൃശ്യത അനുഭവപ്പെടുന്ന ഒരു കൂട്ടരുണ്ട്. സ്ത്രീകള്‍! ഒരു നടിയെപ്പോലും അതില്‍ കാണാനില്ല. നായികാ പ്രാധാന്യമുള്ള സിനിമകള്‍ മലയാളത്തില്‍ അപൂര്‍വ്വമാണ്. എന്നും പുരുഷന് അടിമയായി നില്‍ക്കുന്ന സ്ത്രീകളെ മലയാളികള്‍ക്ക് മുന്‍പില്‍ അവതരിപ്പിക്കാനേ സിനിമക്ക് കഴിഞ്ഞിട്ടുളളൂ. എന്നാല്‍ സ്ത്രീകളെക്കുറിച്ച് പറയുമ്പോള്‍ മലയാളികള്‍ക്ക് നൂറു നാവുമാണ്. താരസംഘടനയുടെ പേരില്‍ പോലും അതുണ്ട്, 'അമ്മ'. എന്തു പറ്റി നമ്മുടെ സിനിമക്ക് പോസ്റ്ററില്‍ പോലും ഒരു നടിയെക്കാണാന്‍ കഴിയാത്തവിധം അവര്‍ അദൃശ്യരായോ? മമ്മൂട്ടിയേയും മോഹന്‍ലാലിനേയും പോസ്റ്ററില്‍ എവിടെ നിര്‍ത്തണം എന്ന പേരില്‍ തമ്മിലടിക്കുന്ന ഫാന്‍സുകാരും അതിന് മറുപടി പറയുന്ന സിനിമക്കാരും എന്തു കൊണ്ട് ഈ അദൃശ്യതയെ കാണുന്നില്ല. മലയാളത്തില്‍ നല്ല നടിമാര്‍ ഇല്ലാതായോ? കഴിവുള്ളവര്‍ മലയാളസിനിമയില്‍ ഇല്ലേ?. ഈ അദൃശ്യത ഒരു വിവേചനമായിപ്പോലും തോന്നാത്ത അമ്മക്ക് ദേശീയ അവാര്‍ഡ് നേടിയ മീര ജാസ്മിന്‍ എന്ന ഒരു നടി ഈ സിനിമയിലഭിനയിക്കാന്‍ വിസമ്മതിച്ചു എന്ന പേരില്‍ കോലാഹലങ്ങളുണ്ടാക്കാന്‍ എന്തവകാശം?

കേരളത്തിലെ എല്ലാ ചലച്ചിത്ര പ്രവര്‍ത്തകരും ഒന്നിച്ചാലും നടിമാര്‍ രണ്ടാം തരക്കാരാണ് എന്ന ചിന്താഗതിയില്‍ മാറ്റമുണ്ടാകില്ല എന്നത് വീണ്ടും തെളിഞ്ഞു കഴിഞ്ഞിരിക്കുകയാണ്. സിനിമാ പ്രവര്‍ത്തകയായ നന്ദിതാ ദാസ് കേരളത്തില്‍ വന്നപ്പോള്‍ പറഞ്ഞ വാചകങ്ങള്‍ ഇതെല്ലാം കണ്ടിട്ടാകാം. "പൊതു ഇടങ്ങളില്‍ സ്ത്രീകളുടെ അദൃശ്യത അത്ഭുതപ്പെടുത്തുന്നു" എന്ന വാചകത്തോട് പ്രതികരിച്ചു കൊണ്ട് നാം ഇനിയും സിനിമകള്‍ കാണും ആസ്വദിക്കും ഈ അദൃശ്യത നമ്മെ ഒന്നലട്ടുകപോലുമില്ല. കാരണം മാറിച്ചിന്തിക്കാന്‍ മലയാളികള്‍ ഇനിയും പഠിക്കേണ്ടിയിരിക്കുന്നു.

Wednesday, October 29, 2008

സ്വകാര്യബസ്സുകള്‍ ബഹിഷ്കരിക്കുക

കേരളം വീണ്ടുമൊരു ബസ്സ് സമരത്തിലേക്ക്. മുട്ടിന് മുട്ടിന് പ്രഖ്യാപിതമായും മിന്നലായും പണിമുടക്കിക്കൊണ്ടിരിക്കുന്ന പ്രൈവറ്റ് ബസ്സ് മുതലാളികള്‍ വീണ്ടും ഒരു പണിമുടക്കിലേക്ക്. ആവശ്യാനുസരണം ബസ്സ് ചാര്‍ജ്ജ് വര്‍ദ്ധിപ്പിച്ചു നല്‍കിയ ജനങ്ങള്‍ക്കെതിരെ അടുത്ത ഇരുട്ടടി. ഇപ്പോള്‍ അവരുടെ ആവശ്യം ദേശസാല്‍കൃത ബസ്സ് റൂട്ടുകളില്‍ ബസ്സോടിക്കണം എന്നത്. കെ.എസ്.ആര്‍.ടി.സി യെ എങ്ങിനെയും തകര്‍ക്കുക എന്നതാണ് എല്ലാ സ്വകാര്യബസ്സ് മുതലാളികളുടേയും ചിന്ത. അതിനായി കിട്ടുന്ന ഒരവസരവും അവര്‍ നഷ്ടപ്പെടുത്തുകയില്ല. അതാണ് ഈ ബസ്സ് സമരത്തിന്‍റെ ലക്ഷ്യവും. കെ.എസ്.ആര്‍.ടി.സി ഇപ്പോള്‍ ഒരു തിരിച്ചുവരവിന്‍റെ പാതയിലാണ്. ബസ്സുകളുടെ എണ്ണം കൂടുന്നു, ജീവനക്കാര്‍ യാത്രക്കാരോട് കൂടുതല്‍ അടുക്കുന്നു, കൂടുതല്‍ റൂട്ടുകളില്‍ ബസ്സുകള്‍ ഓടുന്നു. ഇതൊക്കെ സഹിക്കാന്‍ ഏത് കച്ചവടക്കാര്‍ക്ക് കഴിയും. സ്വകാര്യബസ്സുകള്‍ ജനങ്ങള്‍ക്ക് നല്കുന്ന സൌകര്യങ്ങള്‍ ആരും മറക്കുന്നില്ല. പക്ഷേ എത്രയൊക്കെ പറഞ്ഞാലും അവര്‍ കച്ചവടക്കാരാണ്. ജനങ്ങളോടുള്ള അവരുടെ പ്രതിബദ്ധതക്ക് തീര്‍ച്ചയായും അതിരുണ്ട്. അതിന്‍റെ പ്രതിഫലനമാണ് രാത്രി ട്രിപ്പുകളും, ആളുകള്‍ കുറഞ്ഞ ട്രിപ്പുകളും പല പേരുകളില്‍ മുടങ്ങുന്നത്. യാത്രക്കാരോടുള്ള പെരുമാറ്റ രീതികളോ? അതിനെക്കുറിച്ച് പറയാതിരിക്കുകയാണ് ഭേദം.

കെ.എസ്.ആര്‍.ടി.സി യാണ് പല ഗ്രാമപ്രദേശങ്ങളിലേക്കുമുള്ള അവസാനട്രിപ്പുകള്‍ നടത്തുന്നത്. സ്വകാര്യബസ്സുകള്‍ ട്രിപ്പുകള്‍ മുടക്കുന്ന ദിവസമാണ് പലപ്പോഴും ചിലവുകാശെങ്കിലും തിരിച്ചു കിട്ടുന്നത്. ഇത്രയും നഷ്ടം സഹിച്ചും കെ.എസ്.ആര്‍.ടി.സി ട്രിപ്പുകള്‍ നടത്തുന്നത് അത് ജനങ്ങളുടെ വാഹനമായതിനാലാണ്. ജനങ്ങളുടെ നിയന്ത്രണത്തിന്‍ കീഴില്‍ നടക്കുന്ന സ്ഥാപനമായതിനാല്‍ ജനങ്ങളുടെ ക്ഷേമം പരിഗണിച്ചു കൊണ്ടു മാത്രമേ അവര്‍ക്ക് പ്രവര്‍ത്തിക്കാന്‍ കഴിയുകയുള്ളൂ. ഈ തലം മനസ്സിലാക്കാത്ത ജനങ്ങളും ജീവനക്കാരുമാണ് നമ്മുടെ കെ.എസ്.ആര്‍.ടി.സിയെ തകര്‍ക്കാന്‍ ശ്രമിക്കുന്നത്.
ദേശസാല്‍കൃത റൂട്ടുകളില്‍ യാതൊരു കാരണവശാലും സ്വകാര്യബസ്സുകളെ അനുവദിക്കരുത്. നിലവിലിരിക്കുന്ന ഏറ്റവും മികച്ച പൊതു ഗതാഗത സംവിധാനത്തിന്‍റെ തകര്‍ച്ചയായിരിക്കും സ്വകാര്യബസ്സുകളെ അഴിഞ്ഞാടാന്‍ അനുവദിച്ചാല്‍ നടക്കുക. പൊതു ഗതാഗതസംവിധാനത്തിന്‍റെ തണലിലാണ് ഇവിടത്തെ സ്വകാര്യബസ്സുകള്‍ ഇന്ന് പ്രവര്‍ത്തിക്കുന്നത്. എന്നാല്‍ ഈ സംവിധാനത്തിന് കീഴില്‍ പ്രവര്‍ത്തിക്കുന്നു എങ്കില്‍ ജനങ്ങളുടെ ആവശ്യങ്ങള്‍ക്ക് തടസ്സങ്ങള്‍ കൂടാതെ നടത്താനുള്ള കടമയും അവര്‍ക്കുണ്ട്. പലപ്പോഴും ബസ്സ് കാത്ത് നിന്ന് മടുക്കുമ്പോഴാണ് മിന്നല്‍ പണിമുടക്കിന്‍റെ കാര്യം ജനങ്ങളറിയുക. അവിടെ അവസാനം ആശ്രയം കെ.എസ്.ആര്‍.ടി.സി യും.
ഇതിനെതിരേ ജനങ്ങള്‍ ഇനിയും പ്രതികരിക്കാതിരിക്കുന്നത് സ്വന്തം യാത്രാസൌകര്യത്തെ ഇല്ലാതാക്കലായിരിക്കും.

ജനങ്ങള്‍ മാത്രമാണ് സമരം ചെയ്യാത്ത ഒരേയൊരു വര്‍ഗ്ഗം. ജനാധിപത്യം ശരിയായ രീതിയില്‍ നടപ്പാകണമെങ്കില്‍ ഇത്തരം സന്ദര്‍ഭങ്ങള്‍ക്കെതിരേ ജനങ്ങള്‍ തന്നെ പ്രതികരിച്ചേ തീരൂ. അടിസ്ഥാനമില്ലാത്ത ആവശ്യങ്ങള്‍ക്കായ സമരം നടത്തുന്ന സ്വകാര്യബസ്സുകളെ ബഹിഷ്കരിക്കാനുള്ള തന്‍റേടം ജനങ്ങള്‍ കാണിക്കണം. എല്ലാ റൂട്ടുകളിലും കെ.എസ്.ആര്‍.ടി.സി ട്രിപ്പുനടത്തണം എന്നാവശ്യപ്പെട്ട് നമുക്ക് വേണമെങ്കില്‍ സമരം ചെയ്യാം. കാരണം കെ.എസ്.ആര്‍.ടി.സി നമ്മുടേതാണ്. കെ.എസ്.ആര്‍.ടി.സിയും സ്വകാര്യബസ്സുകളും സര്‍വ്വീസ് നടത്തുന്ന റൂട്ടുകളില്‍ കെ.എസ്.ആര്‍.ടി.സി കാത്തു നിന്ന് കയറുക. സ്വകാര്യബസ്സുകളെ ബഹിഷ്കരിക്കുക. കാരണം പൊതു മേഖലയെ സംരക്ഷിക്കേണ്ടത് ഇനി ജനങ്ങളുടെ ആവശ്യമാണ്. ഒന്നുകില്‍ സ്വകാര്യബസ്സുകള്‍ ബഹിഷ്കരിച്ച് ശക്തമായ മറുപടി അവര്‍ക്ക് നല്‍കുക. അല്ലെങ്കില്‍ വര്‍ഷത്തില്‍ അന്‍പതോ അറുപതോ ദിവസം പണിമുടക്കിയ ബസ്സ് കാത്തുനിന്ന് സമയം കളയുക.

Tuesday, October 28, 2008

ഓലപ്പമ്പരം തരുന്ന പാഠങ്ങള്‍

ഓലപ്പമ്പരം തരുന്ന പാഠങ്ങള്‍

ഓല കൊണ്ടുണ്ടാക്കിയ പമ്പരം ഈര്‍ക്കിലിയില്‍ കുത്തി ചെമ്മണ്‍ പാതയിലൂടെ ഓടുന്ന നിഷയെ നമുക്ക് ചിലപ്പോള്‍ ഇന്ന് കാണാന്‍ കഴിയില്ലായിരിക്കും. എങ്കിലും അവളെപ്പോലെ മനസ്സില്‍ കൌതുകമുള്ള ഓരോ കുട്ടിയും ഉണ്ടാക്കാന്‍ കൊതിക്കുന്ന ഒന്നാണ് ഓലപ്പമ്പരം. ഓലപ്പമ്പരം പിടിച്ച് വെറുതേ നിന്നാല്‍ അത് കറങ്ങില്ല. ഓടണം, എന്നാലേ കറങ്ങൂ. അല്ലെങ്കില്‍ നല്ല കാറ്റത്ത് കാറ്റിനെതിരേ പിടിച്ചാലും മതി.

നിഷ ഓലപ്പമ്പരമുണ്ടാക്കി കളിക്കുമ്പോള്‍ അവളുടെ വീട്ടുകാര്‍ കളിയാക്കിയേക്കാം , വെറുതേ സമയം കളയുകയാണെന്ന് പറഞ്ഞ്.
പക്ഷേ എത്രയോ രാജ്യങ്ങള്‍ നിഷയുടെ പമ്പരത്തെ അനുകരിക്കുന്നുണ്ട് എന്നറിയാമോ?. ഏക്കറു കണക്കിന് സ്ഥലങ്ങളിലാണ് അവര്‍ ഇത്തരം നിരവധി പമ്പരങ്ങള്‍ പിടിപ്പിച്ചിട്ടുള്ളത്. പക്ഷേ ഒരു വ്യത്യാസമുണ്ട്. വലിപ്പത്തില്‍, ഓരോ പമ്പരത്തിനും ഏതാണ്ട് ഒരു പത്തുനില കെട്ടിടത്തിന്‍റെ ഉയരം വരും എന്നു മാത്രം. കാറ്റാടിപ്പാടങ്ങള്‍ എന്നാണ് ഇത്തരം സ്ഥലങ്ങള്‍ അറിയപ്പെടുക. കാറ്റിന്‍റെ ശക്തിയുപയോഗിച്ച് വൈദ്യുതി ഉണ്ടാക്കാനാണ് ഈ പരിപാടി. കാറ്റത്ത് ഈ യന്ത്രങ്ങളിലെ പങ്കകള്‍ കറങ്ങും. ഈ കറക്കത്തെ ഡൈനോമകള്‍ ഉപയോഗിച്ച് വൈദ്യുതിയാക്കി മാറ്റുകയാണ് ചെയ്യുന്നത്. നല്ല കാറ്റ് എല്ലാ സമയത്തും ലഭിക്കുന്ന സ്ഥലങ്ങളിലാണ് ഇത്തരം കാറ്റാടിയന്ത്രങ്ങള്‍ സ്ഥാപിക്കുക. ഭൂമിയോട് ചേര്‍ന്നയിടങ്ങളില്‍ കാറ്റിന്‍റെ അളവ് കുറവായിരിക്കും. എന്നാല്‍ ഉയരം കൂടും തോറും മരങ്ങളും കരയും മറ്റും ഉണ്ടാക്കുന്ന തടസ്സങ്ങള്‍ ഇല്ലാത്തതിനാല്‍ കാറ്റ് നല്ല ശക്തിയില്‍ തന്നെ വീശും. കാറ്റ് ഒരേ പോലെ സ്ഥിരമായി ലഭിക്കണമെങ്കില്‍ നല്ല ഉയരത്തിലായിരിക്കണം പങ്കകള്‍ നില്‍ക്കേണ്ടത്. അതു കൊണ്ട് ഉയരം കൂട്ടാനായി വലിയ തൂണുകള്‍ സ്ഥാപിച്ച് അതിന്‍റെ മുകളിലാണ് പങ്കകള്‍ പിടിപ്പിക്കുക. നിഷയുടെ ഓലപ്പമ്പരത്തിന് 4 ഇതളുകളാണ് ഉള്ളത്. എന്നാല്‍ വൈദ്യുതി ഉണ്ടാക്കാന്‍ ഉപയോഗിക്കുന്ന പങ്കകള്‍ കൂടുതലും 3 ഇതള്‍ മാത്രമുള്ളതാണ്.
ഇരുപത് മീറ്ററില്‍ കൂടുതല്‍ ഉയരമുണ്ടായിരിക്കും പങ്കകള്‍ പിടിപ്പിച്ച തൂണുകള്‍ക്ക്. പക്ഷേ ഇപ്പോള്‍ നിലവിലുള്ള ഏറ്റവും വലിയ കാറ്റാടിക്ക് 200 മീറ്റിലധികം ഉയരമുണ്ട്. തൂണിനു തന്നെ 160 മീറ്റര്‍ ഉയരം. ബാക്കി പങ്കക്കും. പങ്കയുടെ ഒരു ഇതളിനു തന്നെ 45 മീറ്റര്‍ നീളമുണ്ടത്രേ. ജര്‍മ്മനിയിലെ ലാസ്സോ (Laasow) എന്ന സ്ഥലത്താണ് ഇത് നില്‍ക്കുന്നത്. ലോകത്ത് ഉണ്ടാക്കുന്ന മൊത്തം വൈദ്യുതിയുടെ ഒരു ശതമാനം മാത്രമാണ് ഇപ്പോള്‍ കാറ്റാടിയന്ത്രങ്ങള്‍ ഉപയോഗിച്ച് എടുക്കുന്നത്. ഡെന്‍മാര്‍ക്കിന്‍റെ 19% വൈദ്യുതിയും പക്ഷേ ഇത്തരത്തില്‍ തന്നെയാണ് ഉണ്ടാക്കുന്നത്. എന്നാല്‍ ആകെ ഉണ്ടാക്കുന്ന വൈദ്യുതിയുടെ കാര്യത്തില്‍ ജര്‍മ്മനിയാണ് മുന്നില്‍. ഇന്ത്യയും മോശമല്ലാട്ടോ, അമേരിക്കയും സ്പെയിനും കഴിഞ്ഞാല്‍ നാലാം സ്ഥാനം നമുക്കു തന്നെ. 8000MW വൈദ്യുതിയോളം നമുക്ക് തരുന്നത് കാറ്റാണ് . അതിന്‍റെ മൂന്നിലൊന്നും തമിഴ്നാട്ടിലാണ് ഉത്പാദിപ്പിക്കുന്നത്. എന്നാല്‍ 1000MW ലധികം സ്ഥാപിതശേഷിയുള്ള കേരളം വെറും 2MW വൈദ്യുതി മാത്രമാണ് ഇത്തരത്തില്‍ ഉണ്ടാക്കുന്നത്.

കാറ്റിന്‍റെ ഊര്‍ജ്ജം പങ്കകള്‍ ഉപയോഗിച്ച് എടുക്കാന്‍ തുടങ്ങിയത് അടുത്തെങ്ങുമല്ല ഏതാണ്ട് 2200 വര്‍ഷങ്ങള്‍ക്ക് മുന്‍പുതന്നെ ഇത്തരം സംവിധാനങ്ങള്‍ ഉണ്ടായിരുന്നു. പേര്‍ഷ്യയില്‍ ധാന്യം കുത്തുന്ന മില്ലുകളില്‍ ഇത്തരം കാറ്റാടികള്‍ ഉപയോഗിച്ചിരുന്നു.പക്ഷേ വൈദ്യുതി ഉണ്ടാക്കാനല്ല ഉപയോഗിച്ചത് എന്നു മാത്രം. കൂടുതല്‍ പ്രായോഗികമായ കാറ്റാടികള്‍ നിലവില്‍ വന്നത് ഏഴാം നൂറ്റാണ്ടില്‍ അഫ്ഗാനിസ്ഥാനില്‍ ആണ്. ആധുനിക കാലഘട്ടത്തില്‍ ഏററവും നന്നായി കാറ്റിനോട് കൂട്ട് കൂടിയത് ഡന്‍മാര്‍ക്കാണ്. ഇന്നും അവര്‍തന്നെയാണ് മികച്ചരീതിയില്‍ കാറ്റിനെ പ്രയോജനപ്പെടുത്തുന്നവര്‍.

വൈദ്യുതി ഉത്പാദിപ്പിക്കാന്‍ ഉപയോഗിക്കുന്ന മറ്റ് മാര്‍ഗ്ഗങ്ങളെ അപേക്ഷിച്ച് നിരവധി ഗുണങ്ങളുണ്ട് കാറ്റാടിയന്ത്രങ്ങള്‍ക്ക്. പരിസ്ഥിതി മലിനീകരണം കുറവാണ് എന്നതാണ് ഏറ്റവും വലിയ ഗുണം. ഇന്ധനങ്ങള്‍ കത്തിക്കേണ്ട എന്നതിനാല്‍ ഒരു തരത്തിലുമുള്ള അന്തരീക്ഷ മലിനീകരണവും ഇതുണ്ടാക്കുന്നില്ല. കാലാവസ്ഥാ വ്യതിയാനത്തിന് കാരണമാകും എന്ന് പറഞ്ഞ് കാറ്റാടി യന്ത്രങ്ങളെ എതിര്‍ക്കുന്നവരും ഉണ്ട്. എന്നാല്‍ ഭൂമിയുടെ ഏകദേശം 10% സ്ഥലത്തും കാറ്റാടി യന്ത്രങ്ങള്‍ സ്ഥാപിച്ചാലേ അതിന് സാധ്യതയുള്ളൂ എന്നാണ് പഠനങ്ങള്‍ കാണിക്കുന്നത്. ഇങ്ങിനെയൊക്കെ ആണെങ്കിലും കാറ്റാടികള്‍ ചില പ്രശ്നങ്ങള്‍ സൃഷ്ടിക്കുന്നുണ്ട്. പക്ഷികളെയാണ് കാറ്റാടി യന്ത്രങ്ങള്‍ ഏറ്റവും കൂടുതല്‍ ബാധിക്കുന്നത്. വേഗത്തില്‍ കറങ്ങുന്ന പങ്കയില്‍ തട്ടി നിരവധി പക്ഷികള്‍ എല്ലാ വര്‍ഷവും മരണമടയാറുണ്ട്.കാറ്റാടിയന്ത്രങ്ങളുടെ എണ്ണത്തില്‍ രണ്ടാം സ്ഥാനത്ത് നില്‍ക്കുന്ന അമേരിക്കയില്‍ ഏകദേശം 75000 ത്തോളം പക്ഷികള്‍ ഇങ്ങനെ മരണപ്പെടാറുണ്ട്. എന്നാല്‍ ഏതാണ്ട് അഞ്ചുകോടി പക്ഷികള്‍ അവിടെ എല്ലാ വര്‍ഷവും കാറില്‍ വന്നിടിച്ച് മരണമടയുന്നുണ്ടത്രേ!

ദോഷങ്ങളേക്കാള്‍ ഗുണങ്ങള്‍ തന്നെയാണ് കാറ്റാടിയന്ത്രങ്ങള്‍ക്ക് ഉള്ളത്. പരിസ്ഥിതിക്ക് ഇണങ്ങിയ ഊര്‍ജ്ജ സ്രോതസ്സ് എന്ന നിലയില്‍ ഹരിത ഊര്‍ജ്ജം എന്ന വിഭാഗത്തിലാണ് കാറ്റില്‍ നിന്നും ഉള്ള ഊര്‍ജ്ജത്തിന്‍റെ സ്ഥാനം.നിഷയെപ്പോലെ ഓലപ്പമ്പരമുണ്ടാക്കി കളിച്ചു നോക്കൂ. കറങ്ങുന്ന ആ പമ്പരം ചിലപ്പോള്‍ നാളെയുടെ ഊര്‍ജ്ജമായി മാറിയേക്കാം.

Thursday, October 23, 2008

ആയിഷ കണ്ട കാറ്റാടിയന്ത്രം

കാറ്റാടിയന്ത്രം

സ്കൂള്‍ വിട്ടു വന്ന ആയിഷ നേര ഓടിച്ചെന്നത് അടുക്കളയിലേക്കായിരുന്നു. അവിടെ അമ്മയും അച്ഛനും കൂടി വൈകിട്ടത്തേക്കുള്ള ആഹാരമുണ്ടാക്കുന്ന തിരക്കിലാണ്. വികസിച്ച കണ്ണുകളോടെ സന്തോഷത്തോടെ നില്‍ക്കുന്ന അവളെ നോക്കി അച്ഛന്‍ പറഞ്ഞു. "ഉം എന്തോ കോളൊത്തിട്ടുണ്ട്..". "ഇന്ന് ക്ളാസില്‍ ബാബു ഒരൂട്ടം ഉണ്ടാക്കിക്കൊണ്ടു വന്നു. വേഗം വന്നാല്‍ കാണിച്ചു തരാം. ഉടനെ തിരിച്ചവന് കോടുക്കാനുള്ളതാ" അവള്‍ ഒറ്റ ശ്വാസത്തില്‍ പറഞ്ഞു തീര്‍ത്തു. തിരക്കുണ്ടായിരുന്നെങ്കിലും അവളുടെ ആവേശം കണ്ടപ്പോള്‍ അമ്മയും അച്ഛനും ഒപ്പം കൂടി. തന്‍റെ ബാഗ് നിലത്തിട്ട് അവള്‍ അതില്‍ നിന്നും പ്ളാസ്റ്റിക്ക് കുപ്പികൊണ്ടുണ്ടാക്കിയ ഒരു പമ്പരം പുറത്തെടുത്തു. ഇതോടെ അവിടെ കളിച്ചു നടന്നിരുന്ന അനിയനും പതിയെ ചേച്ചിയുടെ സൂത്രം കാണാന്‍ കൂടെ കൂടി. പമ്പരം താഴെ വച്ച് അവള്‍ വീണ്ടും ബാഗിനകത്തേക്ക് കയ്യിട്ടു. പണ്ട് ടേപ്പ് റെക്കോര്‍ഡറുകളില്‍ ഉപയോഗിക്കുന്ന തരത്തിലുള്ള വളരെ ചെറിയ ഒരു മോട്ടറും അതില്‍ പിടിപ്പിച്ചിരിക്കുന്ന ഒരു എല്‍. ഇ.ഡി യുമായിരുന്നു അവള്‍ പുറത്തെടുത്ത അടുത്ത ഇനം.

"അമ്മേ ആ ഫാനൊന്നു ഓണാക്കോ..." പമ്പരവും മോട്ടറും കയ്യിലെടുത്ത് അവള്‍ പറഞ്ഞു. പമ്പരത്തിന്‍റെ മധ്യത്തിലുള്ള ചെറിയ ദ്വാരത്തിലേക്ക് അവള്‍ മോട്ടറിന്‍റെ കറങ്ങുന്ന ഭാഗം ശ്രദ്ധാപൂര്‍വ്വം പിടിപ്പിച്ചു. മോട്ടറില്‍ പിടിച്ച് അവള്‍ പമ്പരം കറങ്ങിത്തുടങ്ങിയ ഫാനിനു നേരേ കാണിച്ചു. പമ്പരം പതിയെ കറങ്ങാന്‍ തുടങ്ങി. "ബള്‍ബിലോട്ട് നോക്കമ്മേ ബള്‍ബിലോട്ട്.." പതിയെ തെളിഞ്ഞു തുടങ്ങിയ എല്‍. ഇ.ഡി യി ലേക്ക് നോക്കിക്കൊണ്ട് അവള്‍ ആവേശത്തോടെ വിളിച്ചു പറഞ്ഞു.
"ഇതു കൊള്ളാല്ലോ നല്ല സൂത്രം" അച്ഛന്‍ പറഞ്ഞു. "പല രാജ്യങ്ങളിലും കറണ്ടുണ്ടാക്കാന്‍ ഇതു പോലത്തെ വലിയ പമ്പരങ്ങള്‍ ഉപയോഗിക്കാറുണ്ടെത്രേ, ടീച്ചര്‍ പറഞ്ഞതാ. ഇതുണ്ടാക്കിയതിന് അവനെ അഭിനന്ദിക്കുകയും ചെയ്തു. നമുക്കും ഒരെണ്ണം ഉണ്ടാക്കി വീട്ടില്‍ പിടിപ്പിച്ചാലോ?" അവള്‍ ചോദിച്ചു. "അതിനിത്ര ചെറുതൊന്നും പോര, പിന്നെ നന്നായി കാറ്റ് കിട്ടണമെങ്കില്‍ നല്ല ഉയരത്തില്‍ പിടിപ്പിക്കുകയും വേണം." അമ്മയുടെ മറുപടി അത്രങ്ങോട്ട് ഇഷ്ടമായില്ലെങ്കിലും അവള്‍ പ്രതീക്ഷ കൈ വിട്ടില്ല. "വലിയ ഒരെണ്ണം സ്കൂളില്‍ പിടിപ്പിക്കാന്‍ ടീച്ചറോട് ഒന്നു പറഞ്ഞു നോക്കണം". "ശരി, ശരി എന്തായാലും ടീച്ചറോട് പറഞ്ഞു നോക്കൂ.." പൊട്ടിച്ചിരിച്ചു കൊണ്ട് അമ്മയും അച്ഛനും മറുപടി പറഞ്ഞു. "ഇതു തിരിച്ച് ബാബുവിനു കൊടുത്തിട്ട് ഞാനിപ്പം വരാം" കാറ്റാടിയന്ത്രം പൊതിഞ്ഞെടുത്ത് അവള്‍ പുറത്തേക്കോടി.
ചേച്ചിയുടെ സൂത്രപ്പണികളെല്ലാം കണ്ട് അന്തം വിട്ടു നിന്ന കുഞ്ഞനിയന്‍ മുകളില്‍ കറങ്ങിക്കൊണ്ടിരിക്കുന്ന ഫാനിലേക്ക് അതു വരെ തോന്നാത്ത ഒരു കൌതുകത്തോടെ നോക്കിനിന്നു.

Wednesday, October 22, 2008

കിഴക്കുനോക്കിയന്ത്രം ഇനി SMS ആയും കിട്ടും

കിഴക്കുനോക്കിയന്ത്രത്തില്‍ പോസ്റ്റുകള്‍ ഇടുമ്പോള്‍ SMS ആയി ലഭിക്കുവാന്‍ ഗൂഗിള്‍ അവസരമൊരുക്കിയിരിക്കുന്നു.

ഇവിടെ രജിസ്റ്റര്‍ ചെയ്തു നോക്കൂ!!

നിങ്ങള്‍ക്ക് കിഴക്കുനോക്കിയന്ത്രം SMS ആയി കിട്ടിക്കൊണ്ടിരിക്കും....

ചാന്ദ്രയാന്‍ - 1 ആദ്യഘട്ടം വിജയകരം

ചന്ദ്രയാന്‍ -1 കുതിച്ചുയര്‍ന്നു. ഭാരതത്തിന്‍റെ ആദ്യ ചന്ദ്രദൌത്യമാണിത്. 1997 ല്‍ തുടങ്ങിയ ശ്രമങ്ങള്‍ യാഥാര്‍ത്ഥ്യമാകുന്നതിന്‍റെ ആദ്യ പടിയായിരുന്നു ഈ വിക്ഷേപണം. പി.എസ്.എല്‍.വി എന്ന വാഹനത്തിന്‍റെ മികവ് ഒരിക്കല്‍ കൂടി ലോകരാഷ്ട്രങ്ങള്‍ക്കു മുന്‍പില്‍ കാണിക്കാന്‍ ഒരു അവസരം കൂടിയായിരുന്നു . കൃത്യം 6 മണി 22 മിനിട്ട് 11 സെക്കന്‍റിനാണ് ചാന്ദ്രയാനുമായി പി.എസ്.എല്‍.വി സി-11 കുതിച്ചുയര്‍ന്ന്. 18 മിനിട്ട്് കൊണ്ട് താത്കാലികമായ 357KM ഭ്രമണപഥത്തില്‍ എത്തിച്ചേര്‍ന്ന ചന്ദ്രയാന്‍ ഇപ്പോള്‍ ഭൂമിയുടെ ഉപഗ്രഹമാണ്. പതിനഞ്ചു ദിവസങ്ങള്‍ കൊണ്ട് ചാന്ദ്രയാന്‍ നമ്മുടെ ഉപഗ്രഹത്തിന്‍റെ ഉപഗ്രഹമായി മാറും. വിക്ഷേപണത്തിന് ആശങ്കയുണര്‍ത്തി മഴമേഘങ്ങള്‍ ഉണ്ടായിരുന്നു. മഴയല്ല വിക്ഷേപണത്തിന് തടസ്സമാകുന്നത്. മറിച്ച് മേഘങ്ങളില്‍ ഉള്ള വൈദ്യുത ചാര്‍ജ്ജ് ആണ്. ഇടിമിന്നല്‍ ഉണ്ടെങ്കില്‍ ആശങ്കയുണ്ടാകുന്നത് ഇതു കൊണ്ടാണ്. എന്നാല്‍ മേഘാവൃതമായ അന്തരീക്ഷമായിരുന്നുവെങ്കിലും പ്രശ്നങ്ങള്‍ ഉണ്ടായില്ല. സെക്കന്‍റില്‍ 9.84 km/s വേഗത കൈവരിച്ചിട്ടാണ് പി.എസ്.എല്‍.വി ഉപഗ്രഹത്തെ ഭ്രമണപഥത്തിലേക്ക് തള്ളിവിട്ടത്. ഇത്രയും വേഗത പി.എസ്.എല്‍.വി ഇതു വരെ കൈവരിച്ചിട്ടില്ല എന്നും തോന്നുന്നു. പതിവില്‍ നിന്ന് വ്യത്യസ്ഥമായി 180 കിലോഗ്രാം ഭാരം കൂടി അധികം വഹിച്ചു കൊണ്ടുമാണ് പി.എസ്.എല്‍.വി പുറപ്പെട്ടത്. ചാന്ദ്രദൌത്യത്തിലെ ആദ്യപടി മാത്രമാണ് പൂര്‍ത്തിയായിരിക്കുന്നത്. ദീര്‍ഘവൃത്താകാരമായ താത്കാലിക ഭ്രമണപഥത്തില്‍ നിന്നും ഇനി ചന്ദ്രനിലേക്കുള്ള യാത്ര ആരംഭിക്കേണ്ടതുണ്ട്. എല്ലാ ശാസ്ത്രജ്ഞര്‍ക്കും അഭിനന്ദനങ്ങള്‍ നേര്‍ന്നുകൊണ്ട് അതിനായി നമുക്ക് കാത്തിരിക്കാം.

Monday, October 20, 2008

ചന്ദ്രയാന്‍ സാമൂഹ്യപരമോ?

ചന്ദ്രയാന്‍ സാമൂഹ്യപരമോ?

ചന്ദ്രയാന്‍, നാം കാത്തിരുന്ന പര്യവേഷണത്തിന് 22 ന് തുടക്കമാകും. ചന്ദ്രയാന്‍ എന്ന പദ്ധതിയെ എല്ലാവരും സ്വാഗതം ചെയ്യുന്നുണ്ടെങ്കിലും ചിലരെങ്കിലും അതിനെതിരേ ശബ്ദമുയര്‍ത്തിയിട്ടുമുണ്ട്. ഭാരതത്തെ പോലെയുള്ള ഒരു രാജ്യത്തിന്, നിരവധിയാളുകള്‍ ഇന്നും പട്ടിണിയില്‍ കഴിയുന്നയിടത്ത് ഇത്തരം ഒരു ദൌത്യത്തിന്‍റെ ഔചിത്യത്തെയാണ് ഇവര്‍ ചോദ്യം ചെയ്യുന്നത്. നിരവധി തവണ പരീക്ഷണങ്ങള്‍ നടത്തിയിട്ടുള്ള ഇടമാണ് ചന്ദ്രനെന്നും ഇനിയും മറ്റൊരു പരീക്ഷണത്തിന് അര്‍ത്ഥമുണ്ടോ എന്നും മറ്റുമുള്ള വാദങ്ങള്‍ ഇവര്‍ ഉയര്‍ത്തുന്നു. വെറും രാഷ്ട്രീയപരമായ ആവശ്യം മാത്രമാണ് ചന്ദ്രയാന്‍ എന്ന വാദങ്ങള്‍ പോലും ഇവരില്‍ നിന്ന് കേള്‍ക്കുകയുണ്ടായി. ഈ വാദങ്ങള്‍ക്ക് എന്തെങ്കിലും പ്രസക്തിയുണ്ടോ?

1959 ജനുവരി 2 ന് ലൂണ-1 വിക്ഷേപിച്ചു കൊണ്ട് റഷ്യ തുടക്കമിട്ട ചാന്ദ്രദൌത്യങ്ങള്‍ അമേരിക്കയും മറ്റു രാജ്യങ്ങളും ഏറ്റെടുത്തതോടെ ചന്ദ്രനെക്കുറിച്ചുള്ള പല ധാരണകളും നാം തിരുത്തിക്കുറിച്ചു. പന്ത്രണ്ടു പേരെ ചന്ദ്രനിലിറക്കാന്‍ സാധിച്ചതോടെ ചാന്ദ്ര ദൌത്യങ്ങള്‍ക്ക് അര്‍ദ്ധവിരാമമിടുകയായിരുന്നു. എഴുപതുകള്‍ക്ക് ശേഷം ചന്ദ്രനെക്കുറിച്ച് ചിന്തിക്കാന്‍ ആരും മിനക്കെട്ടില്ല. 1990 ല്‍ ഗലീലിയോ പര്യവേഷണ വാഹനം ചന്ദ്രന്‍റെ ഇതു വരെ കാണാത്ത ചില ഭാഗങ്ങളുടെ ചിത്രമെടുത്തതോടെയാണ് പുതിയ ഗവേഷണങ്ങള്‍ക്ക് തുടക്കമായത്. 1990 ല്‍ ജപ്പാന്‍ ഹൈറ്റണ്‍ ദൌത്യത്തിലൂടെ പുതിയ ഗവേഷണങ്ങള്‍ക്ക് തുടക്കം കുറിച്ചു. പിന്നീട് പല ദൌത്യങ്ങളും പഠനങ്ങള്‍ നടത്തി. ഇന്നും ആ പഠനങ്ങള്‍ തുടരുന്നു. അതിന്‍റെ ഭാഗമാണ് ഇന്ത്യയുടെ ചന്ദ്രയാനും.

മുറ്റത്തെ മുല്ലക്ക് മണമില്ല എന്നൊരു ചൊല്ലുണ്ട്. ഏതാണ്ട് അതേ അവസ്ഥയാണ് ചന്ദ്രനും. ചന്ദ്രനെക്കുറിച്ച് നമുക്കറിയാവുന്ന കാര്യങ്ങള്‍ വളരെ കുറവാണ് എന്നതു തന്നെയാണ് സത്യം. ഒരു വേള ചൊവ്വയെക്കുറിച്ച് അറിഞ്ഞ കാര്യങ്ങള്‍ പോലും നമ്മുടെ സ്വന്തം അമ്പിളി മാമനെക്കുറിച്ച് നമുക്കറിയില്ല. ചന്ദ്രയാന്‍ തരുന്നത് നാം ഇതു വരെ അറിഞ്ഞ കാര്യങ്ങളല്ല, മറിച്ച് പുതിയ പുതിയ വിവരങ്ങളാണ്. രണ്ടു വര്‍ഷത്തോളം ചന്ദ്രന്‍റെ ഉപഗ്രഹമായി പ്രവര്‍ത്തം പ്രതീക്ഷിക്കുന്ന ചന്ദ്രയാന്‍ നിരവധി പഠനങ്ങള്‍ നടത്തുന്നു ണ്ട്. ഉപരിതലഘടന, മണ്ണിന്‍റെ രാസ ഘടന, ജലത്തിന്‍റെ സാന്നിദ്ധ്യം, ഉയര്‍ന്ന റെസലൂഷ്യനിലുള്ള ഉപരിതല മാപ്പിംഗ് തുടങ്ങിയവയൊന്നും നമുക്കിന്നും അറിയില്ല. ഇതെല്ലാമാണ് ചന്ദ്രയാന്‍ നമുക്ക് തരാന്‍ പോകുന്ന വിവരങ്ങള്‍. രണ്ടു വര്‍ഷത്തോളം പ്രവര്‍ത്തനായുസ്സ് പറയുന്ന ചന്ദ്രയാന്‍ പക്ഷേ അതിനേക്കാളേറെക്കാലം പ്രവര്‍ത്തന നിരതമായിരിക്കും എന്നത് നമുക്ക് കൂടുതല്‍ പ്രതീക്ഷ തരുന്നു.
ചന്ദ്രയാന് രാഷ്ട്രീയ പരമായ താത്പര്യം ഇല്ല എന്നു പറയാനാകില്ല. കാരണം ഭാവിയിലെ ബഹിരാകാശ ഗവേഷണങ്ങള്‍ക്കായി ഒരു അടിസ്ഥാന നിലയം ചന്ദ്രനില്‍ പണിയാന്‍ ഉദ്ദേശിക്കുന്നുണ്ട്. അതിന്‍റെ ഭാഗഭാക്കാകാനുള്ള ശ്രമങ്ങളുടെ ആദ്യ പടി കൂടിയാണിത്. ചന്ദ്രനിലെ ഹീലിയം വലിയ ഒരു ഊര്‍ജ്ജ സ്രോതസ്സായി ചൂണ്ടിക്കാണിക്കപ്പെടുന്നു. ചന്ദ്രനില്‍ രാഷ്ട്രീയ അധിനിവേശവും എല്ലാ രാജ്യങ്ങളുടേയും ചിന്തയിലുണ്ട്.
എന്നാല്‍ ഇതിനേക്കാളൊക്കെ ഉപരിയാണ് ശാസ്ത്രഗവേഷണങ്ങളില്‍ സംഭവിക്കുന്ന കുതിച്ചു ചാട്ടം. വളര്‍ന്നു വരുന്ന ഒരു തലമുറക്ക് ആവേശം പകരാന്‍, ശാസ്ത്രത്തോട് താത്പര്യമുണ്ടാകാന്‍ ചന്ദ്രയാന്‍ തരുന്ന ഊര്‍ജ്ജം കുറച്ചൊന്നുമായിരിക്കില്ല. ശാസ്ത്രഗവേഷണ മേഖലകളില്‍ നിന്നും ദിനം പ്രതി കൊഴിഞ്ഞു പൊയ്ക്കൊണ്ടിരിക്കുന്ന തലമുറയെ തിരിച്ചു കൊണ്ടു വരാന്‍ ഇത്തരം പര്യവേഷണങ്ങള്‍ സഹായിക്കും എന്നതില്‍ സംശയമില്ല. 400ഓളം കോടി രൂപയാണ് ചന്ദ്രയാന്‍ -1 ന്‍റെ ചിലവ്. എന്നാല്‍ ഇത്തരം ഒരു ദൌത്യത്തെ സംബന്ധിച്ചിടത്തോളം ഇത് താരതമ്യേന ചെറിയ തുക തന്നെയാണ്. കേരളത്തില്‍ എയിഡഡ് സ്കൂള്‍ നിയമനത്തിന് വാങ്ങുന്ന കൈക്കൂലി പോലും ഇതിന്‍റെ എത്രയോ ഇരട്ടി വരും. പട്ടിണി മാറ്റാന്‍ കഴിയാത്തത് പണമില്ലാത്തതു കൊണ്ടാണോ എന്നും ചിന്തിക്കേണ്ടിയിരിക്കുന്നു. കാരണം ഉള്ള പണത്തെ ശരിയായ രീതിയില്‍ വിന്യസിക്കാന്‍ സാധിച്ചാല്‍ പട്ടിണിയൊക്കെ എന്നേ മാറിയേനേ!! ഇതിന്‍റെ പേരില്‍ ചന്ദ്രയാനെ എതിര്‍ക്കുന്നവര്‍ സത്യം മറച്ചു പിടിക്കുന്നവരാണ് എന്ന് പറയാതെ വയ്യ.

Monday, October 13, 2008

പെട്രോള്‍ വില കുറയ്കണം എന്നാരും പറയാത്തതെന്താ?

പെട്രോള്‍ വില കുറയ്കണം എന്നാരും പറയാത്തതെന്താ?

പെട്രോളിയം വില ബാരലിന് 140$ ല്‍ കൂടുതലായ ഒരു സമയമുണ്ടായിരുന്നു നമുക്ക്. അന്ന് എന്തെല്ലാം പുകിലുകളായിരുന്നു പെട്രോളിയം കമ്പനികള്‍ കാണിച്ചു കൂട്ടിയിരുന്നത്. അങ്ങിനെ പെട്രോളിയം ഉല്പന്നങ്ങളുടെ വില കുതിച്ചുയര്‍ന്നു. പെട്രോളിയം വില കുറക്കണം എന്നു പറഞ്ഞ് ഒരു സമരം പോലും ഉണ്ടായുമില്ല. പണ്ടൊക്കെ പെട്രോളിന് അന്‍പതു പൈസ കൂട്ടുമ്പോഴേക്കും സമരങ്ങളിലൂടെ നാം പ്രതികരിക്കുമായിരുന്നു. ഇപ്പോള്‍ അഞ്ചു രൂപ കൂട്ടിയാല്‍ പോലും ഒരു പ്രശ്നവുമില്ലാതെ അംഗീകരിക്കാന്‍ നാം ശീലമാക്കിയിരിക്കുന്നു. പെട്രോളിയം വില കൂടുന്നതിനനുസരിച്ച് മറ്റെല്ലാ മേഖലയിലും വില വര്‍ദ്ധിക്കുകയും ചെയ്യും. ബസ്സ് ചാര്‍ജ്ജ് കൂട്ടണമെന്നു പറഞ്ഞായിരിക്കും അതില്‍ പ്രധാന സമരം. തുടര്‍ന്ന് മറ്റ് വാഹനങ്ങളും. ഇപ്പോള്‍ പെട്രോളിയം വില ബാരലിന് 80$ താഴെയായി മാറിയിരിക്കുന്നു.
പെട്രോളിയത്തിന് ഈ വിലയായിരുന്നപ്പോള്‍ പെട്രോളിനും ഡീസലിനുമെല്ലാം എത്രയായിരുന്നു വില എന്നൊന്ന് ആലോചിച്ചു നോക്കൂ.

ഇപ്പോള്‍ കുറഞ്ഞ നിരക്കു വച്ച് പെട്രോള്‍, ഡീസല്‍ വിലകളില്‍ ൫0% എങ്ങിലും കുറവു വരേണ്ടതാണ്. സാമ്പത്തിക മാന്ദ്യം എല്ലാ മേഖലയിലും എന്ന പോലെ രുപയുടെ മൂല്യത്തിലും കുറവു വരുത്തി. ഡോളറിന്‍റെ വില ഏതാണ്ട് 50 രൂപ തന്നെയായി മാറി. അതു വച്ച് നോക്കിയാല്‍ പോലും 30% വിലക്കുറവെങ്കിലും ഉണ്ടാകേണ്ടതാണ്. അങ്ങിനെ വില കുറക്കാന്‍ ഒരു കമ്പനിയും തയ്യാറാവില്ല. എന്നാല്‍ എന്തിനും ഏതിനും സമരം ചെയ്യുന്ന ഒരു രാഷ്ട്രീയ പാര്‍ട്ടിയും അന്താരാഷ്ട്ര വിലക്കനുസരിച്ച് ഇന്ധനവില കുറക്കണം എന്നു പറഞ്ഞ് ഒരു സമരമോ എന്തിന് ഒരു പ്രസ്ഥാവന പോലും ഉണ്ടായില്ല. മുട്ടിന് മുട്ടിന് സമരം ചെയ്ത് ജനങ്ങളെ ബുദ്ധിമുട്ടിക്കുന്ന ബസ്സ് , മറ്റ് വാഹനക്കാരില്‍ നിന്നും ഇന്ധനവിലകുറക്കണം എന്ന ആവശ്യം ജനങ്ങള്‍ പ്രതീക്ഷിക്കുന്നില്ല. പക്ഷേ രാഷ്ട്രീയ സംഘടനകളില്‍ നിന്നും പ്രതീക്ഷിക്കുന്നത് അതല്ല. എന്തിനാണ് രാഷ്ട്രീയം? രാഷ്ട്രത്തെ സംബന്ധിച്ച ഏതു കാര്യങ്ങളിലും ആശയങ്ങള്‍ രൂപീകരിക്കുന്നതിനും തീരുമാനങ്ങള്‍ പ്രാവര്‍ത്തികമാക്കേണ്ടതിലും രാഷ്ട്രീയ സംഘടനകള്‍ക്ക് ഉത്തരവാദിത്വമുണ്ട്. എന്നാല്‍ അതിനൊന്നും മുതിരാതെ നടക്കുന്ന രാഷ്ട്രീയ സംഘടനകള്‍ മുഴുവന്‍ രാഷ്ട്രത്തിന്‍റെയും ജനങ്ങളുടെയും അധീനതയിലല്ല മറിച്ച് പണത്തിന്‍റെ അധീനതയിലാണ് എന്ന് സംശയിക്കേണ്ടിയിരിക്കുന്നു. ജനങ്ങളുടെ ആവശ്യങ്ങള്‍ അവര്‍ ആവശ്യപ്പെടാതെ തന്നെ ചെയ്തു തരേണ്ട ഔന്നത്യമാണ് രാഷ്ട്രീയക്കാരില്‍ നിന്നും സര്‍ക്കാരില്‍ നിന്നും ജനങ്ങള്‍ പ്രതീക്ഷിക്കുന്നത്.

Monday, October 6, 2008

യന്ത്രം ധരിക്കൂ, അന്ധവിശ്വാസം അകറ്റൂ - അന്ധവിശ്വാസ നിരാകരണ യന്ത്രം !!

അന്ധവിശ്വാസം അകറ്റാന്‍ - അന്ധവിശ്വാസ നിരാകരണ യന്ത്രം ധര‌ിക്കൂ..

"ധനാകര്‍ഷണ യന്ത്രം ധരിക്കൂ ധനം നേടൂ" വഴിയരികില്‍ നിന്ന് ധനാകര്‍ഷണ യന്ത്രം വില്‍ക്കുന്ന കച്ചവടക്കാരെ നാം പലപ്പോഴും കണ്ടിട്ടുണ്ട്. വയറ്റിപ്പിഴപ്പിന് ധനാകര്‍ഷണയന്ത്രം വില്‍ക്കുന്ന ആ കച്ചവടക്കാര്‍ക്ക് അതൊരു ധനാകര്‍ഷണമാര്‍ഗ്ഗമായിരുന്നു എന്നത് സത്യം തന്നെ. അവര്‍ തരുന്ന യന്ത്രം (ചരടും മറ്റും ആണ് ഈ യന്ത്രം) ധരിച്ചാല്‍ ധനം താനേ വന്നു ചേരുമത്രേ!!. സാമാന്യബോധം നഷ്ടപ്പെട്ടവര്‍ ഒത്തിരിപ്പേര്‍ ഈ യന്ത്രം വാങ്ങി ധരിക്കുകയും ചെയ്യുമായിരുന്നു. "ഈ യന്ത്രം സ്വയം അങ്ങു ധരിച്ചാല്‍ പോരേ ധനികരാവാമല്ലോ, എന്തിന് ഈ കച്ചവടം നടത്തി പണം നേടണം?" എന്ന് കച്ചവടക്കാരോട് തിരിച്ചു ചോദിക്കാന്‍ മാത്രം സാമാന്യബോധമുള്ള ജനം ഉണ്ടായിരുന്നില്ല എന്നല്ല, അവര്‍ അവിടെ പോയിരുന്നില്ല എന്നു മാത്രം.
അങ്ങിനെ സുഖമായി നടന്നിരുന്ന ആ കച്ചവടങ്ങള്‍ അന്ധവിശ്വാസങ്ങള്‍ പ്രചരിപ്പിക്കുന്നതില്‍ പങ്കു വഹിച്ചിട്ടുണ്ട്. ഇപ്പോള്‍ ആധുനിക കാലഘട്ടം. കച്ചവടവും ആധുനികമാകണമല്ലോ, ടി.വി ചാനലുകളും പത്രമാധ്യമങ്ങളും വഴിയാണ് ഇപ്പോഴത്തെ കച്ചവടം. പത്തോ അന്‍പതോ പേരെ ഒരുമിച്ച് പറ്റിച്ചിരുന്നിടത്ത് ഇപ്പോള്‍ പതിനായിരക്കണക്കിനും ലക്ഷക്കണക്കിനും പേരെ ഒരുമിച്ച് പറ്റിക്കാം. ആരും തിരിച്ച് ചോദിക്കാനും വരികയില്ല. ഒരു പ്രമുഖ ചാനലില്‍ ടെലി ഷോപ്പിംഗ് പരിപാടി കാണാനിടയായി. ആഹാ.. എല്ലാത്തിനും പരിഹാരം കാണാന്‍ രുദ്രാക്ഷം ധരിച്ചാല്‍ മതിയത്രേ!!. അതും എത്രയോ തരത്തിലുള്ള രുദ്രാക്ഷങ്ങള്‍. സ്വര്‍ണ്ണം കെട്ടിയതും വെള്ളി കെട്ടിയതും ഒന്നും കെട്ടാത്തതും മാലയാക്കിയതും എല്ലാം കിട്ടും. പക്ഷേ ഭാഗ്യം അങ്ങു വെറുതേ വന്നു ചേരുകയില്ല, ഒട്ടും കുറയാത്ത പണം നല്‍കണം!
പത്രങ്ങളില്‍ വരുന്നതോ അതിലും രസകരം. ധനാകര്‍ഷണയന്ത്രം, അറബിമാന്ത്രികം
( മതേതരത്വം നില നിര്‍ത്തുന്നതില്‍ ഇത്തരം പരസ്യങ്ങള്‍ വഹിക്കുന്ന പങ്ക് ചില്ലറയല്ല!!), വശീകരണചരടുകള്‍, പിന്നെ വായില്‍ കൊള്ളാത്ത പല പേരുകളോടെ നിരവധി യന്ത്രങ്ങള്‍!!.
പത്രങ്ങളില്‍ പരസ്യം നല്‍കാന്‍ എത്ര രൂപയാകും എന്നാലോചിട്ടുണ്ടോ? അതിനേക്കാളേറെ തിരിച്ചു കിട്ടിയാലേ പരസ്യം കൊടുക്കുന്നവര്‍ക്ക് നിലനില്‍ക്കാന്‍ കഴിയൂ. സാക്ഷരപ്രബുദ്ധ കേരളത്തില്‍ ഇതിന്‍റെ പുറകേ പോകാന്‍ ആളുണ്ടാവില്ല എന്നൊന്നും കരുതാന്‍ വയ്യ എന്നു ചുരുക്കം. കാരണം ഇത്തരം പരസ്യങ്ങള്‍ തുടര്‍ച്ചയായി വീണ്ടും വീണ്ടും വരികയാണ്. ഭാരതത്തിലെ നിയമമനുസരിച്ച് ഇത്തരം പരസ്യങ്ങള്‍ ശിക്ഷാര്‍ഹമാണ്.പക്ഷേ എന്തു പ്രയോജനം?

90% അന്ധവിശ്വാസങ്ങളും സ്വാര്‍ത്ഥതാത്പര്യങ്ങളുടെ സൃഷ്ടിയാണ്. ഇപ്പോള്‍ പണമാണ് അന്ധവിശ്വാസങ്ങളുടെ അടിസ്ഥാനം. കേരളത്തിലെ ജനങ്ങളെ പറ്റിക്കാന്‍ എളുപ്പമാണ് എന്നതാണോ ഇതിന്‍റെ അടിസ്ഥാനം? ഇനി ഒന്നു കൂടി കാണാനുണ്ട് അന്ധവിശ്വാസങ്ങള്‍ അകറ്റാന്‍ അന്ധവിശ്വാസനിരാകരണയന്ത്രം എന്നൊരു പരസ്യം. അതു കൂടി കണ്ടാല്‍ ഹാവൂ, സമാധാനമായി!!!



കഴിഞ്ഞ പോസ്റ്റ് :താഴെ വീഴാതെ ഉപഗ്രഹം

Saturday, October 4, 2008

താഴെ വീഴാതെ ഉപഗ്രഹം സ്പുട്നിക്ക് പിന്നെ ബഹിരാകാശം, പര്യവേഷണങ്ങള്‍ , ലോക പുരോഗതി

ലോക ബഹിരാകാശ വാരം
(സ്പുട്നിക്ക് വിക്ഷേപണത്തിന്‍റെ ഓര്‍മ്മക്ക്..)


1957 ഒക്റ്റോബര്‍ 4 ലോകം കാത്തിരുന്ന കാഴ്ച. അവിശ്വസനീയമായിരുന്നു അത്. മനുഷ്യന്‍ ആകാശത്തേക്കുയര്‍ത്തിയ ഒരു വസ്തു താഴേക്ക് വീഴാതെ ഭൂമിയെ വലം വച്ചു കൊണ്ടിരിക്കുക! സ്പുട്നിക്ക് എന്ന ആ മനുഷ്യനിര്‍മ്മിത വസ്തു ലോകത്തിന്‍റെ മുഖച്ഛായ മാറ്റി മറിച്ചു. ബഹിരാകാശയുഗത്തിന്‍റെ തുടക്കമായിരുന്നു അത്. ശീതസമരത്തിന്‍റെ കാലത്ത് അമേരിക്കയെ കടത്തിവെട്ടി റഷ്യ കൈവരിച്ച ആ നേട്ടം തുടര്‍ന്നുണ്ടാക്കിയത് ഒരു മത്സരമായിരുന്നു. പിന്നീട് എത്രയോ വിക്ഷേപണങ്ങള്‍, പരീക്ഷണങ്ങള്‍, ഉപഗ്രഹങ്ങള്‍,വേഗതയേറിയ വാര്‍ത്താവിനിമയം, മനുഷ്യന്‍ ചന്ദ്രനില്‍ അതും ആറു തവണ, ബഹിരാകാശത്ത് താമസം, വന്‍ ബഹിരാകാശ നിലയങ്ങള്‍ , (ആകാശ വാഹനങ്ങള്‍)സ്പേസ് ഷട്ടിലുകള്‍ എല്ലാം ചേര്‍ന്ന് ലോകത്തിന്‍റെ ഗതിയില്‍ തന്നെ വന്‍ മാറ്റങ്ങളുണ്ടാക്കി. അത് ഇന്നും തുടര്‍ന്നു കൊണ്ടിരിക്കുന്നു.

ഇന്നു മുതല്‍ ഒരാഴ്ച ലോകം ആ സ്മരണ പുതുക്കുകയാണ്. ലോക ബഹിരാകാശ വാരം. ബഹിരാകാശ മേഖയയെ ജനങ്ങളുമായി കൂടുതല്‍ അടുപ്പിക്കാന്‍ ഒരു ശ്രമം. ലോകഗ്രാമമെന്ന സ്വപ്നം യാഥാര്‍ത്ഥ്യമാക്കിയ നേട്ടം പൊതു ജീവിതത്തിന് എങ്ങിനെ പ്രയോജനപ്പെടുന്നു എന്ന് ജനങ്ങളെ അറിയിക്കാന്‍ ശ്രമിക്കുകയാണ് ശാസ്ത്രജ്ഞരും ശാസ്ത്രപ്രവര്‍ത്തകരും.

ഭൂമിക്ക് ചുറ്റും താഴെ വീഴാതെ ഉപഗ്രഹം കറങ്ങുന്നതിന്‍റെ പൊരുള്‍?

ഒരു കല്ലെടുത്ത് എറിഞ്ഞു നോക്കൂ, അല്പനേരം കൊണ്ട് ഒരു വളഞ്ഞ പാതയിലൂടെ അത് ഭൂമിയിലെത്തും അല്പം കൂടി വേഗതയിലെറിഞ്ഞാല്‍ കല്ല് കൂടുതല്‍ ദൂരം സഞ്ചരിക്കും. രസകരമായ ഒരു കാര്യം താഴെ വീഴുന്നു സമയത്തും കല്ലിന്‍റെ തിരശ്ചീനമായ വേഗതക്ക് മാറ്റം വരുന്നില്ല എന്നതാണ്. നല്ല വേഗതയില്‍ എറിയാന്‍ സാധിച്ചാല്‍ വേണമെങ്കില്‍ കിലോമീറ്ററുകളോളം കല്ലിന് സഞ്ചരിക്കാന്‍ സാധിക്കും. ഭൂമിയുടെ ആകൃതി ഗോളമാണെന്ന് നമുക്കെല്ലാം അറിയാം. അപ്പോള്‍ വളരെയധികം ദൂരേക്ക് എറിഞ്ഞ കല്ലിനൊപ്പം ഭൂമിക്കും അല്പം വളവുണ്ടാകും (ചിത്രം കാണുക).
പിന്നെയും വേഗം കൂട്ടിയെറിഞ്ഞാല്‍ ചിലപ്പോള്‍ കല്ല് അമേരിക്കയില്‍ പോയി വീണേക്കാം. പിന്നെയും ആവശ്യത്തിന് വേഗം നല്‍കിയാല്‍ , എറിഞ്ഞ ആളിന്‍റെ പുറകില്‍ തന്നെ എത്തിച്ചേരാനുള്ള സാധ്യതയും തള്ളിക്കളയണ്ട. ഇവിടെ ഒരു കാര്യം മറക്കരുത് കല്ലിന്‍റെ തിരശ്ചീന വേഗതക്ക് മാറ്റമൊന്നും വന്നിട്ടില്ല. അതായത് ശരിയായ വേഗത കല്ലിന് നല്‍കിയാല്‍ ഒരിക്കലും നിലക്കാതെ ഭൂമിക്ക് ചുറ്റും കറങ്ങിക്കൊണ്ടേയിരിക്കും എന്നു സാരം. എറിഞ്ഞ കല്ലിനെ എല്ലായ്പോഴും ഭൂമി ആകര്‍ഷിച്ചു കൊണ്ടിരിക്കും. തന്മൂലം കല്ലിന്‍റെ പാതക്ക് വളവുണ്ടാവുകയും ചെയ്യും. എന്നാല്‍ കല്ലിന്‍റെ പാതയുടെ വളവും ഭൂമിയുടെ വളവും തുല്യമായാല്‍ പിന്നീട് ഒരിക്കലും ഭൂമിയില്‍ വീഴാന്‍ അതിന് കഴിയുകയില്ല. ആ കല്ല് ഒരു ഉപഗ്രഹമായി മാറിക്കഴിഞ്ഞു എന്നര്‍ത്ഥം. നിരന്തരം ഭൂമിയിലേക്ക് വീണു കൊണ്ടിരിക്കുന്ന ഒന്നാണ് ഈ ഉപഗ്രഹം!!

വളരെ എളുപ്പത്തില്‍ ഇങ്ങനെ പറയാനും കേള്‍ക്കുന്നവരെ ആവേശം കൊള്ളിക്കാനും എളുപ്പമാണ്. എന്നാല്‍ യഥാര്‍ത്ഥത്തില്‍ അന്തരീക്ഷത്തിന്‍റെ സാന്നിദ്ധ്യം ഘര്‍ഷണത്തിന് കാരണമാവുകയും തിരശ്ചീനവേഗതക്ക് കുറവുണ്ടാവുകയും ഭൂമിയില്‍ തിരിച്ചെത്തുകയും ചെയ്യും വളരെ ഉയര്‍ന്ന ഭ്രമണ പഥത്തില്‍ ആയാല്‍ വായുവിന്‍റെ സാന്നിദ്ധ്യം കുറയുന്നതു മൂലം ഈ പ്രശ്നം ഒരു പരിധി വരെ ഒഴിവാക്കാനാകും. റോക്കറ്റുകള്‍ ഉപയോഗിച്ച് ഉപഗ്രഹങ്ങളെ വളരെ ഉയര്‍ന്ന ഭ്രമണ പഥത്തില്‍ എത്തിച്ച ശേഷം തിരശ്ചീനമായി ഒരു വേഗത നല്‍കിയാണ് സാധാരണ ഉപഗ്രഹങ്ങള്‍ വിക്ഷേപിക്കുന്നത്. അല്പമാത്രമാണെങ്കിലും വായുവിന്‍റെ സാന്നിദ്ധ്യം മൂലം നഷ്ടപ്പെടുന്ന ഊര്‍ജ്ജം വീണ്ടെടുത്ത് പരിക്രമണ പഥം സ്ഥിരമായി നിര്‍ത്താന്‍ ഉപഗ്രഹങ്ങളില്‍ അല്പം ഇന്ധനം കൂടി കരുതാറുണ്ട്.

ചാന്ദ്രയാന്‍ പദ്ധതിയുടെ പരീക്ഷഘട്ടം പൂര്‍ത്തിയായിരിക്കുകയാണ്. ചന്ദ്രനെ വലം വച്ച് പഠനം നടത്താനുള്ള ഉപഗ്രഹം ശ്രീഹരിക്കോട്ടയില്‍ നിന്ന് വിക്ഷേപിക്കപ്പെടുമ്പോള്‍ ഇന്ത്യയും പുതിയൊരു കാല്‍വയ്പ്പിലേക്കാണ്. അതിന്‍റെ വിജയം നല്‍കുന്ന ഊര്‍ജ്ജം അന്ധവിശ്വാസങ്ങള്‍ കൊണ്ട് കണ്ണു കാണാതായ ജനതക്ക് പുതിയൊരു കാഴ്ച നല്‍കാന്‍ സഹായിച്ചെങ്കില്‍..

Thursday, October 2, 2008

അഹിംസാ ദിനം സ്ഫോടന പ‌രമ്പരകള്‍

ലോക അഹിംസാ ദിനം

ഇന്ന് ലോക അഹിംസാ ദിനം ആചരിക്കുകയാണ് ലോകം. മറ്റുള്ളവരെ ഹിംസിക്കാതെ ജീവിക്കാന്‍ ജനങ്ങളെ പ്രേരിപ്പിക്കാന്‍ ഒരു ദിനം. നമ്മുടെ രാഷ്ട്രപിതാവായ മഹാത്മാ ഗാന്ധിജിയുടെ ജന്മദിനം. അഹിംസ എന്ന സന്ദേശം എന്താണെന്ന് ലോകജനതക്ക് കാട്ടിക്കൊടുത്ത അദ്ദേഹത്തെ ലോകം
ആദരിക്കുകയാണ്.

പക്ഷേ അദ്ദേഹത്തിന്‍റെ നാട്ടില്‍ നടക്കുന്നതോ?

സ്ഫോടന പരമ്പരകള്‍ ഡല്‍ഹി, അഹമ്മദാബാദ്, ബാംഗ്ളൂര്‍, ഡല്‍ഹി ഇപ്പോള്‍ അഗര്‍ത്തലയിലും.
എത്രയോ നിരപരാധികള്‍ കൊല്ലപ്പെടുന്നു. എന്നിട്ടും നാം അഹിംസയെക്കുറിച്ച് പറയുന്നു, വാ തോരാതെ സംസാരിക്കുന്നു. ഭീകരര്‍ അഴിഞ്ഞാടുന്നു, സ്നേഹസന്ദേശമോതേണ്ട മതങ്ങളുടെ പേരില്‍ ചോരപ്പുഴയൊഴുക്കുന്നു. ഇതെല്ലാം എന്ന് അവസാനിക്കും? മതം ഭീകരതയുടെ പര്യായമായി മാറുന്നു. വിശ്വാസം മനുഷ്യരുടെ നന്മക്കായിട്ടല്ല, ഹിന്ദുക്കളുടേയും കൃസ്ത്യാനികളുടേയും ഇസ്ലാമുകളുടേയും സിക്കുകാരുടേയും ജൈനരുടേയും പാഴ്സികളുടേയും സംരക്ഷണത്തിനായി മാത്രം. പലപ്പോഴും അതു പോലുമില്ല.

മനുഷ്യത്വം ഇല്ലാതെ ഏതു മതമുണ്ടായിട്ടും വിശ്വാസമുണ്ടായിട്ടും എന്തു കാര്യം. അഹിംസ പറയാനുള്ളതല്ല. പ്രവര്‍ത്തിക്കാനുള്ളതാണ്. മനുഷ്യത്വമുള്ള നമുക്കോരോരുത്തര്‍ക്കും അങ്ങിനെയാവാന്‍ ശ്രമിക്കാം. പുതിയൊരു ലോകത്തിനായി.........

Saturday, September 27, 2008

20% മൈലേജ് കൂടുതല്‍ വേണോ വൈദ്യുതക്ഷേത്രം ഉപയോഗിക്കൂ..

ഇലക്ട്രിക്ക് ഉപകരണം 20% മൈലേജ് കൂട്ടുന്നു

ഇന്ധനത്തെ കാര്യക്ഷമമായി ഉപയോഗിക്കാന്‍ നമുക്ക് എത്ര പേര്‍ക്കറിയാം. എത്ര വാഹനനിര്‍മ്മാതാക്കള്‍ക്കറിയാം? എന്തായാലും വാഹനനിര്‍മ്മാതാക്കള്‍ നിരവധി ആധുനിക രീതികള്‍ മൈലേജ് കൂട്ടാനായി ഉപയോഗിച്ചിട്ടുണ്ട് . ഫിലാഡെല്‍ഫിയായിലെ ടെംപിള്‍ സര്‍വ്വകലാശാലയിലെ ഭൌതികശാസ്ത്രവിഭാഗം പുതിയൊരു സാങ്കേതിക വിദ്യയുമായി രംഗത്ത് വന്നിരിക്കുന്നു. വൈദ്യുതക്ഷേത്രം ഉപയോഗിച്ച് ഇന്ധനകാര്യക്ഷമതയില്‍ 20% വര്‍ദ്ധനവ് വരുത്താന്‍ അവര്‍ക്ക് കഴിഞ്ഞിതായാണ് റിപ്പോറ്‍ട്ട്

വൈദ്യുതചാര്‍ജ്ജുള്ള ഒരു കുഴലാണ് ഉപകരണത്തിന്‍റെ പ്രധാന ഭാഗം. എന്‍ജിനിലേക്ക് ഇന്ധനം ചീറ്റുന്ന കുഴലിനടുത്താണ് ഇത് സ്ഥാപിക്കുക. വാഹനത്തിലെ ബാറ്ററിയില്‍ നിന്നുമുള്ള വൈദ്യുതി ഉപയോഗിച്ച് ഈ കുഴലില്‍ വൈദ്യുതക്ഷേത്രം സൃഷ്ടിക്കുന്നു. ഈ വൈദ്യുതക്ഷേത്രം കടന്നു പോകുന്ന ഇന്ധനത്തിന്‍റെ വിസ്കോസിറ്റിയെ (ശ്യാനത) കുറക്കുമത്രേ. തന്മൂലം വളരെ കുറച്ച് അളവില്‍ മാത്രം ഇന്ധനം ദഹന അറയിലേക്ക് കടത്തിവിടാന്‍ കഴിയും. ഈ വളരെ ചെറിയ ഇന്ധത്തുള്ളികള്‍ പൂര്‍ണ്ണമായും കത്തിത്തീരാനും എളുപ്പമാണ്. നിലവിലുള്ള ഫ്യൂവല്‍ ഇന്‍ജെക്റ്ററുകളേക്കാള്‍ കാര്യക്ഷമത ഇതിനുണ്ടാകും എന്നാണ് ടെംപിള്‍ യൂണിവേഴ്സിറ്റിക്കാരുടെ അവകാശവാദം.

ഡീസല്‍ ഉപയോഗിച്ച് ഓടുന്ന മെഴ്സിഡസ് - ബെന്‍സ് വാഹനത്തില്‍ ആറു മാസക്കാലം അവര്‍ പരീക്ഷണങ്ങള്‍ നടത്തി. ഒരു ഗാലണ്‍ ഇന്ധനത്തിന് 32 മൈല്‍ കിട്ടിയിരുന്നിടത്ത് പുതിയ രീതി ഉപയോഗിച്ചപ്പോള്‍ 38 മൈല്‍ ഓടാന്‍ കഴിഞ്ഞു. എന്തായാലും ടെംപിള്‍ യൂണിവേഴ്സിറ്റി ഈ കണ്ടെത്തലിന് പേറ്റന്‍റ് എടുക്കാനുള്ള ശ്രമത്തിലാണ്.

വൈദ്യുതക്ഷേത്രം ശ്യാനതയെ കുറക്കുന്നതെങ്ങിനെ തുടങ്ങിയ കൂടുതല്‍ വിവരങ്ങള്‍ അവര്‍ പുറത്തുവിട്ടിട്ടില്ല. വൈദ്യുത ക്ഷേത്രവും ശ്യാനതയും തമ്മിലുള്ള ബന്ധത്തെക്കുറിച്ച് പഠനങ്ങള്‍ നടന്നിട്ടുണ്ട്. എന്നാല്‍ ആ കണ്ടെത്തലിനെ ഇത്തരം ഒരു കാര്യത്തിനായി ഉപയോഗിക്കുമ്പോഴാണ് ശാസ്ത്രം അനുയോജ്യമായ സാങ്കേതിക വിദ്യകള്‍ക്ക് ജന്മം നല്കുന്നത്.


വിവരങ്ങള്‍ക്ക കടപ്പാട്
http://www.temple.edu/newsroom/2008_2009/09/stories/taofueldevice.htm

Wednesday, September 24, 2008

99% മാര്‍ക്ക് , ബുദ്ധി ഉണ്ട് , തത്തമ്മ പൂച്ച ഇല്ല , പ്രവേശനം ഇേല്ല ഇല്ല

എന്‍ട്രന്‍സും പ്ലസ്റ്റു മാര്‍ക്കും വൈരുദ്ധ്യങ്ങളുടെ ലോകം...



ഇന്നത്തെ (24-09-08) കേരള കൌമുദി വാര്‍ത്ത നോക്കൂ, പ്ളസ്റ്റു പരീക്ഷക്ക് 99.33% മാര്‍ക്ക് വാങ്ങിയ ആരതിക്ക് എന്‍ട്രന്‍സ് പരീക്ഷയില്‍ റാങ്ക് 32986!!
രാജേഷിന് പ്്ലസ്റ്റുവിന് മാര്‍ക്ക് 99% എന്‍ട്രന്‍സ് പരീക്ഷയില്‍ റാങ്ക് 17814!!
എന്‍ട്രന്‍സ് എന്ന കടമ്പ, അതൊരു ഭീഷണിയാണിപ്പോള്‍ പല നല്ല കുട്ടികള്‍ക്കും. എന്‍ട്രന്‍സ് പരീക്ഷ പരിഷ്കരിക്കണം എന്നത് എത്രയോ കാലമായുള്ള ആവശ്യമാണ്. പക്ഷേ ഇന്നും സാമ്പ്രദായിക രീതിയിലുള്ള എന്‍ട്രന്‍സ് പരീക്ഷ കേരളത്തിന്‍ തുടരുകയും ചെയ്യുന്നു. കോച്ചിംഗ് എന്ന കടമ്പ കടക്കുന്നവര്‍ക്കു മാത്രമേ എന്‍ട്രന്‍സ് കടക്കാനാകൂ എന്നതാണ് ഇന്നത്തെ പ്രശ്നം. സുപ്രീം കോടതി അഭിപ്രായത്തിന്‍റെ സാഹചര്യത്തില്‍ കേരളകൊമുദി ഉയര്‍ത്തിയ ഈ പ്രശ്നം ഒരു ഒറ്റപ്പെട്ട സംഭവം അല്ല. ആര്‍ക്കും വളരെ എളുപ്പം തിരിച്ചറിയാവുന്ന ഒരു സാധാരണ സംഭവം മാത്രം. വളരെക്കുറഞ്ഞ സമയം കൊണ്ട് വളരെയധികം ചോദ്യങ്ങള്‍ക്ക് ഉത്തരമെഴുതേണ്ടി വരുന്ന കുട്ടിക്ക് ആ വിഷയത്തെക്കുറിച്ചുള്ള അറിവും ബുദ്ധിയും എന്നത് ആവശ്യമില്ലാത്ത ഒന്നായി മാറുന്നു.
എന്‍ട്രന്‍സ് പരീക്ഷയിലൂടെ കഴിവുള്ളവരെയാണ് തിരഞ്ഞെടുക്കപ്പെടേണ്ടത്. എന്നാല്‍ പ്രവേശനം ലഭിക്കുന്നത് സാമ്പത്തിക കഴിവുള്ളവര്‍ക്ക് മാത്രവും.
പരിഹാരമാര്‍ഗ്ഗം എന്താണ് ?

ചില ആശയങ്ങള്‍ നോക്കാം
1. എന്‍ട്രന്‍സ് പരീക്ഷയുടെ സമയം ഇരട്ടിയോ അതിലധികമോ ആയി വര്‍ദ്ധിപ്പിക്കുക
സമയം കൂടുമ്പോള്‍ 99% മാര്‍ക്ക് യോഗ്യതപരീക്ഷക്ക് ലഭിച്ച ഒരാള്‍ക്ക് വളരെ എളുപ്പം ഉത്തരം കണ്ടെത്താന്‍ കഴിയും. നിലവില്‍ ചോദ്യത്തെ ശരിയായ രീതിയില്‍ സമീപിക്കാനുള്ള സമയം ലഭിക്കുന്നില്ല എന്നതാണ് പ്രശ്നം. ആവശ്യത്തിന് സമയം ലഭിക്കുമ്പോള്‍ എന്‍ട്രന്‍സ്് പരിശീലന കേന്ദ്രങ്ങളില്‍ പോകാത്തവര്‍ക്കും കഴിവുണ്ടെങ്കില്‍ മികച്ച നേട്ടം കൈവരിക്കാനാകും.


2. പ്രവേശനപരീക്ഷയുടെ മാര്‍ക്കിനോടൊപ്പം യോഗ്യതാ പരീക്ഷയില്‍ ലഭിച്ച സ്കോറുകള്‍ കൂടി പരിഗണിക്കണം.
പ്ലസ്റ്റുവിന് മാര്‍ക്ക് ലഭിച്ചിട്ടും അത് പരിഗണിക്കപ്പെടുന്നില്ല എന്ന പ്രശ്നം പരിഹരിക്കാന്‍ ഇതു കൊണ്ട് സാധിക്കും. രണ്ടു വര്‍ഷത്തെ പഠനത്തിന്‍റെ ആകെത്തുകയാണ് പരീക്ഷയുടെ സ്കോര്‍. അത് പരിഗണിക്കപ്പെടുക തന്നെ വേണം.



3. ‍ പ്രവേശനപരീക്ഷക്ക് വരുന്ന ചോദ്യങ്ങളില്‍ പുതിയ പാഠ്യപദ്ധതിയുടെ രീതികള്‍ കൂടി ഉള്‍പ്പെടുത്തണം

പുതിയ പാഠ്യപദ്ധതിയിലെ ആധുനിക പഠന രീതികള്‍ ഉള്‍ക്കൊണ്ടു കൊണ്ട് വളര്‍ന്നു വരുന്ന ഒരു തലമുറക്ക് അതിന്‍റെ പ്രയോഗത്തിനുള്ള സാധ്യത നിഷേധിക്കുവാന്‍ പാടുള്ളതല്ല.

ഈ മൂന്ന് കാര്യങ്ങള്‍ നടത്തിയാല്‍ നിലവിലുള്ള പ്രശ്നങ്ങള്‍ക്ക് ഒരു പരിധി വരെ പരിഹാരമാകും എന്നു തന്നെയാണ് കിഴക്കുനോക്കിയന്ത്രത്തിന്‍റെ അഭിപ്രായം.

Tuesday, September 9, 2008

പതിനെട്ടുതരം ജലം കൊണ്ട് കാപ്പികുടിക്കാം, പിന്നെ കുളിക്കാം..

പതിനെട്ടുതവണ കുളിക്കാം എന്നു പറയുന്ന പരസ്യം നമുക്കറിയാം. പക്ഷേ അതിനേക്കാള്‍ രസകരമാണ് പതിനെട്ടുതരം ജലം കൊണ്ടുണ്ടാക്കിയ കാപ്പികുടിക്കാന്‍. സംശയമുണ്ടെങ്കില്‍ താഴെ..

HTO,DTO,HDO.... പിന്നെ H2O യും

ഏതെങ്കിലും സംഘടനകളുടെ ചുരുക്കെഴുത്താണ് എന്നു തോന്നിയോ? എങ്കില്‍ തെറ്റി. എന്തായാലും H2O നെ മനസ്സിലായിക്കാണും. രസതന്ത്രക്കാരുടെ ഭാഷയിലെ ജലം തന്നെ. HTO,DTO,HDO തുടങ്ങിയവരും H2O ന്‍റെ കൂട്ടുകാരായ വിവിധതരം ജലങ്ങള്‍ തന്നെ!

അല്പം കണ്‍ഫ്യൂഷന്‍ തോന്നിയവര്‍ക്കായി ഒരല്പം കെമിസ്റ്റ്രി. ഹൈഡ്രജന്‍റെ മൂന്ന് ഐസോട്ടോപ്പുകള്‍ - ഹൈഡ്രജന്‍ ( 1H1),ഡ്യൂട്ടീരിയം (1H2 ), ട്രീഷ്യം (1H3) എന്നിവയാണ്. ന്യൂക്ളിയസ്സിലെ ന്യൂട്രോണുകളുടെ എണ്ണത്തില്‍ ചെറിയ വ്യതിയാനം. അത്ര മാത്രം. ഇതു പോലെ ജീവവായുവിലെ പ്രധാന ഘടകമായ ഓക്സിജനും ഉണ്ട് മൂന്ന് ഐസോട്ടോപ്പുകള്‍. ഓക്സിജന്‍ - 16 (O16), ഓക്സിജന്‍ - 17 (O17), ഓക്സിജന്‍ - 18 (O18) എന്നിവര്‍.
രസതന്ത്രമനുസരിച്ച് രണ്ട് ഹൈഡ്രജനും ഒരു ഓക്സിജനും ചേര്‍ന്നാല്‍ ജലമായി. ഐസോട്ടോപ്പാണോ അല്ലയോ എന്നതൊന്നും ജലമുണ്ടാകാന്‍ ഒരു തടസ്സമേയല്ല. ഡ്യൂട്ടീരിയം വാതകവും (ഹൈഡ്രജന്‍ 2) ഓക്സിജനും ഒരുമിച്ച് കത്തിയാലും ജലമുണ്ടാകും. ഭൌതിക സ്വഭാവങ്ങളില്‍ ചില ചെറിയ വ്യതിയാനങ്ങള്‍ ഉണ്ടാകും എന്നു മാത്രം.ഘനജലം എന്ന ഓമനപ്പേരില്‍ വിളിക്കുന്ന ഈ D2O ഇല്ലാതെ പ്രവര്‍ത്തിക്കുക എന്നത് ന്യൂക്ളിയര്‍ റിയാക്ടറുകള്‍ക്ക് ചിന്തിക്കാന്‍ പോലും കഴിയുന്ന കാര്യമല്ല.

D2O പോലെ ട്രീഷ്യവും ഓക്സിജനും ചേര്‍ന്നാലും ജലമുണ്ടാകും. പേര് T2O. മാത്രമോ, ഒരു ഓക്സിജനും ഒരു ഹൈഡ്രജനും ഒരു ഡ്യുട്ടീരിയവും കൂടിച്ചേര്‍ന്നാലോ, HDO എന്ന പുതിയ തരം ജലമായി. ഇങ്ങനെ H2O,D2O,T2O,HDO,HTO,DTO എന്നിങ്ങനെ ആറു തരം ജലം. ഇപ്പോഴും നമ്മള്‍ ഓക്സിജന്‍റെ ഐസോട്ടോപ്പുകളെ പരിഗണിച്ചിട്ടില്ല. അവരെക്കൂടി പരിഗണിച്ചാലോ, H2O16, H2O17, H2O18,D2O16,D2O17,........ എന്നിങ്ങനെ നമുക്ക് കിട്ടുന്നത് 18 തരം ജലം?!!!
ഓരോ ജലവും ഭൊതികസ്വഭാവങ്ങളുടെ കാര്യത്തില്‍ വ്യത്യാസപ്പെട്ടിരിക്കും. സാന്ദ്രത, തിളനില, ഉറയല്‍ നില, താപധാരിത തുടങ്ങിയ കാര്യങ്ങളിലെല്ലാം ഈ വ്യതിയാനം കാണാം. നമുക്കറിയാവുന്ന H2O 0°C ല്‍ ഐസാകുമ്പോള്‍ D2O എന്ന ഘനജലം 3.82°C ല്‍ തന്നെ ഐസായി മാറും. H2O 100°C ല്‍ തിളക്കുമ്പോള്‍ D2O വിന് തിളക്കാന്‍ 101.4°C വേണം. ന്യൂട്രോണുകളുടെ എണ്ണത്തില്‍ വ്യതിയാനമുള്ളതിനാല്‍ ആറ്റോമിക ഭാരവും സാന്ദ്രതയുമെല്ലാം D20 ന് H2O നെ അപേക്ഷിച്ച് കൂടുതലായിരിക്കും. H2O നേക്കാള്‍ 10% സാന്ദ്രത കൂടുതലാണ് D2O ന് . ന്യൂട്രോണുകളുടെ എണ്ണത്തില്‍ ഏറ്റവും കുറവ് നമ്മുടെ പ്രിയപ്പെട്ട H2O(സാധാരണ ജലം) ന് ആണ്. ന്യൂട്രോണുകള്‍ ഏറ്റവും കൂടുതല്‍ T2O18 ന് ആണ്. അതു കൊണ്ടുതന്നെ ഏറ്റവും ഘനത്വം കൂടിയ ജലവും T2O18 തന്നെ. അത്ഭുതങ്ങള്‍ തീര്‍ന്നില്ല. ഐസ് ജലത്തില്‍ പൊന്തിക്കിടക്കും എന്നാണ് സാമാന്യധാരണ. എന്നാല്‍ D2O ഐസ് H20 ജലത്തില്‍ താഴ്ന്നു പോകും!!
ഹൈഡ്രജന്‍റെയും ഓക്സിജന്‍റെയും ഭൂരിഭാഗം ഐസോട്ടോപ്പുകളും പ്രകൃത്യാ തന്നെ ഉള്ളതിനാല്‍ 18 തരം ജലവും പണ്ടു മുതലേ കാണപ്പെടുന്നുണ്ട്. H2O ഒഴിച്ച് ബാക്കിയെല്ലാം നാമമാത്രമാണ് എന്നു മാത്രം. ശാസ്ത്രജ്ഞര്‍ പരീക്ഷണശാലകളില്‍ ഓരോ ജലത്തേയും സ്വതന്ത്രമായിത്തന്നെ നിര്‍മ്മിച്ചിട്ടുണ്ട്. നിര്‍മ്മിക്കുക മാത്രമല്ല നിരവധി ഉപയോഗങ്ങളും അവര്‍ കണ്ടെത്തിക്കഴിഞ്ഞു. D2O ന്‍റെ പ്രധാന ഉപയോഗം ന്യൂക്ളിയര്‍ റിയാക്ടറുകളിലാണ്. അതിവേഗത്തില്‍ പാഞ്ഞുവരുന്ന ന്യൂട്രോണുകളുടെ വേഗത കുറക്കുന്ന മോഡറേറ്റര്‍ ആയി ആണ് ഈ ഘനജലം പ്രയോജനപ്പെടുത്തുന്നത്. വൈദ്യശാസ്ത്രരംഗത്ത് ഉപാപചയപ്രവര്‍ത്തനങ്ങളുടെ പഠനത്തിനായി H2O18 പ്രയോജനപ്പെടുത്തുന്നു. ജലത്തിന്‍റെ സാധ്യതകള്‍ ഓരോ ദിവസവും വര്‍ദ്ധിക്കുകയാണ് എന്ന് സാരം.

സാധാരണ രീതിയില്‍ ഐസോടോപ്പുകള്‍ അടങ്ങിയ സംയുക്തങ്ങള്‍ രാസപരമായ വലിയ വ്യതിയാനങ്ങള്‍ കാണിക്കുന്നില്ല. എന്നാല്‍ ഹൈഡ്രജന്‍റെ കാര്യത്തില്‍ സംഗതികള്‍ ആകെ മാറി മറിയും. അതു കൊണ്ടുതന്നെ മനുഷ്യരിലും മറ്റു ജീവജാലങ്ങളിലും ഓരോ ജലവും എങ്ങിനെ പ്രവര്‍ത്തിക്കുന്നു എന്നറിയാന്‍ ശാസ്ത്രജ്ഞര്‍ക്ക് കൌടുകമുണ്ടായതില്‍ അത്ഭുതമില്ല. ഘനജലത്തില്‍ മത്സ്യങ്ങളെ വളര്‍ത്തിയും മനുഷ്യരെ D2O കുടിപ്പിച്ചുമെല്ലാം അവര്‍ പരീക്ഷണങ്ങള്‍ നടത്തി. ഘനജലം ഹാനികരമാണ് എന്നതായിരുന്നു പരീക്ഷണഫലം.കോശവിഭജനം തടയപ്പെടുന്നതടക്കമുള്ള നിരവധി പ്രത്യേകതകള്‍ അവര്‍ രേഖപ്പെടുത്തുകയുണ്ടായി. തുടര്‍ച്ചയായി രണ്ടാഴ്ചക്കാലം ഘനജലം മാത്രം കുടിച്ചാല്‍ മനുഷ്യനും മരണത്തോട് മല്ലിടേണ്ടിവരും എന്നതാണ് സത്യം. ഏതൊരാളും കുടിക്കുന്ന ജലത്തില്‍ 9 തരം ജലം അടങ്ങിയിട്ടുണ്ടാകും. ട്രീഷ്യം പ്രകൃതിയില്‍ സുലഭമല്ലാത്തതിനാലും വേഗം വിഘടിച്ചു പോകാന്‍ സാധ്യതയുള്ളതിനാലും DTO, HTO, T2O തുടങ്ങിയവ പ്രകൃതിയില്‍ ഏറെ കാണാറില്ല. അവയുടെ സാന്നിദ്ധ്യം പലപ്പോഴും തിരിച്ചറിയാന്‍ കഴിയുന്നതിനേക്കാള്‍ കുറവാണ്. എന്നരുന്നാലും 18 തരം ജലം കാണപ്പെടുന്നതില്‍ തടസ്സമൊന്നുമില്ല.
ഇനി ഒരു കാപ്പിയാകാം. പക്ഷേ ഓരോ കപ്പ് കാപ്പി കുടിക്കുമ്പോഴും ഒന്നോര്‍ക്കുക. ഒരു പക്ഷേ 18 തരം ജലം ചേര്‍ത്തുള്ള കാപ്പിയാകാം നമ്മുടെ കയ്യിലിരിക്കുന്നത്.







Tuesday, September 2, 2008

സൌരയാത്രകളുടെ കാലം വരുന്നു ....


സൌരയാത്രകളുടെ കാലം വരുന്നു....


പര്യവേഷണങ്ങള്‍ കൂടുതല്‍ ആവേശമായത് സമുദ്രയാത്രകളുടെ കാലത്താണ്. ആ സമുദ്രയാത്രകള്‍ നേടിത്തന്ന അറിവുകള്‍ നമ്മുടെ ജീവിതത്തെത്തന്നെ മാറ്റിമറിച്ചിരുന്നു. ഇപ്പോഴിതാ സമുദ്രയാത്രകള്‍ വിട്ട് സൌരയാത്രകളിലേക്ക് . ഗ്രഹാന്തരയാത്രകള്‍ നടത്താന്‍ സൂര്യന്‍റെ പ്രകാശത്തെ പ്രയോജനപ്പെടുത്താന്‍ പോകുന്നു. നാസയണ് ഈ ഉദ്യമവുമായി ആദ്യം മുന്നോട്ട് പോയത്. കഴിഞ്ഞ ആഗസ്റ്റ് 3 ന് ആദ്യ ശ്രമം തന്നെ പരാജയപ്പെട്ടെങ്കിലും അവര്‍ മുന്നോട്ടു തന്നെയാണ്. നാനോ സെയില്‍-ഡി. എന്ന പേരുള്ള ആകാശക്കപ്പല്‍ റോക്കറ്റിന് സംഭവിച്ച തകരാര്‍ കാരണമാണ് പരാജയപ്പെട്ടത്. പക്ഷേ ശാസ്ത്രലോകം പ്രതീക്ഷയില്‍ തന്നെയാണ്. പ്ളാനറ്ററി സൊസേറ്റിയും ഇതേ ആവശ്യം നിറവേറ്റാനുള്ള തയ്യാറെടുപ്പില്‍ മുന്നേറുന്നു. കോസ്മോസ് - 2 എന്ന പേടകത്തിന്‍റെ യാത്ര എന്നാണ് എന്നതു മാത്രം അവര്‍ പുറത്തു വിട്ടിട്ടില്ല.

(നാനോ സെയില്‍-ഡി എന്ന സൌരപ്പായ)

സൂര്യന്‍റെ പ്രകാശം നല്‍കുന്ന മര്‍ദ്ദത്തില്‍ ആകാശയാത്രകള്‍ നിയന്ത്രിക്കുക എന്ന സ്വപ്നമാണ് പൂവണിയാന്‍ പോകുന്നത്. വളരെക്കാലം മുന്‍പു തന്നെ സൂര്യപ്രകാശത്തിന്‍റെ മര്‍ദ്ദത്തെക്കുറിച്ച് ശ്രദ്ധിച്ചിരുന്നു. വാല്‍നക്ഷത്രങ്ങളുടെ വാല്‍ എല്ലായ്പ്പോഴും സൂര്യനില്‍ നിന്നും എതിര്‍ വശത്തേക്കാണെന്നത് ജോഹനാസ് കെപ്ളറും മറ്റും നിരീക്ഷിച്ചിരുന്നു. എന്നാല്‍ ഇവിടെ വാല്‍ ഒരു വശത്തേക്ക് നീളുവാനുള്ള കാരണം സൌരക്കാറ്റുമായി ബന്ധപ്പെട്ടതായിരുന്നു. പ്രകാശം ഒരു വസ്തുവില്‍ തട്ടി പ്രതിഫലിക്കുന്ന സമയത്ത് അത് വസ്തുവില്‍ വളരെ ചെറിയ ഒരു മര്‍ദ്ദം പ്രയോഗിക്കുന്നുണ്ട് എന്ന് ജയിംസ് ക്ളാര്‍ക്ക് മാക്സ് വെല്‍ കണ്ടെത്തിയതായിരുന്നു വഴിത്തിരിവ്. ഇതോടെ സൌരയാത്രകള്‍ക്ക് സൂര്യപ്രകാശത്തിന്‍റെ മര്‍ദ്ദം ഉപയോഗിക്കാം എന്ന സ്വപ്നങ്ങള്‍ക്ക് ചിറകുമുളച്ചു. 1960 ല്‍ എക്കോ-1 എന്ന പേടകം ഇത് തെളിയിക്കുകയും ചെയ്തു. 1974 ല്‍ വഴിതെറ്റി നീങ്ങിയ മാരിനര്‍ -10 എന്ന ബുധ പര്യവേഷണ പേടകം സോളാര്‍ പാനലുകള്‍ ചരിച്ചുവച്ച് സൂര്യപ്രകാശത്തിന്‍റെ മര്‍ദ്ദം ഉപയോഗിച്ച് പൂര്‍വ്വസ്ഥിതിയിലാക്കാന്‍ ശാസ്ത്രജ്ഞര്‍ക്ക് സാധിച്ചു. കാറ്റിനെ പ്രയോജനപ്പെടുത്തുന്ന പായക്കപ്പല്‍ പോലെ സോളാര്‍ പാനലുകള്‍ വിടര്‍ത്തിയ മാരിനര്‍ 10 ശാസ്ത്രജ്ഞര്‍ക്ക് ആഹ്ളാദം പകര്‍ന്നു കൊണ്ട് ആദ്യ സൌരയാത്രനടത്തിയ പര്യവേഷണ പേടകമായി മാറി.

ഇന്ത്യയും ഇക്കാര്യത്തില്‍ ഒരു ചെറിയ കാര്യം ചെയ്തിട്ടുണ്ട്. INSAT 2A,INSAT 3A എന്നീ സാറ്റ്ലൈറ്റുകളില്‍ ഒരു സൌരപായ പിടിപ്പിക്കുകയുണ്ടായി. ഒരു വശത്ത് പിടിപ്പിച്ചിരിക്കുന്ന സോളാര്‍ പാനലുകളില്‍ സൂര്യപ്രകാശം ഏല്‍പ്പിക്കുന്ന ബലം തുലനം ചെയ്യാനായിരുന്നു ഒരു സൌരപായ അതിന്‍റെ എതിര്‍വശത്ത് പിടിപ്പിച്ചത്. സൂര്യപ്രകാശത്തെ പ്രതിഫലിപ്പിക്കുന്ന ഒരു പാളിയാണ് സൌരപായയായി ഉപയോഗിക്കുന്നത്. കനം വളരെക്കുറഞ്ഞ നിറയെ സൂഷ്മസുഷിരങ്ങളുള്ള അലൂമിനിയം സൌരപായ. സുഷിരങ്ങളുടെ വലിപ്പം പ്രകാശത്തിന്‍റെ തരംഗദൈര്‍ഘ്യത്തേക്കാളും കുറവാണ്. ഇതിലും നല്ല പാളികള്‍ കണ്ടെത്താനുള്ള ഗവേഷണങ്ങള്‍ തകൃതിയായി നടക്കുന്നുണ്ട്.

Tuesday, August 26, 2008

ഒരു കുട്ടിയെ സര്‍പ്പം കൊത്തുന്ന കാഴ്ച സത്യമോ മിഥ്യയോ?

മതത്തിന്‍റെ പേരിലെ മറ്റൊരു കിരാതത്വം എന്ന പേരില്‍ യുറ്റ്യൂബില്‍ വന്ന ഒരു വീഡിയോ ആണിത്. എന്തിന്‍റെ പേരിലായാലും ഇത് ക്രൂരതയാണ്. എന്താണ് ഇതിന്‍റെ സത്യാവസ്ഥ എന്നറിയാവുന്നവര്‍ അറിയിക്കുക.


Saturday, August 23, 2008

വൃശ്ചികം വരുത്തുന്ന കുഴപ്പങ്ങള്‍

വൃശ്ചികം നക്ഷത്രഗണത്തെക്കുറിച്ച് ആകാശക്കാഴ്ചകള്‍ എന്ന ബ്ളോഗില്‍ ഒരു പോസ്റ്റ് ഇട്ടിരുന്നു. ഇനി വൃശ്ചികത്തിന് (തേള്‍) ഇഷ്ടപ്പെടാത്തതു കൊണ്ടാണോ (ജ്യോതിഷത്തിന്‍റെ ഓരോരോ കുഴപ്പങ്ങളേ, വിവരസാങ്കേതിക വിദ്യയെപ്പോലും ആക്രമിക്കുന്നു!!!)എന്നറിയില്ല. അഗ്രഗേറ്ററില്‍ കാണിക്കുന്നില്ല. ഈ മാസം നക്ഷത്ര നിരീക്ഷകര്‍ക്ക് കണ്ടെത്താന്‍ ഏറ്റവും എളുപ്പമുള്ള നക്ഷത്രഗണമാണിത്.
കൂടുതല്‍ വിവരങ്ങള്‍ ഇവിടെ
http://www.mystarwatching.blogspot.com

Tuesday, August 19, 2008

മറന്നു പോയ ചന്ദ്രഗ്രഹണം വീണ്ടും കണ്ടപ്പോള്‍..


കാണാന്‍ കഴിയാതെ പോയ ചന്ദ്രഗ്രഹണം


ഇക്കഴിഞ്ഞ 16 ന് ചന്ദ്രഗ്രഹണം അരങ്ങേറിയിരുന്നു. വളരെ അപൂര്‍വ്വമായ ഒരു കാഴ്ചയൊന്നുമല്ല ചന്ദ്രഗ്രഹണം. എന്നാലും ചന്ദ്രനില്‍ ഭൂമിയുടെ നിഴല്‍ പതിക്കുമ്പോള്‍ കാണുന്ന കാഴ്ച രസകരം തന്നെ. ചന്ദ്രഗ്രഹണം ഉണ്ടെന്ന കാര്യം സത്യത്തില്‍ മറന്നു പോയിരുന്നു. അല്ലായിരുന്നെങ്കില്‍ ഈ പോസ്റ്റ് നേരത്തേ ഇടാമായിരുന്നു. എന്തായാലും കേരളത്തില്‍ അന്ന് മഴയായതിനാല്‍ ഈ കാഴ്ച നേരിട്ട് കാണാന്‍ കഴിയുമായിരുന്നില്ല. പക്ഷേ നമ്മുടെ സാങ്കേതിക വിദ്യകള്‍ വളര്‍ന്നു കഴിഞ്ഞു. ചന്ദ്രഗ്രഹണം നമുക്ക് ചിത്രീകരിക്കാം, സ്റ്റെല്ലേറിയം എന്ന സ്വതന്ത്ര സോഫ്റ്റ് വെയര്‍ ഉപയോഗിച്ച്. ആ കാഴ്ചകള്‍ നിങ്ങള്‍ക്കായിക്കൂടി പങ്കു വയ്ക്കുന്നു.

(ഗ്രഹണം ആരംഭിക്കുന്നു)
1.10 AM



( ഭൂമിയുടെ നിഴല്‍ പതിച്ചു തുടങ്ങുന്നു )
1.23 AM



( പകുതി ഭാഗവും നിഴലില്‍ )
1.56 AM



( പരമാവധി ഗ്രഹണം )
2.34 AM



( നിഴലില്‍ നിന്നും പുറത്തേക്ക് )
2.59 AM



( പകുതിയിലധികം പുറത്തു കടന്നു )
3.26 AM



( ഗ്രഹണം അവസാനഘട്ടത്തിലേക്ക് )
3.43 AM



( ഗ്രഹണം പൂര്‍ത്തിയാകുന്നു.. )
4.12 AM



(ചിത്രങ്ങളില്‍ അമര്‍ത്തിയാല്‍ വലുതായിക്കാണാം. മുകളില്‍ നല്‍കിയിരിക്കുന്ന ചിത്രങ്ങള്‍ ആര്‍ക്കു വേണമെങ്കിലും തികച്ചും സൌജന്യമായും സ്വതന്ത്രമായും ഉപയോഗിക്കാവുന്നതാണ്.)



Friday, August 15, 2008

പ്ളാസ്റ്റിക്ക് സ്വാതന്ത്ര്യദിനാഘോഷങ്ങള്‍ വേണ്ട

സ്വാതന്ത്ര്യം ഹനിക്കുന്ന സ്വാതന്ത്ര്യദിനാഘോഷങ്ങള്‍.

ഭാരതത്തിന് സ്വാതന്ത്ര്യം ലഭിച്ചിട്ട് 61 വര്‍ഷം തികയുന്നു. ബ്രിട്ടീഷുകാരുടെ അടിമത്വത്തില്‍ നിന്നുള്ള മോചനം. ആ സ്വാതന്ത്ര്യത്തിനു വേണ്ടി ഒറ്റ മനസ്സായി പ്രയത്നിച്ച ജനത. അവരുടെ ആത്മവിശ്വാസമായിരുന്നു ഭാരതം എന്ന ഏറ്റവും വലിയ ജനാധിപത്യ രാഷ്ട്രത്തിന്‍റെ പിറവി.
നാം ഇന്നും അതാഘോഷിക്കുന്നു. സന്തോഷം പങ്കിടുന്നു. ത്രിവര്‍ണ്ണ പതാകകള്‍ രാജ്യത്തെ മുഴുവന്‍ അലങ്കരിക്കുന്നു.

പക്ഷേ മനസ്സിന് ഒട്ടേറെ സന്തോഷം നല്‍കുന്ന ഈ ആഘോഷങ്ങള്‍ പിന്നീട് നമുക്കാപത്താകരുത്. നാം നേടിയ സ്വാതന്ത്ര്യം വിവേകരഹിതമായ ആഘോഷങ്ങള്‍ കൊണ്ട് ഇല്ലാതാവരുത്. നാടെങ്ങും ദേശീയ പതാകകളും തോരണങ്ങളും ലഭിക്കും. പണ്ടെല്ലാം തുണിയില്‍ നിര്‍മ്മിച്ച തോരണങ്ങളും പതാകകളും നാട്ടിലെല്ലാം ഉയര്‍ന്നു നിന്നിരുന്നു. അവയെ അടുത്ത വര്‍ഷത്തേക്കായി സൂക്ഷിക്കാനും ആര്‍ക്കും മടിയുമില്ലായിരുന്നു. എന്നാല്‍ ഇപ്പോള്‍ കുറെ വര്‍ഷങ്ങളായി നാം ഉപയോഗിക്കുന്ന പതാകകളും തോരണങ്ങളും എല്ലാം പ്ളാസ്റ്റിക്ക് നിര്‍മ്മിതമാണ്. പോളിത്തീന്‍ നിര്‍മ്മിതമായ ഇത്തരം പതാകകള്‍ നാടെങ്ങും നിറയുന്നു, നാം സന്തോഷിക്കുന്നു. പക്ഷേ അവ വരുത്തി വയ്ക്കുന്ന വിപത്തുകള്‍, പരിസ്ഥിതിയില്‍ അവയേല്‍പ്പിക്കുന്ന ആഘാതങ്ങള്‍, ഇവയൊന്നും നമ്മുടെ ചിന്തയിലില്ല. പതാകകള്‍ ഇന്നൊരു ബിസിനസ്സാണ്. ലക്ഷങ്ങള്‍ മറിയുന്ന ബിസിനസ്സ്. പ്ളാസ്റ്റിക്ക് പതാകകള്‍ നിര്‍മ്മാണമാരംഭിക്കുന്നത് ജനുവരിയോടെയാണത്രേ. പലയാളുകള്‍ കൈമറിഞ്ഞ് ആഗസ്റ്റ് ആദ്യവാരം കഴിയുമ്പോഴേക്കും അവ വിപണിയിലെത്തുന്നു. തുണിയോ കടലാസോ കൊണ്ട് ഒരു പതാകയോ തോരണമോ ഉണ്ടാക്കാന്‍ മിനക്കെടാതെ നാം അത് മേടിച്ചു കൂട്ടുന്നു. ആഘോഷങ്ങള്‍ക്ക് ശേഷം ആ ത്രിവര്‍ണ്ണ പതാകകള്‍ വഴിയിലുപേക്ഷിക്കുന്നു.
സ്വാതന്ത്ര്യം എന്നത് ബ്രിട്ടീഷുകാരില്‍ നിന്നുമുള്ള മോചനം മാത്രമല്ല, ശുദ്ധവായു ലഭിക്കാനും മലിനീകരണമില്ലാത്ത പരിതസ്ഥിതികളില്‍ ജീവിക്കാനുള്ള സ്വാതന്ത്ര്യം കൂടിയാണ്. പ്രകൃതിയിലെ ഓരോ ജീവജാലങ്ങളുടേയും സ്വാതന്ത്ര്യം കാത്തു സൂക്ഷിക്കേണ്ട കടമ നമുക്കോരോരുത്തര്‍ക്കുമുണ്ട്. ഈ ഭൂമിയെ അടുത്ത തലമുറക്കായി ജീവിക്കുവാനുള്ള സ്വാതന്ത്ര്യം നിലനിര്‍ത്തി കൈമാറുവാനുള്ള കടമ നാം നിര്‍വ്വഹിക്കണം.

അതേ നാം നമ്മുടെ സ്വാതന്ത്ര്യത്തെ, മറ്റുള്ളവരുടെ സ്വാതന്ത്ര്യത്തെ, ഭാവി തലമുറയുടെ സ്വാതന്ത്ര്യത്തെ നശിപ്പിക്കരുത്. ഗാന്ധിജി വിദേശവസ്ത്രങ്ങള്‍ ബഹിഷ്കരിച്ചത് സ്വാതന്ത്ര്യത്തിന്‍റെ വില മനസ്സിലാക്കിയ വലിയൊരു ആശയത്തിന്‍റെ പുറത്തായിരുന്നു. പ്ളാസ്റ്റിക്ക് പതാകകള്‍ സൃഷ്ടിക്കുന്നത് വീണ്ടും ഒരു ബഹിഷ്കരണ സമരത്തിന് ആവശ്യകതയാണ്. വരും തലമുറകളുടെ സ്വാതന്ത്ര്യം ഉറപ്പു വരുത്താന്‍ വേണ്ടിയുള്ള മറ്റൊരു ഗാന്ധിയന്‍ സമരമാര്‍ഗ്ഗം. അതിനായി നമുക്കുപേക്ഷിക്കാം പ്ളാസ്റ്റിക്ക് പതാകകളുടേയും തോരണങ്ങളുടേയും ആഘോഷങ്ങള്‍. പകരം നമുക്ക് തിരിച്ചെത്തിക്കാം കടലാസുകളുടേയും തുണിയുടേയും ആഘോഷങ്ങള്‍. പ്രതീക്ഷക്ക് വകയുണ്ട്. കാരണം ആ കാഴ്ചകള്‍ കണ്ടുതുടങ്ങിയിരിക്കുന്നു. കഴിഞ്ഞവര്‍ഷത്തേക്കാള്‍ ഈ വര്‍ഷം തുണിയും കടലാസും തോരണങ്ങളും പതാകകളുമായി തിരിച്ചെത്തിയിരിക്കുന്നു. പക്ഷേ ഭൂരിഭാഗവും ഇപ്പോഴും പ്ളാസ്റ്റിക്കുകള്‍ തന്നെ.

അടുത്ത വര്‍ഷങ്ങളില്‍ നമുക്കുയര്‍ത്തണം സ്വാതന്ത്ര്യത്തിന്‍റെ പതാകകള്‍. കാരണം "മറ്റുള്ളവരുടെ സ്വാതന്ത്ര്യം കാത്തു സൂക്ഷിക്കലാണ് നമുക്ക് നല്‍കാനാവുന്ന ഏറ്റവും വലിയ സ്വാതന്ത്ര്യദിന സന്ദേശം".

Thursday, August 7, 2008

തമോഗര്‍ത്തങ്ങളും ദൈവവും മനുഷ്യരെ പേടിപ്പിക്കുന്നു

തമോഗര്‍ത്തങ്ങളെ പേടിക്കേണ്ട..

തമോഗര്‍ത്തങ്ങള്‍ അഥവാ ബ്ളാക്ക് ഹോളുകള്‍ ശാസ്ത്രലോകത്തുമാത്രമല്ല, ശാസ്ത്രകല്പിതകഥകളിലും സ്ഥാനം പിടിച്ചിട്ടുള്ള ഒന്നാണ്. എല്ലാത്തിനേയും വിഴുങ്ങുന്ന ഭീകരതയായാണ് അതിനെ എല്ലാ കഥകളിലും ചിത്രീകരിച്ചിരുന്നത്. European Center for Nuclear Research (CERN) ല്‍ നിര്‍മ്മിക്കപ്പെടുന്ന Large Hadron Collider (LHC) എന്ന കണികാത്വരിത്രം (
Particle Accelerator) ഈയടുത്തകാലത്ത് സജീവചര്‍ച്ചാവിഷയമായത് തമോഗര്‍ത്തവുമായി ബന്ധപ്പെടുത്തിയായിരുന്നു. ചാര്‍ജുള്ള കണങ്ങളായ പ്രോട്ടോണുകളേയും മറ്റും ത്വരണത്തിന്( Acceleration ) വിധേയമാക്കി ഉന്നത ഊര്‍ജ്ജമുള്ള കണികകളെ സൃഷ്ടിക്കാന്‍ കഴിവുള്ള ത്വരിത്രമാണ് LHC. ഇത്തരം ഊര്‍ജ്ജകണങ്ങള്‍ സൂഷ്മമായ തമോദ്വാരങ്ങളെ (BlackHoles) സൃഷ്ടിക്കും എന്ന അഭിപ്രായമായിരുന്നു ചര്‍ച്ചാവിഷയമായത്. ചെറിയ ഈ തമോദ്വാരങ്ങള്‍ ചുറ്റുമുള്ള ദ്രവ്യത്തെ ആകര്‍ഷിക്കുകയും തമോദ്വാരം പതിയെ വലുതായി വരികയും ഭൂമിയുടെ തന്നെ നിലനില്‍പ്പിന് ഭീഷണിയാവുകയും ചെയ്യും എന്നായിരുന്നു വാദം. ശാസ്ത്രകല്പിത കഥകള്‍ രചിക്കുന്നവര്‍ക്ക് തങ്ങളുടെ പുതിയ സൃഷ്ടികള്‍ക്ക് കൊഴുപ്പേകാന്‍ ഇത് ധാരാളം മതിയായിരുന്നു.

ഈ വാദങ്ങളുടെ പിന്‍ബലത്തിലാണ് ഹവായിലെ കോടതിയില്‍ രണ്ടു പേര്‍ ചേര്‍ന്ന് ഒരു ഹര്‍ജ്ജി കൊടുത്തിരുന്നു. ഭൂനിയുടെ നിലനില്‍പ്പിനെത്തന്നെ ബാധിക്കുന്ന LHC യുടെ പണി നിര്‍ത്തിവയ്ക്കണം എന്നതായിരുന്നു ആവശ്യം!! വാദം കോടതി സ്വീകരിച്ചതോടെ LHC യുടെ സുരക്ഷ ബോധ്യപ്പെടുത്തേണ്ട ചുമതല ശാസ്ത്രജ്ഞര്‍ക്കായി. ഇതില്‍ ശാസ്ത്രലോകത്തിന് ആശ്വാസമായ കണ്ടെത്തല്‍ നടത്തിയത് സ്റ്റീവ് ഗിഡ്ഡിംഗ്സ് എന്ന വ്യക്തിയായിരുന്നു. സാന്‍റാ ബാര്‍ബറയിലുള്ള കാലിഫോര്‍ണ്ണിയ യൂണിവേഴ്സിറ്റിയിലെ പ്രൊഫസ്സറാണ് ഗിഡ്ഡിംഗ്സ്. സേണിലെ(CERN) മൈക്കലാന്‍ജലോ മംഗാനയുമായിച്ചേര്‍ന്ന് നടത്തിയ പഠനങ്ങള്‍ ശാസ്ത്രലോകത്തിന് അനുകൂലമായ വിധിയെഴുത്താണ് നടത്തിയത്. പഠനഫലം രസകരമായിരുന്നു. അതിസൂഷ്മ തമോഗര്‍ത്തങ്ങള്‍ വേണമെങ്കില്‍ സൃഷ്ടിക്കപ്പെടാം, എന്നാല്‍ അവയുടെ ജീവിതകാലം ശാസ്ത്രലോകത്തിന് ചിന്തിക്കാന്‍ കഴിയുന്നതിനേക്കാള്‍ കുറഞ്ഞ സമയത്തേക്കാണ്. ("about a nano-nano-nano second" എന്നാണ് ഗിഡ്ഡിംഗ്സ് ഇതിനെക്കുറിച്ച് പറഞ്ഞത്.) ഈ സമയത്തിനുള്ളില്‍ തമോഗര്‍ത്തത്തിന് ഒന്നും ചെയ്യാന്‍ കഴിയില്ലെന്നും അവര്‍ സമര്‍ത്ഥിച്ചു. ഈ സമയത്തിനുള്ളില്‍ തമോഗര്‍ത്ത വികിരണം എന്ന പ്രതിഭാസത്തിലൂടെ തമോഗര്‍ത്തം ബാഷ്പീകരിച്ച് പോകും. ( ബ്ളാക്ക് ഹോള്‍ റേഡിയേഷന്‍ എന്ന ഈ പ്രതിഭാസത്തെക്കുറിച്ച് സ്റ്റീഫന്‍ ഹോക്കിംഗ് പറഞ്ഞപ്പോഴുള്ള വിവാദങ്ങള്‍ ഓര്‍ത്തു നോക്കുക.)

ഈ കണികാത്വരിത്രം (Particle Accelerator) ഇന്നു മുതല്‍ ശാസ്ത്രലോകത്തേക്ക് പരീക്ഷണങ്ങളുടെ പെരുമഴയുമായി ഇറങ്ങുകയാണ്. ശാസ്ത്രലോകം കാത്തിരിക്കുകയാണ് നിരവധി നിഗമനങ്ങളുടെ പരീക്ഷണത്തെളിവിനായി. സമയത്തിന്‍റെ തുടക്കത്തിലേക്ക് പ്രോട്ടോണുകള്‍ നാളെ മുതല്‍ അന്വേഷണമാരംഭിക്കും. നിരവധി ലക്ഷ്യങ്ങളാണ് ഈ അന്തര്‍ദേശീയ ഉപകരണത്തിന് നേടിത്തരുവാനുള്ളത്.

ഫ്രാന്‍സിനും സിസ്വര്‍ലണ്ടിനും ഇടയില്‍ ജനീവക്കടുത്തായി ഭൂമിക്കടിയില്‍ ഏതാണ്ട് 100 മീറ്ററോളം ആഴത്തിലായാണ് ലോകത്തെ ഏറ്റവും വലിയ ഈ കണികാത്വരിത്രം സ്ഥാപിച്ചിരിക്കുന്നത്. 27 കിലോമീറ്റര്‍ ആണ് LHC യുടെ ചുറ്റളവ്. 3.8 മീറ്റര്‍ വ്യാസമുള്ള തുരങ്കമാണ് ഭൂമിക്കടിയില്‍ ഉള്ളത്. ഇതില്‍ ചെറിയ രണ്ട് കുഴലുകള്‍ കൂടി ഉള്‍പ്പെടുത്തിയിട്ടുണ്ട്. പ്രോട്ടോണുകള്‍ സഞ്ചരിക്കുന്നത് ഈ കുഴലിലൂടെയായിരിക്കും. എതിര്‍ ദിശകളിലാണ് സഞ്ചാരം എന്നു മാത്രം. പ്രോട്ടോണുകളുടെ പാത നിയന്ത്രിക്കാനായി 1200 ലധികം ശക്തിയേറിയ വൈദ്യുത കാന്തങ്ങള്‍ (Electro Magnet) ഉപയോഗിക്കുന്നുണ്ട്. പ്രോട്ടോണുകളെ ലക്ഷ്യസ്ഥാനത്ത് ഫോക്കസ് ചെയ്യിക്കാനായി 400 ഓളം മറ്റ് കാന്തങ്ങളും ഉപയോഗിക്കുന്നുണ്ട്. 1600 ഓളം അതിചാലക കാന്തങ്ങളാണ് (Super Conducting Magnets ) ആകെ ഉപയോഗിച്ചിരിക്കുന്നത്. 27 ടണ്ണിലധികം ഭാരമുള്ളവയാണ് ഈ കാന്തങ്ങള്‍ എന്നതാണ് അത്ഭുതപ്പടുത്തുന്ന കാര്യം. അതിചാലക കാന്തങ്ങള്‍ പ്രവര്‍ത്തിക്കണമെങ്കില്‍ വളരെയധികം താഴ്ന്ന താപനില ആവശ്യമുണ്ട്. ഏതാണ്ട് 100 ടണ്ണോളം ദ്രാവക ഹീലിയമാണ് ഇതിനായി ഉപയോഗിച്ചിരിക്കുന്നത്. ലോകത്തെ ഏറ്റവും വലിയ ദ്രാവക ഹീലിയം സംഭരണി ഉള്ളതും ഇവിടെത്തന്നെയാണ്.

പ്രധാന ത്വരിത്രമായ എല്‍.എച്ച്.സി. യെക്കൂടാതെ നിരവധി ചെറിയ ത്വരിത്രങ്ങളും ഇവിടെയുണ്ട്. പ്രോട്ടോണിനെ നേരിട്ട് പ്രധാന ത്വരിത്രത്തിലേക്ക് കടത്തിവിടുന്നതിനു മുന്‍പ് ഈ ത്വരിത്രങ്ങളില്‍ കൂടിയെല്ലാം കടത്തിവിടും. രേഖീയ ത്വരിത്രമായ (linear accelerator ) ലിനാക് -2 ല്‍ വച്ച് ആണ് പ്രോട്ടോണ്‍ യാത്ര തുടങ്ങുന്നത്. ഉള്ളില്‍ നിക്ഷേപിക്കപ്പെടുന്ന ഊര്‍ജ്ജം കുറഞ്ഞ പ്രോട്ടോണുകള്‍ വൈദ്യുതമണ്ഡലത്തിന്‍റെ സാന്നിദ്ധ്യത്തില്‍ പതിയേ വേഗമാര്‍ജ്ജിക്കുകയും ഊര്‍ജ്ജം നേടി വരുകയും ചെയ്യും. ഇതില്‍ നിന്നും പുറത്തു വരുന്ന 50MeV ഊര്‍ജ്ജമുള്ള പ്രോട്ടോണിനെ "പ്രോട്ടോണ്‍ സിങ്ക്റോട്രോണ്‍ ബൂസ്റ്റര്‍ " (PSC) എന്ന ത്വരിത്രത്തിലേക്കാണ് കടന്നു ചെല്ലുന്നത്. 1.4GeV ഊര്‍ജ്ജം ഇവിടെ നിന്നും നേടി പ്രോട്ടോണ്‍ സിങ്ക്രോട്രോണിലേക്കും (PS) തുടര്‍ന്നു കിട്ടുന്ന 26GeV ഊര്‍ജ്ജവുമായി സൂപ്പര്‍ പ്രോട്ടോണ്‍ സിങ്ക്രോട്രോണിലേക്കുമാണ് പ്രോട്ടോണ്‍ സഞ്ചരിക്കുന്നത്. ഇവിടെ നിന്നും ലഭിക്കുന്ന 450GeV ഊര്‍ജ്ജവുമായാണ് LHC യിലേക്കുള്ള പ്രയാണം ആരംഭിക്കുന്നത്. കാന്തികമണ്ഡലത്തിന്‍റെയും വൈദ്യുതമണ്ഡലത്തിന്‍റയും സാന്നിദ്ധ്യത്തില്‍ കൂടുതല്‍ ഊര്‍ജ്ജം നേടിയ ഈ പ്രോട്ടോണുകള്‍ക്ക് ഒരു സെക്കന്‍റു കൊണ്ട് 10000 തവണയിലധികം LHC യെ ചുറ്റിവരാന്‍ സാധിക്കും ഈ 27 കിലോമീറ്റര്‍ പാതയിലൂടെ പലതവണ കറങ്ങിയെത്തുന്നതോടെ അത്യധികം ഊര്‍ജ്ജമുള്ള കണമായി പ്രോട്ടോണ്‍ മാറും. പ്രകാശത്തിന്‍റെ വേഗതയോടടുത്ത വേഗങ്ങളില്‍ സഞ്ചരിക്കാന്‍ വരെ പ്രോട്ടോണുകള്‍ക്ക് കഴിയും എന്നാണ് പ്രതീക്ഷ. ഈ ഊര്‍ജ്ജ പ്രോട്ടോണ്‍ വന്നിടിക്കുന്ന വസ്തുക്കളുടെ ഘടന പൂര്‍ണ്ണമായും മാറ്റപ്പെടും. ചുറ്റലുകള്‍ക്ക് ശേഷം 7TeV ഊര്‍ജ്ജമാണ് കണത്തിന് ലഭിക്കുന്നത്. ഇരു വശത്തുനിന്നും പ്രോട്ടോണുകള്‍ ത്വരിപ്പിക്കാം എന്നതിനാല്‍ പ്രോട്ടോണുകള്‍ തമ്മില്‍ കൂട്ടിയിടിക്കുമ്പോള്‍ പുറത്തുവരുന്നത് 14TeV ഊര്‍ജ്ജമാണ്. ഈയം അയോണുകളേയും (Lead Ion) ത്വരിപ്പിക്കാന്‍ എല്‍.എച്ച്.സി ക്ക് ആകും. 1150TeV ഊര്‍ജ്ജം വരെ ഇതിന് ലഭിക്കും. എന്നാല്‍ ഇത്തരം അയോണുകളില്‍ നിരവധി പ്രോട്ടോണുകള്‍ ഉള്ളതിനാല്‍ ഒരു പ്രോട്ടോണിന് ലഭിക്കുന്ന ഊര്‍ജ്ജം 2.76 TeV മാത്രമായിരിക്കും.

പ്രോട്ടോണുകള്‍ ലോകമെമ്പാടുമുള്ള മാധ്യമ ലേഖകര്‍ക്കായി ഇന്ന് കറങ്ങാന്‍ തുടങ്ങും. ഇപ്പോള്‍ ഒരു വശത്തേക്ക് മാത്രമാണ് പ്രോട്ടോണുകളുടെ സഞ്ചാരം. ഇരു വശത്തേക്കും പ്രോട്ടോണുകള്‍ സഞ്ചരിക്കാന്‍ കഴിയുന്ന രീതിയില്‍ എല്‍.എച്ച്.സി. യെ തയ്യാറാക്കാനുള്ള ശ്രമത്തിലാണ് ശാസ്ത്രജ്ഞര്‍. ഈ വര്‍ഷം അവസാനമാകുമ്പോഴേക്കും ഏതാണ്ട് പൂര്‍ണ്ണമായ രീതിയില്‍ പ്രവര്‍ത്തന സജ്ജമാകാന്‍ കഴിയും എന്നാണ് ശാസ്ത്രജ്ഞരുടെ പ്രതീക്ഷ. പ്രപഞ്ചപരിണാമത്തിലെ ആദ്യ നിമിഷങ്ങളുടെ ഒരു ചെറിയ മാതൃക പുനസൃഷ്ടിക്കാനുള്ള ശ്രമമാണ് അതിനുശേഷമുള്ള പരീക്ഷണങ്ങള്‍. പ്രകാശത്തിനോടടുത്ത വേഗതകളില്‍ എതിര്‍ദിശകളില്‍ സഞ്ചരിക്കുന്ന പ്രോട്ടോണുകളെ തമ്മില്‍ ഇടിപ്പിക്കാനാണ് ശ്രമം. കൂട്ടിയിടി മൂലമുണ്ടാകുന്ന ഉന്നത ഊര്‍ജ്ജം, അവിടെ സൃഷ്ടിക്കപ്പെടുന്ന കണങ്ങള്‍ ഇതെല്ലാം പഠനവിഷയമാണ്. മഹാഏകീകൃത സിദ്ധാന്തം (grand unified theory) പരിശോധിക്കാനും അതിന്‍റെ ലക്ഷ്യത്തിലേക്കായി കൂടുതല്‍ സംഭാവനകള്‍ ചെയ്യാനും എല്‍.എച്ച്.സി ക്ക് കഴിയും എന്നാണ് പ്രതീക്ഷ. ഇതിന്‍റെ പ്രധാന ലക്ഷ്യവും ഇതു തന്നെയാണ്. സ്റ്റാന്‍ഡേര്‍ഡ് മാതൃക എന്ന സൂഷ്മകണങ്ങളെക്കുറിച്ചുള്ള സിദ്ധാന്തം പരിശോധിക്കപ്പെടും. ഇതില്‍ പറഞ്ഞിരിക്കുന്ന ഹിഗ്സ് ബോസോണിന്‍റെ പ്രത്യേകതകള്‍ തെളിയിക്കാനുള്ള അവസരമാണിത്. ക്വാര്‍ക്കുകള്‍ എന്ന അതി സൂഷ്മകണങ്ങളുടെ ദ്രവ്യമാനം കൂടുതല്‍ സൂഷ്മതയോടെ അളക്കല്‍, സൂപ്പര്‍ സ്ട്രിങ്ങ് തിയറിയുടെ സാധുത പരിശോധിക്കല്‍, ഇരുണ്ട ദ്രവ്യത്തിന്‍റെയും ഇരുണ്ട ഊര്‍ജ്ജത്തിന്‍റെയും പ്രത്യേകതകള്‍ തുടങ്ങി ഗുരുത്വാകര്‍ഷണം പ്രപഞ്ചത്തിലെ മറ്റ് അടിസ്ഥാന ബലങ്ങളേക്കാല്‍ വളരെയധികം ദുര്‍ബലമാകാനുള്ള കാരണം വരെ കണ്ടെത്താന്‍ എല്‍.എച്ച്.സി യില്‍ ഇനി നടക്കുന്ന പരീക്ഷണങ്ങള്‍ക്ക് സാധിക്കും.


'ദൈവത്തിന്‍റെ കണങ്ങള്‍' എന്ന് ശാസ്ത്രജ്ഞര്‍ പേരിട്ടുവിളിക്കുന്ന ഹിഗ്സ് ബോസോണിന്‍റെ അസ്ഥിത്വം തെളിയിക്കാനുള്ള അവസരമാണ് ശാസ്ത്രജ്ഞര്‍ക്ക് വീണുകിട്ടുന്നത്. സൈന്ധാന്തികമായി തെളിയിക്കപ്പെട്ടിട്ടുണ്ടെങ്കിലും പരീക്ഷണശാലയില്‍ ഇതു വരെ ഈ കണം പിടി കൊടുത്തിട്ടില്ല. ഉന്നത ഊര്‍ജ്ജമുള്ള അവസ്ഥകളില്‍ മാത്രമേ ഇത്തരം ഒരു കണത്തിന് നിലനില്‍ക്കാനാകൂ. വളരെ നിമിഷമാത്രമായ ആയുസ്സുള്ള ഈ കണത്തിന് ഇനി പിടി തരാതെ നടക്കാന്‍ കഴിയില്ല. ദൈവത്തേയും മനുഷ്യര്‍ കീഴടക്കാന്‍ പോകുന്നു എന്ന് സാരം.





NB: ലേഖനം പൂര്‍ണ്ണമല്ല. തിരുത്തലുകള്‍ പിന്നീട് നടത്തുന്നതാണ്.