Thursday, January 15, 2009

സ്വതന്ത്രസോഫ്റ്റ്‌വെയര്‍ മേഖല ഡി.ടി.പി രംഗത്ത് പ്രവര്‍ത്തനങ്ങള്‍ നടത്തണം


മലയാളം ഡി.ടി.പി രംഗത്ത് കമ്യൂണിറ്റി പ്രൊജക്റ്റ് ആവശ്യമാണ്


ലോകം മുഴുവന്‍ ഒരു മാറ്റത്തിന്റെ വക്കിലാണ്. അടഞ്ഞ സോഫ്റ്റ്‌വെയറുകളില്‍ നിന്നും തുറന്ന സോഫ്റ്റ്വെയറുകളിലേക്ക്, സ്വാതന്ത്രമില്ലായ്മയില്‍ നിന്നും സ്വാതന്ത്രത്തിലേക്ക്.. പക്ഷേ ഗ്നു-ലിനക്സിലേക്കുള്ള ഈ മാറ്റം പല തലങ്ങളിലും തടസ്സം നേരിടുന്നുണ്ട്. വ്യാപകമായി ചെയ്യപ്പെടുന്ന പല ജോലികള്‍ക്കും അനുയോജ്യമായ സോഫ്റ്റ്വെയര്‍ ലഭ്യമല്ല എന്നത് ഒരു തടസ്സമാണ്. ഗാര്‍ഹിക ഉപയോഗത്തിനും വിദ്യാഭ്യാസ ആവശ്യങ്ങള്‍ക്കുമായി ധാരാളം സ്വതന്ത്രസോഫ്റ്റ്വെയറുകള്‍ ഇന്ന് ലഭ്യമാണ്. പക്ഷേ പ്രൊഫഷണല്‍ രംഗത്ത് ഉപയോഗിക്കുന്ന പല സോഫ്റ്റ്വെയറുകള്‍ക്കും ഒരു ബദല്‍ എന്നത് ഇന്നും സാധ്യമായിട്ടില്ല. ഈ രംഗത്ത് പല പരീക്ഷണങ്ങളും നടന്നിട്ടുണ്ട്, നടക്കുന്നുമുണ്ട്. പക്ഷേ അവയും ദിനം പ്രതി മാറ്റങ്ങളുമായി വരുന്ന പ്രൊപ്പറേറ്ററി പ്രൊഫഷണല്‍ പ്രോഗ്രാമുകള്‍ക്ക് പകരമാകാന്‍ സാധിച്ചിട്ടില്ല. മാധ്യമ രംഗമാണ് മാറാന്‍ പ്രയാസം നേരിടുന്ന ഒരു മേഖല. ഡി.റ്റി.പി. ,ഓഡിയോ എഡിറ്റിംഗ് , വീഡിയോ എഡിറ്റിംഗ് തുടങ്ങിയ രംഗത്തൊക്കെ ചില പരീക്ഷണങ്ങള്‍ക്കപ്പുറം ആരും ഒന്നും ചെയ്തിട്ടില്ല. വീഡിയോ രംഗത്ത് ഗുണമേന്മയുള്ള സൌജന്യ ഓപ്പണ്‍സോഴ്സ് സോഫ്റ്റ്വെയറുകള്‍ ലഭ്യമാണെങ്കിലും പലരും അതിനെതിരേ മുഖം തിരിഞ്ഞ് നില്‍ക്കുകയാണ്. അതിനെക്കുറിച്ച് അറിയാത്തതും വേണ്ടത്ര പരിശീലനം ലഭ്യമല്ലാത്തതുമാണ് പ്രമുഖ കാരണം.


ഡി.ടി.പി രംഗമാണ് മറ്റൊരു പ്രധാന മേഖല. ഇവിടെ അനുയോജ്യമായ സോഫ്റ്റ്വെയറുകള്‍ ലഭ്യമല്ല എന്നു തന്നെ പറയേണ്ടിയിരിക്കുന്നു. പ്രൊഫഷണല്‍ രംഗത്ത് ഉപയോഗിക്കുന്ന പേജ് മേക്കര്‍ പോലുള്ള സോഫ്റ്റ് വെയറുകള്‍ക്ക് അതേ തലത്തില്‍ സൌകര്യങ്ങള്‍ ലഭ്യമാകുന്ന ഒരു പ്രോഗ്രാം ചൂണ്ടിക്കാണിക്കാന്‍ കഴിയുന്നില്ല. മീഡിയ രംഗത്ത് വന്‍ മാറ്റത്തിന് വഴി തെളിക്കാന്‍ നല്ലൊരു പ്രൊഫഷണല്‍ സ്വതന്ത്ര ഡി.ടി.പി സോഫ്റ്റ്വെയറിന് സാധിക്കും. സ്ക്രൈബസ്സ് എന്നൊരു സോഫ്റ്റ് വെയര്‍ ബദലായി ചൂണ്ടിക്കാണിക്കപ്പെടുന്നുണ്ട്. പക്ഷേ പേജ് മേക്കര്‍ നല്‍കുന്ന എല്ലാ സൌകര്യങ്ങളും നല്‍കാന്‍ അതിന് കഴിയുന്നില്ല. ഫോണ്ടുകളുടെ കാര്യത്തിലും പേജിനേഷന്‍ പോലുള്ള സൌകര്യങ്ങളുടെ കാര്യത്തിലും സ്ക്രൈബസ്സ് ഇപ്പോഴും പുറകില്‍ തന്നെയാണ്. അമേച്വര്‍ രംഗത്തുള്ളവര്‍ മറ്റ് ചില സോഫ്റ്റ്വെയറുകളിലൂടെ ഈ പ്രശ്നം പരിഹരിക്കാന്‍ ശ്രമിച്ചിട്ടുണ്ട്. പക്ഷേ പ്രൊഫഷണല്‍ രംഗത്തിനു വേണ്ട വേഗതയും കാര്യക്ഷമതയും കൈവരിക്കാന്‍ ഈ പരീക്ഷണങ്ങള്‍ക്കും സാധിച്ചിട്ടില്ല.

കേരളം സ്വതന്ത്ര സോഫ്റ്റ്വെയര്‍ രംഗത്ത് വലിയ ഒരു മാറ്റത്തിലാണ്. ആ മാറ്റം കാത്തു സൂക്ഷിക്കണമെങ്കില്‍ ഇത്തരം പ്രൊഫഷണല്‍ സോഫ്റ്റ്‌വെയറുകള്‍ ലഭ്യമാകണം. കൂടാതെ ശരിയായ പരിശീലനവും ലഭിക്കണം. മുട്ടിന് മുട്ടിന് ഡി.ടി.പി സ്ഥാപനങ്ങള്‍ ഉള്ള നാടാണ് നമ്മുടേത്. അവരെല്ലാം ഇന്ന് ഉപയോഗിക്കുന്നത് പേജ് മേക്കര്‍ തന്നെയാണ്. സൌജന്യമല്ലെങ്കിലും സൌജന്യമായി ഉപയോഗിക്കുന്നതിനാല്‍ ഇപ്പോള്‍ അവര്‍ ഒരു വലിയ പ്രതിസന്ധി നേരിടുന്നില്ല എന്ന് മാത്രം. എന്നാല്‍ എല്ലാക്കാലത്തേക്കും ഇത് നടന്നു കൊള്ളണം എന്നില്ല. സോഫ്റ്റവെയര്‍ നിയമങ്ങള്‍ ശക്തമാകുന്നതോടെ , റെയ്ഡുകള്‍ മുറുകുന്നതോടെ ഇവരും പ്രതിസന്ധിയിലാകും. ഇവരെ സംരക്ഷിക്കാനുള്ള ഉത്തരവാദിത്വം സ്വതന്ത്രസോഫ്റ്റ്വെയര്‍ രംഗത്ത് പ്രോത്സാഹനം നല്‍കുന്ന സര്‍ക്കാരും മറ്റ് സംഘടനകളും ഏറ്റെടുക്കേണ്ടതുണ്ട്. നല്ലൊരു ബദല്‍ സോഫ്റ്റ്വെയര്‍ വികസിപ്പിച്ചെടുക്കുക എന്നത് ഒരു പ്രധാന ദൌത്യമായി സ്വതന്ത്രസോഫ്റ്റ് വെയര്‍ പ്രവര്‍ത്തകരും സര്‍ക്കാരും ഏറ്റെടുക്കണം. സ്വതന്ത്രസോഫ്റ്റ്വെയര്‍ രംഗത്തെ സര്‍ക്കാര്‍ ഏജന്‍സികളുടെ നേതൃത്വത്തില്‍ മറ്റ് സ്വതന്ത്ര സോഫ്റ്റ്വെയര്‍ പ്രവര്‍ത്തകരും സംഘടനകളുമായി സഹകരിച്ചു കൊണ്ട് ഒരു കമ്യൂണിറ്റി പ്രൊജക്റ്റിന് രൂപം നല്‍കാവുന്നതാണ്. നിശ്ചിത കാലയളവിനുള്ളില്‍ കേരളത്തിലെ ഡി.ടി.പി ആവശ്യങ്ങള്‍ക്കനുയോജ്യമായ രീതിയില്‍ ഒരു ബദല്‍ സോഫ്റ്റ്‌വെയറിന് ജന്മം നല്‍കാന്‍ ഇത്തരം ഒരു പ്രൊജക്റ്റിന് സാധിക്കും.


പല കാര്യങ്ങളും ഇത്തരം ഒരു പ്രൊജക്റ്റ് ആവശ്യപ്പെടുന്നുണ്ട്. അഞ്ച് തലത്തില്‍ ഈ ആവശ്യങ്ങളെ തരം തിരിക്കാം. ‌‌
1. സോഫ്റ്റ്വെയര്‍-സാങ്കേതികം
2. കമ്യൂണിറ്റി രൂപീകരണം
3. ധന സമാഹരണവും വിതരണവും
4. സോഫ്റ്റ് വെയര്‍ പരിശീലനം / വിതരണം
5. പിന്തുണാ സംവിധാനം


1. സോഫ്റ്റ്വെയര്‍ സാങ്കേതികം
നിലവിലുള്ള സ്ക്രൈബസ്സ് എന്ന സോഫ്റ്റ്വെയറിനെ മെച്ചപ്പെടുത്തലായിരിക്കും പുതിയ ഒരു സോഫ്റ്റ്വെയര്‍ നിര്‍മ്മിക്കുന്നതിലും നല്ലത്. പേജ്മേക്കറില്‍ നിലവിലുള്ള സൌകര്യങ്ങള്‍ എല്ലാം തന്നെ സ്ക്രൈബസ്സിലേക്ക് ഇണക്കി ചേര്‍ക്കേണ്ടതുണ്ട്. കൂടാതെ യുണികോഡ് പിന്തുണയും ഉറപ്പ് വരുത്തേണ്ടതുണ്ട്.

1. പേജ് മേക്കര്‍ പോലുള്ള സോഫ്റ്റ് വെയറുകളുടെ ആധുനിക സൌകര്യങ്ങള്‍ പട്ടികപ്പെടുത്തണം
2. സ്ക്രൈബസ്സും പേജ് മേക്കറും തമ്മിലുള്ള താരതമ്യം
3. സ്ക്രൈബസ്സിന്റെ പോരായ്മകള്‍ തിരിച്ചറിയലും പട്ടികപ്പെടുത്തലും.
4. കമ്യൂണിറ്റി രൂപീകണത്തിലൂടെ ഈ പട്ടികപ്പെടുത്തിയ ആവശ്യങ്ങളെ കൂടുതല്‍ സൂഷ്മമാക്കല്‍
5. വെബ് സൈറ്റ് രൂപീകരണം
6. സോഫ്റ്റ്വെയര്‍ നിര്‍മ്മാണം

2. കമ്യൂണിറ്റി രൂപീകരണം
ഒരു സംഘടനക്കോ വ്യക്തിക്കോ മാത്രം ചെയ്തു തീര്‍ക്കാവുന്ന ഒരു പ്രോജക്റ്റ് അല്ല ഇത്. അതു കൊണ്ടു തന്നെ കിട്ടാവുന്ന എല്ലാ സാധ്യതകളേയും പ്രയോജനപ്പെടുത്തേണ്ടതുണ്ട്. ഒരു കൂട്ടായ്മ ഇവിടെ പ്രാധ്യാന്യമര്‍ഹിക്കുന്നു. ഡി.ടി.പി ഉപയോഗിക്കുന്നവര്‍, സ്വതന്ത്ര സോഫ്റ്റ്വെയര്‍ പ്രവര്‍ത്തകര്‍, സംഘടനകള്‍, മാധ്യമ പ്രവര്‍ത്തകര്‍, പത്ര-മാസികാ സ്ഥാപനങ്ങള്‍ തുടങ്ങിയവരെയെല്ലാം ഇതില്‍ പങ്കാളികളാക്കണം. അവരുടെയെല്ലാം അറിവും സമയവും ശരിയായ രീതിയില്‍ വിനിയോഗിക്കാനുള്ള മുന്നൊരുക്കം നടത്തിയിരിക്കണം. സര്‍ക്കാര്‍ ഏജന്‍സിയോ, സര്‍ക്കാര്‍ നിര്‍ദ്ദേശിക്കുന്ന മറ്റേതെങ്കിലും ഏജന്‍സിയോ പ്രൊജക്റ്റിന്റെ മേല്‍നോട്ടം ഏറ്റെടുത്തിരിക്കണം. അവരായിരിക്കണം കമ്യൂണിറ്റിയെ നിലനിര്‍ത്തിക്കൊണ്ട് പോവേണ്ടത്.

3. ധനസമാഹരണവും വിതരണവും
കമ്യൂണിറ്റി പ്രൊജക്റ്റ് ആണെങ്കിലും അതില്‍ പ്രവര്‍ത്തിക്കുന്നവര്‍ക്ക് ഉചിതമായ പ്രതിഫലം നല്‍കേണ്ടതുണ്ട്. മറ്റ് നിരവധി ചിലവുകളും ഉണ്ടാകും. അതിനായുള്ള ചിലവ് കണ്ടെത്തേണ്ടതുണ്ട്. പ്രൊജക്റ്റ് മൂലം ഗുണം അനുഭവിക്കുന്നവരില്‍ നിന്ന് സംഭാവനകളായി ഇത് നേടിയെടുക്കാവുന്നതേ ഉള്ളൂ.. ഡി.ടി.പി ഉപയോക്താക്കള്‍, പത്രസ്ഥാപനങ്ങള്‍ തുടങ്ങിയവരില്‍ നിന്നും സംഭാവനകള്‍ സ്വീകരിക്കാവുന്നതാണ്. കൂടാതെ സര്‍ക്കാരും ഒരു പങ്ക് വഹിക്കേണ്ടതുണ്ട്. കമ്യൂണിറ്റി ഓഡിറ്റിംഗിന് വിധേയമായിക്കൊണ്ടായിരിക്കണം ധനവിനിയോഗം നടക്കേണ്ടത്.

4. സോഫ്റ്റ്വെയര്‍ പരിശീലനം - വിതരണം
സോഫ്റ്റ്വെയര്‍ നിര്‍മ്മിച്ചതു കൊണ്ട് മാത്രം ആയില്ല. ശരിയായ പരിശീലനം ഉപയോക്താക്കള്‍ക്ക് നല്‍കേണ്ടതുണ്ട്. ഇത് സൌജന്യമായി നല്‍കുന്നതാണ് അഭികാമ്യം. സംഭാവനകള്‍ നല്‍കിയ എല്ലാവര്‍ക്കും പരിശീലനം സൌജന്യമാക്കേണ്ടതുണ്ട്.
സോഫ്റ്റ്വെയര്‍ പരിശീലനം നല്‍കുന്നവര്‍ക്ക് മതിയായ പ്രതിഫലം ഉറപ്പു വരുത്തേണ്ടതുമുണ്ട്.

5. തുടര്‍ പ്രവര്‍ത്തനങ്ങളും പിന്തുണാ സംവിധാനവും.
ശരിയായ പിന്തുണാ സംവിധാനം ഇല്ലാതെ പുതിയ ഒരു സോഫ്റ്റ് വെയറിന് നിലനില്‍ക്കാനാവില്ല. ഇന്റര്‍നെറ്റിലൂടെയുള്ള പിന്തുണാ സംവിധാനങ്ങള്‍ പലപ്പോഴും ഒരു സാധാരണ ഉപയോക്താവിന് ലഭ്യമാകണം എന്നില്ല. നിലവില്‍ പ്രൊഫഷണല്‍ സോഫ്റ്റ്വെയറുകള്‍ക്ക് ഉള്ള പോലെ ഒരു സംവിധാനം എല്ലായിടത്തും ഉണ്ടാവേണ്ടതുണ്ട്. ഉയര്‍ന്ന പരിശീലനം ലഭിച്ചവര്‍ക്ക് ഇത് സാധ്യമാണ്. അതാത് ഉപയോക്താവില്‍ നിന്നും പ്രതിഫലം വാങ്ങി സേവനങ്ങള്‍ നല്‍കാന്‍ മനുഷ്യവിഭവശേഷി ഉണ്ടായേ മതിയാകൂ. ഇങ്ങിനെയുള്ളവരെ പരിശീലിപ്പിക്കാന്‍ സോഫ്റ്റ്വെയറിന്റെ അണിയറ പ്രവര്‍ത്തകര്‍ക്ക് കഴിയണം. ഒരു പുതിയ തൊഴില്‍ സാധ്യതക്കായിരിക്കും ഇത് വഴി വെയ്ക്കുക. സോഫ്റ്റ്വെയറിന്റെ സാങ്കേതിക പ്രശ്നങ്ങള്‍ പരിഹരിക്കാന്‍ ആളുണ്ടാകുന്നതോടെ പുറത്തിറങ്ങിയ സോഫ്റ്റ്വെയര്‍ ഉപയോഗിക്കാന്‍ ഡി.ടി.പി. ഉപയോക്താക്കള്‍ ധൈര്യപ്പെടും.


ഇത്തരത്തിലുള്ള പ്രക്രിയകളിലൂടെ മാത്രമേ ഒരു സോഫ്റ്റ്വെയര്‍ ജനകീയമാക്കാന്‍ സാധിക്കുകയുള്ളൂ. ജനങ്ങള്‍ക്ക് ആവശ്യമുള്ള സോഫ്റ്റ്വെയറുകള്‍ മാത്രമേ വിജയം കാണൂ. അതും നിരന്തര പിന്തുണാ സംവിധാനവും ഉണ്ടാകണം. അത്തരം പ്രവര്‍ത്തനങ്ങള്‍ നടത്താതെ എന്തൊക്കെ ചെയ്താലും ഒരു മാറ്റം ജനങ്ങളില്‍ ഉണ്ടാക്കുവാന്‍ സാധ്യമല്ല. ആ പ്രവര്‍ത്തനങ്ങളാണ് നാം സര്‍ക്കാരില്‍ നിന്നും സ്വതന്ത്രസോഫ്റ്റ്വെയര്‍ പ്രവര്‍ത്തകരില്‍ നിന്നും പ്രതീക്ഷിക്കുന്നത്.

24 comments:

Anivar Aravind said...

ദാ ഇതുകൂടി നോക്കിക്കോളൂ.. http://sankarshan.randomink.org/blog/2007/10/24/what-i-heard/ ..

ശ്രീ said...

നല്ല പോസ്റ്റ്

ഐ.പി.മുരളി | i.p.murali said...

അടിയന്തിര ശ്രദ്ധയര്‍ഹിക്കുന്ന വിഷയം. പോസ്റ്റാക്കിയതിന് അഭിനന്ദനങ്ങള്‍.

pravi said...

യൂണികോഡ് പിന്തുണയ്ക്കായി സരായി നല്‍കുന്ന ഫെല്ലോഷിപ്പിന്റെ ഭാഗമായി രാജീവ് സെബാസ്റ്റ്യന്‍ പ്രൊജക്റ്റ് ചെയ്യുന്നുണ്ടു് http://www.sarai.net/fellowships/floss

മറ്റുള്ള ആശയങ്ങള്‍ കൊള്ളാം. അടുത്ത നടപടിക്രമം എവിടെ തുടങ്ങുമെന്നു് ആലോചിയ്ക്കാം.

Kaippally കൈപ്പള്ളി said...

സ്വതന്ത്ര സൊഫ്റ്റ്വെയർ എഴുതുന്നവർ സൌജന്യമായി അവരുടേ ഇഷ്ടത്തിനും അവരുടേ താല്പര്യത്തിനുമാണു് സോഫ്റ്റ്വയർ എഴുതുന്നതും വികസിപ്പിക്കുന്നതും എന്നാണു് ഞാൻ മനസിലാക്കുന്നതു്. അവരോടു് അതു ചെയ്യണം ഇതു ചെയ്യണം എന്നു നിർദ്ദേശിക്കുന്നതിന്റെ യുക്തി എനിക്കു് മനസിലാകുന്നില്ല.

മറിച്ചു് നല്ല തലയിൽ ആൾ താമസമുള്ള പണി അറിയാവുന്ന ദീർഖവീക്ഷണമുള്ള സോഫ്റ്റ്വേയർ developers വേണം എന്നു പറയുന്നതിൽ തെറ്റില്ല. അതാണു് കേരളത്തിൽ ഇല്ലാത്തതു്.

ഇതു ഞാൻ ഇവിടെ കുറിച്ചിടട്ടെ: ഇനി അടുത്ത ഒരു നാലു വർഷത്തിനുള്ളിൽ, കേരളത്തിൽ നിന്നും മലയാള ഭാഷ computing രംഗത്തു പ്രവർത്തിക്കുന്നു എന്നു വീമ്പെളക്കുന്ന ഒരുത്തന്നും, ഒരു spell-checking/grammar checking ഉള്ള ഒരു word-processor പോലും ഇറക്കും എന്നു തോന്നുന്നില്ല. അത്രക്കേ ഒള്ളു നമ്മുടെ സോഫ്റ്റ്വയർ കൂലികളുടെ capacity.

ശ്രീഹരി::Sreehari said...

ടോട്ടോ,
സോഫ്റ്റ്വേര്‍ ഉല്‍‌പന്ന മേഖലയില്‍ ഇന്ത്യ ഇതുവരെ ശൈശവം പോലും വെടിഞ്ഞിട്ടില്ല. സര്‍‌വീസ് - മയിന്റനന്‍സ്, കണസ്ല്ട്ടിംഗ് തുടങ്ങിയ ചില മേഖലകളിലെ ഇന്ത്യന്‍ മേഖല ഇത്രയും കാലം ഊന്നല്‍ നല്‍കിയിട്ടുള്ളൂ. വലിയ വിവാദങ്ങള്‍ ഉണ്ടായേക്കാവുന്ന വിഷയമായത് കൊണ്ട് കൂടുതല്‍ പരാമര്‍ശിക്കുന്നില്ല.

പേജ്മേക്കര്‍ പോലെയുള്ള ഒരു പ്രോഡക്റ്റ് ഡെവലപ് ചെയ്യാന്‍ ഉള്ള സ്കില്‍സേറ്റ്, ഇന്റ്യന്‍ കമ്പനികള്‍ക്കോ, ഓര്‍ഗനൈസേഷനുകള്‍ക്കോ ഇല്ലെന്നു മാത്രം പറഞ്ഞു നിര്‍‌ത്തട്ടെ.

ഓപ്പണ്‍ സോഴ്സില്‍ നടക്കുന്ന ഡെവലപ്മെന്റ് ചിതറിയതാണ്. കെഡീഇ വരുടെ ഡീടിപി ഡെവലപ് ചെയ്യും , ജീനോം അവരുടേത് വേറെ ചെയ്യും. ഇതു കാരണം ഒരേകാര്യങ്ങള്‍ തന്നെ വീണ്ട്ം വീണ്‍റ്റും പലരും ചെയ്യുന്നു എന്നു മാത്രമേ വരുന്നുള്ളൂ. ഒരു സോഫിസ്റ്റിക്കേറ്റഡ് പ്രൊഡക്റ്റ് ഉരുത്തിരിയുന്നില്ല.

ഞാന്‍ ഫ്രീ സോഫ്റ്റ്വേയറില്‍ വിശ്വസിക്കുകയും ഇഷ്ടപ്പെടുകയും ചെയ്യുന്ന വ്യക്തി ആണെന്ന് സൂചിപ്പിക്കട്ടെ. ലിനക്സിന് അതിന്റെ പൊട്ടെന്‍ഷ്യല്‍ ഉണ്ട്. നാളെയുടെ സോഫ്റ്റ്വേര്‍ ലിനക്സ് ആവും എന്നു തന്നെയാണ് ഞാന്‍ വിശ്വസിക്കുന്നത്. പക്ഷേ ഒരു പേജ്മേക്കര്‍ ഉണ്ടാക്കുക ഒരു ഓപറെറ്റിംഗ് സിസ്റ്റം ഉണ്ടാക്കുന്നതിലും പതിന്മടങ്ങ് ബുദ്ധിമുട്ടേറിയതാണ്. പ്രോഡക്റ്റ് നിര്‍മാണത്തില്‍ എന്നെങ്കിലും നമ്മുടെ നാടിന് സ്വയം പര്യാപ്തത വരട്ടെ എന്ന് ആശിക്കുന്നു.

ടോട്ടോചാന്‍ (edukeralam) said...

അനിവര്‍, ശ്രീ, മുരളി നന്ദി.
പ്രവി പുതിയ അറിവിന് നന്ദി. പ്രൊജക്റ്റുകള്‍ നടക്കട്ടെ..
കൈപ്പള്ളി നന്ദി,
ഗ്നു-ലിനക്സ് പ്രവര്‍ത്തകര്‍ക്ക് സോഫ്റ്റ്വെയര്‍ സംബന്ധമായ കഴിവുകള്‍ ഇല്ല എന്ന രീതിയിലാണ് താങ്കളുടെ കമന്റ് വായിക്കുമ്പോള്‍ തോന്നുന്നത്. എന്നാല്‍ അടഞ്ഞ സോഴ്സ് ഉള്ള കോഡുകളേക്കാള്‍ പഠിക്കുവാന്‍ നല്ലത് തുറന്ന സ്രോതസ്സ് തന്നെയാണ് എന്നതില്‍ താങ്കള്‍ക്ക് സംശയമുണ്ടോ?
സോഫ്റ്റ്വെയര്‍ വികസിപ്പിക്കുന്നവരോട് അല്ലാതെ മറ്റാരോടാണ് ഡി.ടി.പി രംഗത്ത് നല്ലൊരു സോഫ്റ്റ്വെയര്‍ ആവശ്യപ്പെടാന്‍ കഴിയുക?
അവരുടെ സ്വാതന്ത്രത്തില്‍ ഇടപെടുകയല്ല മറിച്ച് സര്‍ക്കാര്‍ സംവിധാനങ്ങള്‍ ഉപയോഗിച്ച് പെരിയാര്‍, കാവേരി തുടങ്ങിയ ഓപ്പണ്‍ ഓഫീസ് പാക്കേജുകള്‍ നിര്‍മ്മിക്കുന്നതു പോലെ എന്തു കൊണ്ട് ഇത്തരം ഒരു പ്രൊജക്റ്റിനെക്കുറിച്ച് ആലോചിച്ചു കൂടാ?

പിന്നെ താങ്കളുടെ അവസാന പ്രഖ്യാപനം .. അത് കാത്തിരുന്നു കാണാം എന്നു മാത്രം പറയട്ടെ.

ശ്രീഹരി, കഴിവുള്ളവര്‍ ഇല്ലാത്തതല്ല ഇവിടെത്തെ പ്രശ്നം. അവരെ ഏകോപിപ്പിക്കാനും അവര്‍ക്ക് ആവശ്യമായ പ്രതിഫലം നല്‍കാനും കഴിയണം. അതിനുള്ള ഒരു നിര്‍ദ്ദേശം മുന്നോട്ട് വയക്കുക മാത്രമാണ് ചെയ്തത്.

മണിലാല്‍ കെ എം : Manilal K M said...

Some other links related to scribus development. :
http://wiki.scribus.net/index.php/1.3.x_Roadmap
http://wiki.scribus.net/index.php/GsoC_2008_Ideas

മണിലാല്‍ കെ എം : Manilal K M said...

കൈപ്പള്ളീ,
ഇതൊന്നു നോക്കൂ : http://clickeralam.org/kaveri.html

ടോട്ടോചാന്‍ (edukeralam) said...

മണിലാല്‍ ലിങ്കുകള്‍ക്ക് നന്ദി..
കൈപ്പിള്ളിയുടെ സംശയങ്ങള്‍ തീര്‍ന്നോ?

Kaippally കൈപ്പള്ളി said...

"എന്നാല്‍ അടഞ്ഞ സോഴ്സ് ഉള്ള കോഡുകളേക്കാള്‍ പഠിക്കുവാന്‍ നല്ലത് തുറന്ന സ്രോതസ്സ് തന്നെയാണ് എന്നതില്‍ താങ്കള്‍ക്ക് സംശയമുണ്ടോ?"

മലയാളം computingന്റെ പുറകിൽ പ്രവർത്തിക്കുന്ന എല്ല developersഉം (തുറന്നതായലും, അടഞ്ഞതായാലും, സ്വതന്ത്രമായാലും, ബന്ധിയായലും ഇനി പുതിയ ഏതെങ്കിലും വർഗ്ഗമായാലും.) തന്നെ അധികകവും ചെയ്യുന്നതു് വിദേശത്തു് നിർമ്മിച്ച applicationssനെ localization ചെയ്യുന്നു എന്നതു മാത്രമാണു്. അല്ലാതെ പുതിയ Technology ഒന്നും develop ചെയ്യുന്നില്ല. എന്തിനാണു് പുതിയ technology development വേണ്ടി വരുന്നതു്? language specific computing systems അനേകം ഉണ്ടു്. Speech synthesis, Speech recognition, Optical character recognition, grammar checking, spell checking, തിടങ്ങിയ അനേകം ആവശ്യങ്ങൾ.

ഇതിന്റെ എല്ലാം (വിദേശികൾ നിർമ്മിച്ച) application kernel port ചെയ്യുന്നതല്ലാതെ language specific defenitions എഴുതുക തന്നെ വേണം.

കേരള സർക്കാരിന്റെ പണം തിന്നു മുടിക്കുന്ന ചില വെള്ളാനകൾ 20 വർഷങ്ങളായി ഈ projectകളുടെ പേരിൽ തൊലിക്കുന്നുണ്ടു്. ഇന്നുവരെ ഒരു കോപ്പും ജനം കണ്ടിട്ടില്ല. ഇനി സ്വതന്ത്ര സോഫ്റ്റ്വയർ അണ്ണന്മാർ വിചാരിച്ചാലും ഈ സ്ഥിധിയിൽ നിന്നും മാറ്റങ്ങൾ ഒന്നും ഉണ്ടാകാൻ പോകുന്നില്ല.

സോഫ്റ്റ്വ്യർ developers എല്ലാവരും കൂടി groupലും chatലും മലയാളത്തിൽ ബന്ധമുള്ളതും, ഇല്ലാത്തതുമായ കാര്യങ്ങൾ മലയാളത്തിൽ ചർച്ചിക്കുന്നതല്ല, മലയാളം computing.

Infortmation Technology Researchഉം software code writingഉം തമ്മിലുള്ള ബന്ധം അറിയാതെ ഇതൊന്നും ചെയ്യാൻ ശ്രമിച്ചിട്ടും കാര്യമില്ല എന്നു തോന്നുന്നു.


മണിലാല്‍ കെ എം : Manilal K M

കാവേരി മണിലാൽ ഇപ്പോഴായിരിക്കും കാണുന്നതു്. 2006ല്ല് കുന്ത്രാണ്ടത്തിനെ പറ്റി ഒരു post എഴുതിയിരുന്നു. ഇതിൽ നിന്നും മാറ്റങ്ങൾ ഒന്നും സംഭവിച്ചിട്ടില്ല എന്നു തോന്നുന്നു. ഈ മാരണം ഇനിയും download ചെയ്തു കളയാനുള്ള സമയവും ഇല്ല. ഇതു് ‌download ചെയ്യുന്നതും ഒരു post ആയിരുന്നു.

മണിലാല്‍ കെ എം : Manilal K M said...

കൈപ്പള്ളി
താങ്കള്‍ ഒന്നും കണ്ടില്ല എന്നു പറഞ്ഞതു കൊണ്ടാണു ഞാന്‍ ആ ലിങ്ക് പോസ്റ്റ് ചെയ്തത്. ഞാനും ഇതു 2006ല്‍ തന്നെ കണ്ടിരുന്നു. പക്ഷെ ഉപയോഗിച്ചു നോക്കേണ്ട ആവശ്യം വന്നില്ല.

പിന്നെ, കമ്പ്യൂട്ടറുകള്‍ പോലും വിദേശികളാണു് കണ്ടുപിടിച്ചതു. അപ്പോള്‍ സ്വാഭാവികമായും അതില്‍ ഉപയോഗിക്കുന്ന സോഫ്റ്റ്‌വെയറും ആദ്യം ഉണ്ടാകുന്നതു വിദേശത്തു തന്നെയായിരിക്കും. Re-inventing the wheel ഒഴിവാക്കുന്നതല്ലേ നല്ലതു ? localisation നും porting നും അതിന്റേതായ പ്രാധാന്യം ഉണ്ടു്, പ്രത്യേകിച്ചും സ്വതന്ത്ര സോഫ്റ്റ്‌വെയറില്‍.

Kaippally കൈപ്പള്ളി said...

Dear Manilal
Please do excuse the English comment.
Over the last 20 years the Malayalam computing tribe have spent the better part of their effort on print, display, and storage of Malayalam Languge on various systems. This has been achieved to a large extend thanks to private and enterprising individuals who were passionate about the language. Let me also add that this was in spite of the short sighted morons in Goverment sponsored agencies who kept up the pressure to promote non-unicode based systems.

Now the time has come to move ahead and focus on real Malayalam Language Computing.

Those individuals who passionately worked towards promoting unicode and writing applications to encourage the common users have moved on to do more interesting and challenging things in life. But I don't see anyone around to take over from them and continue their efforts to push forward for real Malayalam Computing.

When I say Real malayalam Computing, I mean language specific processing systems, those mentioned in my previous comment.

However there exists a flaw in the fundamentals of applied malayalam computing. Most folks I know are still engaged in Application localization, language display and print applications and the all important obsession of getting Linux to run in Malayalam.

I believe malayalam computing is much more than that.

Language specific applications depend on certain core modules that makes localization complete. Like proofing, grammar and syntax checking, speech synthesis, optical character recognition and integration of these modules into existing open/closed source applications. etc. I have yet to see anything that even comes close to addressing these needs.

Let me also state at this moment that I know of only one individual who has been working on a hunspell proofing system for malayalam. But this is not enough and there is much more we as a community can do. If these guys could give 5% of their time spent discussing KDE and Linux issues on groups like SMC, we would have had an applications to do these things a long time ago.

Santhosh Thottingal said...

കൈപ്പള്ളി പറഞ്ഞതിനോടു യോജിക്കുന്നു. പ്രാദേശികവത്കരണം മാത്രമല്ല മലയാളം കമ്പ്യൂട്ടിങ്ങ് എന്നതു് SMC വളരെ മുന്‍പു തന്നെ തിരിച്ചറിഞ്ഞിട്ടുള്ളതാണു്. സ്വതന്ത്ര മലയാളം കമ്പ്യൂട്ടിങ്ങിന്റെ പ്രൊജക്ടുകളില്‍ ഒന്നു മാത്രമാണു് പ്രാദേശികവത്കരണം. പ്രാദേശികവത്കരണം മറ്റെല്ലാ സംരംഭങ്ങളെക്കാളും സജീവമാണു് എന്നതു വാസ്തവമാണു്. അതിനു കാരണം തുടരെയുള്ള KDE, GNOME എന്നിവയുടെ റിലീസ് സൈക്കിളുകളും, പങ്കെടുക്കുന്നവരുടെ എണ്ണക്കൂടുതലുമാണു്(ഏകദേശം 30 പേര്‍). പ്രാദേശികവത്കരണമല്ലാതെ SMC എന്തു ചെയ്യുന്നു എന്നറിയാന്‍ SMC യുടെ git source code repository നോക്കുക. അതിലെ കഴിഞ്ഞ രണ്ടാഴ്ചത്തെ കമ്മിറ്റുകളുടെ എണ്ണം നോക്കുക. കൈപ്പള്ളി പറഞ്ഞ പ്രാദേശികവത്കരണമല്ലാത്ത സംരംഭങ്ങളെപ്പറ്റി ചെറുതായി വിശദീകരിക്കാം
1. Speech synthesizer: ധ്വനി മലയാളമടക്കം 11 ഭാഷകള്‍ കൈകാര്യം ചെയ്യാവുന്ന 2008 ലെ ഫോസ് ഇന്ത്യാ അവാര്‍ഡിനര്‍ഹമായ പ്രൊജക്ട്
2. Speech recognition: SMC യിലെ ശ്യാം ചെയ്തു കൊണ്ടിരിക്കുന്നു. പ്രൊജക്ട്: ശാരിക. ഇപ്പോള്‍ Limited word recognition മാത്രമേ ആയിട്ടുള്ളൂ. സ്പീക്കര്‍ ഡിപ്പന്റന്‍സി തുടങ്ങിയ കാര്യങ്ങളില്‍ ഗവേഷണം ചെയ്യുന്നു.
3. സ്പെല്‍ ചെക്കര്‍. wordlist അടിസ്ഥാനമാക്കിയുള്ള aspell, hunspell spellcheckers KDE, Gnome, Firefox, Openoffice എന്നിവയ്ക്കു ലഭ്യമാണു്. agglutination, inflection എന്നിവ കൈകാര്യം ചെയ്യാന്‍ ഞാന്‍ ശ്രമിച്ചു കൊണ്ടിരിക്കുന്നു. കൈപ്പള്ളിയും ഈ പ്രൊജക്ടില്‍ താത്പര്യമുള്ളവനാണു്. മറ്റൊരു ഇന്ത്യന്‍ ഭാഷയിലും ഇത്തരം ശ്രമങ്ങള്‍ നടക്കുന്നില്ല.
4. Grammer checker- Nobody started work on this other than usual Academic projects by IIIT Hyderabad and CDAC
5. Machine translation-Apertium എന്ന സ്വതന്ത്ര സോഫ്റ്റ്‌വെയറുപയോഗിച്ചു് ഭാരതീയ ഭാഷകള്‍ക്കു machine translation ചെയ്യാനുള്ള പ്രവര്‍ത്തനങ്ങള്‍ പ്രണവ് എന്നൊരു സുഹൃത്തു് ചെയ്യുന്നു.
6. Optical character recognition-ദേബയാന്‍ ബാനര്‍ജി എന്ന ഒരു സുഹൃത്തു് ഇതിനുള്ള പരിശ്രമങ്ങള്‍ തുടരുന്നു: http://debayanin.googlepages.com/hackingtesseract
കലണ്ടര്‍, നിഘണ്ടു, ഫോണ്ടുകള്‍, റെന്‍ഡറിങ്ങ്, ടെസ്റ്റിങ്ങ്, ബഗ് ഫിക്സിങ്ങ്/റിപ്പോര്‍ട്ടിങ്ങ്, എന്നിവയിലും SMC പ്രവര്‍ത്തിയ്ക്കുന്നുണ്ടു്.
ഒരു കാര്യം ശ്രദ്ധിക്കേണ്ടതു് മേല്‍പ്പറഞ്ഞ സോഫ്റ്റ്‌വെയറുകളെല്ലാം മലയാളത്തിനു മാത്രമല്ല മറ്റു ഭാരതീയ ഭാഷകള്‍ക്കും ആവശ്യമാണെന്നുള്ളതാണു്. അതുകൊണ്ടു തന്നെ ഈ രംഗത്തു പ്രവര്‍ത്തിക്കുന്ന ഇന്ത്യയിലെ സുഹൃത്തുക്കളുമായി ഒരുമിച്ചു് പ്രവര്‍ത്തിക്കുകയാണു് smc ചെയ്യുന്നതു്.
SMC യുടെ കഴിഞ്ഞയാഴ്ചത്തെ പ്രവര്‍ത്തനങ്ങളെപ്പറ്റി ദാ ഇവിടെ ഞാനൊരു പോസ്റ്റിട്ടിരുന്നു.
ഒരുപാടു സംരംഭങ്ങള്‍ ഇനിയും ചെയ്യാനുണ്ടു് . SMC യുടെ ടാസ്ക് പേജ് കാണുക
പെട്ടെന്നുള്ള മുന്നേറ്റത്തിനു് ഈ മേഖലയിലേയ്ക്കു് കൂടുതല്‍ ആളുകളുടെ ശ്രദ്ധ തിരിയേണ്ടതുണ്ടു്

മണിലാല്‍ കെ എം : Manilal K M said...

@Kaippaly,
I agree to your opinion. Over the years our language experts were busy creating standards for print, typewriter, computer etc.. The end product was multitude of standards with significant number of conflicts. It's true that if we have another device in future, we will surely have another set of standards for our language. It's ridiculous that our language experts have been trying to modifying language to suit the technology !!! I'm still unsure at what level this could be solved.

>all important obsession of getting Linux to run in Malayalam.

There is a strong reason behind this obsession. It's just because Free Software is the only option where mass can contribute. Proprietary systems don't allow end-users to be part of the development. This is the point where communities like SMC is relevant. SMC is still(and will always be) a growing community, and it requires valuable inputs from people like you.

I also believe that we can produce better results through community development.

@santhosh:
well said

Neon said...
This comment has been removed by the author.
Ranjith Siji said...

@ സന്തോഷ് കാവേരിയുടെ തുടര്‍ച്ചയായി പെരിയാര്‍ പ്രൊജക്റ്റില്‍ http://www.languagetool.org/ ഉപയോഗപ്പെടുത്തി ഗ്രാമര്‍ ചെക്കുചെയ്യാനുള്ള ശ്രമം നടക്കുന്നുണ്ടായിരുന്നു. എനിക്കു തോന്നുന്നത് അത് ഓപ്പണ്‍ ഓഫീസില്‍ നന്നായി പ്രവര്‍ത്തിക്കുന്നതാണ്.മലയാളം ഗ്രാമര്‍ റൂളുകള്‍ നിര്‍മ്മിക്കേണ്ടിവരുമെന്നുമാത്രം. പിന്നെ മലയാളം വായനക്ക് ഭാവിയില്‍ ധ്വനി ഉപയോഗപ്പെടുത്താം.പിന്നെ ഓപ്പണ്‍ ഓഫിസില്‍ വരുന്ന മീഡിയ ഉപയോഗപ്പെടുത്താമോ എന്നുനോക്കാം. മലയാളം OCR ഇപ്പോഴും ബാലികേറാമലയാണ്. എന്നാലും സ്ക്രൈബസിന് വളരെയേറെ സഞ്ചരിക്കാനുണ്ട് ഒരു യഥാര്‍ത്ഥ DTP സോഫ്റ്റ് വെയറായി മാറാന്‍. എന്നുവച്ച് ആഡോബ് മാത്രമേ പ്രശ്ന പരിഹാരമുള്ളു എന്നില്ല.

ടോട്ടോചാന്‍ (edukeralam) said...

കൈപ്പിള്ളി, വിദേശം, സ്വദേശം എന്നൊക്കെ ഇനി വേര്‍തിരിവിന് വലിയ പ്രാധാന്യം ഉണ്ടാവില്ല. പ്രക്തേകിച്ചും സ്വതന്ത്രസോഫ്റ്റ്വെയര്‍ മേഖലയില്‍. പലപ്പോഴും മികച്ച സോഫ്റ്റ്വെയറുകള്‍ നിര്‍മ്മിക്കുന്നതില്‍ ഭാരതത്തിലെ സാങ്കേതികവിദഗ്ദരുടെ സഹായം ഉണ്ടാകാറുമുണ്ട് . അത് സ്വതന്ത്രമാണെങ്കിലും അല്ലെങ്കിലും.
നിലവിലള്ള ഒരു സോഫ്റ്റ്വെയറിനെ റീഎന്‍ജിനീറിംഗ് നടത്തുന്നതില്‍ സാങ്കേതികവൈദഗ്ദ്യം ആവശ്യമാണ്.
ഡി.ടി.പി രംഗത്തും ഇത് പ്രാവര്‍ത്തികമാക്കുന്നതിന് സാങ്കേതിക തടസ്സം ഉണ്ടാവും എന്നു തോന്നുന്നില്ല. പക്ഷേ നടത്തിപ്പിനും കൂട്ടിച്ചേര്‍ക്കലുകള്‍ക്കും ആസൂത്രണത്തിനും പ്രശ്നം നേരിട്ടേക്കാം. അതിനെയാണ് മറികടക്കേണ്ടത്.

സന്തോഷ്, ചര്‍ച്ചയില്‍ പങ്കെടുത്തതിനും ലിങ്കുകള്‍ക്കും നന്ദി..
എന്തായാലും സ്വതന്ത്രസോഫ്റ്റ്വെയര്‍ മേഖലയില്‍ ഇക്കാര്യത്തില്‍ ഒരു ചര്‍ച്ച നടക്കേണ്ടതുണ്ട് എന്നു തോന്നുന്നു..

ശ്രീഹരി::Sreehari said...

കൈപ്പള്ളീ,

താങ്കളുടെ ആശങ്കകള്‍ ഉള്‍ക്കൊള്ളുന്നു. പക്ഷേ ഓപ്പണ്‍ സോര്‍സിനെ തള്ളിപ്പറയേണ്ടതൊന്നും ഇല്ല എന്നാണ് എന്റെ അഭിപ്രായ. വെബ് ബേസ്ഡ് അപ്ലിക്കേഷനുകള്‍ വലിയ പ്രയാസം കൂടാതെ പ്ലാറ്റ്ഫോം ഇന്‍‌ഡിപെന്‍ഡന്‍ഡ് ആയി നിര്‍മ്മിക്കാവുന്നതല്ലേ ഉള്ളൂ? താങ്കള്‍ക്ക് അറിയാത്ത കാര്യമല്ലല്ലോ അതൊന്നും. താങ്കളുടെ ലിനക്സ് ഇന്‍സ്റ്റാള്‍ ചെയ്ത് പരീക്ഷിച്ച പോസ്റ്റ് വായിക്കുകയുണ്ടായി. ഏറെ വൈകി കണ്ടതു കൊണ്ട് അന്ന് അതില്‍ കമന്റ് ഇട്ടില്ല.
താങ്കളുടെ വീക്ഷണകോണില്‍ ശരിയാണ് കാനണ്‍ ക്യാമറയെ നിയന്ത്രിക്കാന്‍ ഇന്നത്തെ രീതിയില്‍ സാധിക്കില്ല ( എനിക്കുറപ്പില്ല. ചിലപ്പോള്‍ പുതിയതായി എന്തെങ്കിലും വന്നിരിക്കും). അത് ലിങ്ക്സിന്റെ കുഴപ്പം അല്ല സുഹൃത്തേ. കാനണ്‍ കമ്പനി ഉണ്ടാക്കിയ സോഫ്റ്റ്വേറ് വിന്‍ഡോസില്‍ മാത്രമേ വര്‍ക്ക് ചെയ്യൂ. അതു ലിനക്സ് കൊള്ളില്ലാഞ്ഞിട്ടല്ല. പാവം ലിനക്സ് ഡെവലപ്പേര്‍ഴ്സ്. ഓരോ ഹാര്‍ഡ്വേയറിന്റേയും ഡിവൈസ് ഡ്രൈവേഴ്സ് ഡെവലപ് ചെയ്യാനേ നേരം കിട്ടുന്നുള്ളൂ. വിന്‍ഡോസ് വെര്‍ഷന്‍സ് അതത് ഹാര്‍ഡ്വേറ് കമ്പനികല്‍ തന്നെ റിലീസ് ചെയ്യും. ഓപണ്‍ സോഴ്സില്‍ വേണ്ടവന്‍ ഉണ്ടാക്കി ഉപയോഗിക്കട്ടെ എന്ന രീതി.

ലിനക്സ് സ്നേഹികള്‍ കഷ്ടപ്പെട്ട് ഇരുന്ന് ഓരോന്നോരോന്നായി ആഡ് ചെയ്യുകയും ചെയ്യും.
ഇനി താങ്കള്‍ തന്നെ പറയൂ. പ്രശ്നം ലിനക്സിന്റേതാണോ?

"കേരള സർക്കാരിന്റെ പണം തിന്നു മുടിക്കുന്ന ചില വെള്ളാനകൾ 20 വർഷങ്ങളായി ഈ projectകളുടെ പേരിൽ തൊലിക്കുന്നുണ്ടു്. ഇന്നുവരെ ഒരു കോപ്പും ജനം കണ്ടിട്ടില്ല. ഇനി സ്വതന്ത്ര സോഫ്റ്റ്വയർ അണ്ണന്മാർ വിചാരിച്ചാലും ഈ സ്ഥിധിയിൽ നിന്നും മാറ്റങ്ങൾ ഒന്നും ഉണ്ടാകാൻ പോകുന്നില്ല"

ആദ്യത്തെ പോയിന്റ് വാലിഡ്... അതു ബ്യൂറോക്രസിയുടെ കുഴപ്പം.
രണ്ടാമത്തെ അല്പം കടന്നു പോയി. സ്വതന്ത്ര്യമേഖലയില്‍ മാറ്റങ്ങള്‍ സംഭവിക്കുന്‍ എന്നു തന്നെ ഞാന്‍ കരുതുന്നു.

"Those individuals who passionately worked towards promoting unicode and writing applications to encourage the common users have moved on to do more interesting and challenging things in life. But I don't see anyone around to take over from them and continue their efforts to push forward for real Malayalam Computing. "

അതൊരു കണക്കില്‍ തങ്ങള്‍ക്കു ശേഷം പ്രളയം എന്ന അഭിപ്രായമല്ലേ? പുതിയ കഴിവുള്ള പിള്ളേര്‍ ഇനിയും വരും. ഇക്കണ്ടതൊന്നുമല്ല കമ്പ്യൂട്ടിംഗ് എന്ന് അവര്‍ തെളിയിക്കുകയും ചെയ്യും.

ടോട്ടോ,
"മുട്ടിന് മുട്ടിന് ഡി.ടി.പി സ്ഥാപനങ്ങള്‍ ഉള്ള നാടാണ് നമ്മുടേത്. അവരെല്ലാം ഇന്ന് ഉപയോഗിക്കുന്നത് പേജ് മേക്കര്‍ തന്നെയാണ്. സൌജന്യമല്ലെങ്കിലും സൌജന്യമായി ഉപയോഗിക്കുന്നതിനാല്‍ ഇപ്പോള്‍ അവര്‍ ഒരു വലിയ പ്രതിസന്ധി നേരിടുന്നില്ല എന്ന് മാത്രം. എന്നാല്‍ എല്ലാക്കാലത്തേക്കും ഇത് നടന്നു കൊള്ളണം എന്നില്ല. സോഫ്റ്റവെയര്‍ നിയമങ്ങള്‍ ശക്തമാകുന്നതോടെ , റെയ്ഡുകള്‍ മുറുകുന്നതോടെ ഇവരും പ്രതിസന്ധിയിലാകും. ഇവരെ സംരക്ഷിക്കാനുള്ള ഉത്തരവാദിത്വം സ്വതന്ത്രസോഫ്റ്റ്വെയര്‍ രംഗത്ത് പ്രോത്സാഹനം നല്‍കുന്ന സര്‍ക്കാരും മറ്റ് സംഘടനകളും ഏറ്റെടുക്കേണ്ടതുണ്ട്. "

സൗജന്യമായി കിട്ടാതാവുമ്പോള്‍ കളി മാറും. ( ചിലപ്പോള്‍ മാറില്ല. ചില കണ്ണില്‍ പൊടിയിടല്‍ റെയ്ഡുകളില്‍ ഒതുങ്ങും എല്ലാം).

സര്‍ക്കാരിനെ വിട്ടേക്ക്. ഇപ്പോള്‍ സ്വതന്ത്ര്യസോഫ്റ്റ്വേയറിനെ അവഗണിച്ച് പൈറേറ്റഡ് സോഫ്റ്റ്വേയറ് ഉപയോഗിക്കുന്നവര്‍, ഇപ്പോള്‍ തന്നെ സ്വിച് ചെയ്യുകയാണ് വേണ്ടത്. ഒരു പ്രതിസന്ധി വന്നുകഴിഞ്ഞ്, തങ്ങളുറ്റെ കഞ്ഞികുടിമുട്ടി സര്‍ക്കാറേ രക്ഷിക്കണേ എന്നു പറയുന്നത് ഒട്ടും ഒട്ടും ശരിയല്ല. സര്‍ക്കര്‍ ഇടപെടലുകള്‍ ആവശ്യം തന്നെ. പക്ഷേ മലയാളികള്‍ ഒരു പക്ഷേ സര്‍ക്കാര്‍ ഔദാര്യങ്ങളിലാണ് കൂടുതല്‍ വിശ്വസിക്കുന്നത് എന്നു മാത്രം.

താങ്കള്‍ പറയുന്നതു പോലെ , ഓപണ്‍ സോഴ്സ് രംഗത്തെ ഡെവലപ്മെന്റ് വെല്‍ മാനേജ്ഡ് ആയിക്കഴിഞ്ഞാല്‍ കൈപള്ളിയെ പോലുള്ളവരുടെ പരാതിയും തീരും. നല്ല സോഫ്റ്റ്വേര്‍ വേണമെന്നേ അവര്‍ക്കുള്ളൂ. അല്ലതെ ലിനക്സിനെ അന്ധമായി എതിര്‍ക്കുന്നില്ല എന്നാണ് ഞാന്‍ മനസിലാകുന്നത്. ശരിയല്ലേ കൈപ്പള്ളീ?

ഇഞ്ചൂരാന്‍ said...

അയ്യോ ...... ഇത് സോഫ്റ്റ്‌വെയര്‍ പുലികളുടെ കൂട് ആയിരുന്നോ ?
ഓടി രക്ഷപെടട്ടെ .......
ഹ ആഹ // പക്ഷെ നല്ല ചര്‍ച്ച ചെയ്യപ്പെടേണ്ട കാര്യം തന്നെ .

ടോട്ടോചാന്‍ (edukeralam) said...

നന്ദി...സഹൃത്തേ...
പുലികള്‍ എന്നൊന്നും ഇല്ല ആര്‍ക്കും സംസാരിക്കാവുന്ന വിഷയം തന്നെ....

☮ Kaippally കൈപ്പള്ളി ☢ said...

അപ്പോൾ പ്രസക്തമായ ഒരു ചൊദ്യം കൂടി.

കേരളത്തിൽ നിന്നും സ്വതന്ത്രസോഫ്റ്റ്വെയര്‍ മേഖലയിൽ നിന്നും കുത്തക സോഫ്റ്റ്വെയര്‍ മേഖലയിലേക്ക് ചാടിയ ആരും ഇല്ലെ?

IT parkകുകളിൽ കുത്തക software companyകൾ സംഘടിപ്പിക്കുന്ന "മേള" കൾ recruitment drive ആയി അഭിപ്രായപെട്ടാൽ നിഷേധിക്കുമോ?

ഇമ്മാതിരി recruitment മേളകളിൽ ചുറ്റിക്കറങ്ങുന്നവരെ googleളും microsoftഉം ciscoഉം എല്ലാം ചാക്കിട്ട് പിടിച്ചു് കൊണ്ടു പോകുന്നതു വരെ കൊണ്ടു നടക്കാനുള്ളതാണോ സ്വതന്ത്ര സോഫ്റ്റ്വെയർ കുണ്ടാമണ്ടികൾ?

സംശയങ്ങളാണെ, സ്വതന്ത്ര സോഫ്റ്റവയർ പുലികൾ വിശതീകരിച്ചാൽ കൊള്ളാമായിരുന്നു.

Anonymous said...

Your blog keeps getting better and better! Your older articles are not as good as newer ones you have a lot more creativity and originality now keep it up!

ടോട്ടോചാന്‍ (edukeralam) said...

അനോണി, നന്ദി....
എന്തിനാണ് ഒളിച്ചിരിക്കുന്നത്? പുറത്തുവന്നുകൂടേ?