Saturday, September 27, 2008

20% മൈലേജ് കൂടുതല്‍ വേണോ വൈദ്യുതക്ഷേത്രം ഉപയോഗിക്കൂ..

ഇലക്ട്രിക്ക് ഉപകരണം 20% മൈലേജ് കൂട്ടുന്നു

ഇന്ധനത്തെ കാര്യക്ഷമമായി ഉപയോഗിക്കാന്‍ നമുക്ക് എത്ര പേര്‍ക്കറിയാം. എത്ര വാഹനനിര്‍മ്മാതാക്കള്‍ക്കറിയാം? എന്തായാലും വാഹനനിര്‍മ്മാതാക്കള്‍ നിരവധി ആധുനിക രീതികള്‍ മൈലേജ് കൂട്ടാനായി ഉപയോഗിച്ചിട്ടുണ്ട് . ഫിലാഡെല്‍ഫിയായിലെ ടെംപിള്‍ സര്‍വ്വകലാശാലയിലെ ഭൌതികശാസ്ത്രവിഭാഗം പുതിയൊരു സാങ്കേതിക വിദ്യയുമായി രംഗത്ത് വന്നിരിക്കുന്നു. വൈദ്യുതക്ഷേത്രം ഉപയോഗിച്ച് ഇന്ധനകാര്യക്ഷമതയില്‍ 20% വര്‍ദ്ധനവ് വരുത്താന്‍ അവര്‍ക്ക് കഴിഞ്ഞിതായാണ് റിപ്പോറ്‍ട്ട്

വൈദ്യുതചാര്‍ജ്ജുള്ള ഒരു കുഴലാണ് ഉപകരണത്തിന്‍റെ പ്രധാന ഭാഗം. എന്‍ജിനിലേക്ക് ഇന്ധനം ചീറ്റുന്ന കുഴലിനടുത്താണ് ഇത് സ്ഥാപിക്കുക. വാഹനത്തിലെ ബാറ്ററിയില്‍ നിന്നുമുള്ള വൈദ്യുതി ഉപയോഗിച്ച് ഈ കുഴലില്‍ വൈദ്യുതക്ഷേത്രം സൃഷ്ടിക്കുന്നു. ഈ വൈദ്യുതക്ഷേത്രം കടന്നു പോകുന്ന ഇന്ധനത്തിന്‍റെ വിസ്കോസിറ്റിയെ (ശ്യാനത) കുറക്കുമത്രേ. തന്മൂലം വളരെ കുറച്ച് അളവില്‍ മാത്രം ഇന്ധനം ദഹന അറയിലേക്ക് കടത്തിവിടാന്‍ കഴിയും. ഈ വളരെ ചെറിയ ഇന്ധത്തുള്ളികള്‍ പൂര്‍ണ്ണമായും കത്തിത്തീരാനും എളുപ്പമാണ്. നിലവിലുള്ള ഫ്യൂവല്‍ ഇന്‍ജെക്റ്ററുകളേക്കാള്‍ കാര്യക്ഷമത ഇതിനുണ്ടാകും എന്നാണ് ടെംപിള്‍ യൂണിവേഴ്സിറ്റിക്കാരുടെ അവകാശവാദം.

ഡീസല്‍ ഉപയോഗിച്ച് ഓടുന്ന മെഴ്സിഡസ് - ബെന്‍സ് വാഹനത്തില്‍ ആറു മാസക്കാലം അവര്‍ പരീക്ഷണങ്ങള്‍ നടത്തി. ഒരു ഗാലണ്‍ ഇന്ധനത്തിന് 32 മൈല്‍ കിട്ടിയിരുന്നിടത്ത് പുതിയ രീതി ഉപയോഗിച്ചപ്പോള്‍ 38 മൈല്‍ ഓടാന്‍ കഴിഞ്ഞു. എന്തായാലും ടെംപിള്‍ യൂണിവേഴ്സിറ്റി ഈ കണ്ടെത്തലിന് പേറ്റന്‍റ് എടുക്കാനുള്ള ശ്രമത്തിലാണ്.

വൈദ്യുതക്ഷേത്രം ശ്യാനതയെ കുറക്കുന്നതെങ്ങിനെ തുടങ്ങിയ കൂടുതല്‍ വിവരങ്ങള്‍ അവര്‍ പുറത്തുവിട്ടിട്ടില്ല. വൈദ്യുത ക്ഷേത്രവും ശ്യാനതയും തമ്മിലുള്ള ബന്ധത്തെക്കുറിച്ച് പഠനങ്ങള്‍ നടന്നിട്ടുണ്ട്. എന്നാല്‍ ആ കണ്ടെത്തലിനെ ഇത്തരം ഒരു കാര്യത്തിനായി ഉപയോഗിക്കുമ്പോഴാണ് ശാസ്ത്രം അനുയോജ്യമായ സാങ്കേതിക വിദ്യകള്‍ക്ക് ജന്മം നല്കുന്നത്.


വിവരങ്ങള്‍ക്ക കടപ്പാട്
http://www.temple.edu/newsroom/2008_2009/09/stories/taofueldevice.htm

14 comments:

അനില്‍@ബ്ലോഗ് said...

പരീക്ഷണം വിജയം കൈവരിക്കട്ടെ എന്നാശിക്കാം.

പണ്ടു മാഗ്നറ്റുകളും മറ്റും പിടിപ്പിച്ചു നമ്മുടെ നാട്ടിലും കുറേ ബൂസ്റ്ററുകള്‍‍ ഇറങ്ങിയിരുന്നു,അതൊക്കെ ചവറ്റുകൊട്ടയിലായി.

ശിവ said...

കേരളത്തിലെ എഞ്ചിനീയറിംഗ് കോളേജുകള്‍ എല്ലാ വര്‍ഷവും ഇതുപോലെ കുറെ അബദ്ധങ്ങള്‍ എഴുന്നള്ളിച്ച് വരാറുണ്ട്.....

ഇവരൊക്കെ ആദ്യം പെട്രോള്‍ എഞ്ചിനും ഡീസല്‍ എഞ്ചിനും എന്താ എന്ന് ഒന്ന് മനസ്സിലാക്കിയിരുന്നെങ്കില്‍...

ടോട്ടോചാന്‍ (edukeralam) said...

അനില്‍, ശിവ നന്ദി,

ശിവ എന്താണ് ഉദ്ദേശിക്കുന്നത്? മാഗ്നറ്റുകളും മറ്റും പിടിപ്പിച്ച ബൂസ്റ്ററുകള്‍ അബദ്ധമാണെന്നാണോ? അതോ ടെംപിള്‍ യൂണിവേഴ്സിറ്റിക്കാരുടെ അവകാശവാദം പൊള്ളയാണെന്നോ?
അതോ മറ്റു വല്ലതുമാണോ?

വ്യത്കമായില്ല കേട്ടോ, ക്ഷമിക്കണം.

ഞാന്‍ said...

പണ്ട് ബി.ടെക്കിന് ഫ്യൂല്‍ എനെര്‍ജൈസര്‍ എന്നൊരു സെമിനാര്‍ എടുത്തിരുന്നു (ഏഴാം സെമസ്റ്ററില്‍ ഏതെങ്കിലുമൊരു വിഷയത്തില്‍ സെമിനാറെടുക്കണം. തൃശ്ശൂര്‍ എന്‍ജി. കോളേജില്‍ ചെയ്ത ഈ സെമിനാര്‍ എങ്ങനെയോ എനിക്ക് കിട്ടി ... ഞാനത് പോലെ തന്നെ ചെയ്യുകയും ചെയ്തു). എന്നാല്‍ പിന്നീട് മനസ്സിലായി അത് വെറുമൊരു തട്ടിപ്പ് പരിപാടി ആയിരുന്നു എന്ന്. ഇതും അത് പോലെ ആണോ? ഈ fuel & energy ജേണലില്‍ ഒക്കെ പോയി Preston Moretz-നെ തപ്പി നോക്കിയിട്ടൊന്നും പേപ്പര്‍ കിട്ടുന്നില്ല. ഈ temple university എങ്ങനെയാ? വളരെ പ്രശസ്തമാണോ? എനിക്ക് വലിയ പിടിയില്ല... ശ്യാനത കുറയ്ക്കുകയാണെങ്കില്‍ ബാക്കി പറഞ്ഞതെല്ലാം ശരിയാണ്... പക്ഷെ ശ്യാനത കുറയുമോ? ഇനി കുറഞ്ഞാല്‍ തന്നെ overall efficiency-ല്‍ എത്ര കണ്ട് വര്‍ദ്ധനവുണ്ടാകും? ഞാന്‍ Preston Moretz-ന് ഒന്ന് മെയ്‌ല്‍ ചെയ്ത് നോക്കട്ടെ. :) ... നമ്മുക്കും ഗുണമുള്ള കാര്യമാണേ... ;)

ശിവ said...

ലിക്ക്വിഡ്സ് തന്നെ പോളാര്‍ എന്നും നോണ്‍പോളാര്‍ എന്നും രണ്ട് തരം ഉണ്ട്.

ഇതില്‍ പോളാര്‍ ലിക്ക്വിഡ്സിന്റെ വിസ്കോസിറ്റി കുറയ്ക്കാന്‍ ഇലക്ട്രിക് ഫീല്‍ഡിനു കഴിയും. അതിന് കാരനം അയണൈസേഷന്‍ ആണ്.

ഒരു ലിക്ക്വിഡ്സ് അയനൈസ്ഡ് ആകുമ്പോള്‍ അവയിലെ ആനയോണ്‍സും കാറ്റയോന്‍സും വ്യത്യസ്ഥ ദിശയില്‍ അക്കുമുലേറ്റ് ചെയ്യുന്നതിനാല്‍ ആണ് അതിന്റെ വിസ്കോസിറ്റി കുറയുന്നത്.

ഡീസലും പെട്രൊളും നോണ്‍പോളാര്‍ ലിക്ക്വിഡ്സ് ആയിരിക്കെ അതിന്റെ വിസ്കൊസിറ്റി എങ്ങനെയാ കുറയ്ക്കാന്‍ കഴിയുക...അഥവാ അങ്ങനെ കുറച്ചാല്‍ തന്നെ അത് മൈലേജിനെ എങ്ങനെയാ ബാധിക്കുക...ഒന്ന് ആലോചിക്കൂ...അയണൈസേഷന്‍ നടക്കുമ്പോള്‍ തന്നെ ആ ലിക്ക്വിഡിന്റെ സ്വഭാവം തന്നെ മാറിയിരിക്കും...

ഇലക്ട്രിക് ഷോക്ക് ഏല്‍ക്കുന്ന ഒരാള്‍ മരിക്കുന്നതു പോലും ഈ അയനൈസേഷന്‍ കാരണമാ...ബ്ലഡിലെ ഫക്റ്റേഴ്സ് അയണൈസ്ഡ് ആകുകകയും അങ്ങനെ ബ്ലഡിന് അതിന്റെ സ്വഭാവം നഷ്ടപ്പെടുകയും അയാള്‍ മരണപ്പെടുകയും ചെയ്യുന്നു.

അപ്പോള്‍ ഈ ഡീസലും പെട്രോളും അയണൈസ്ഡ് ആകുമ്പോള്‍ പിന്നെ അതിന് എങ്ങനെ ഒരു ഫ്യുവല്‍ ആയി പ്രവര്‍ത്തിക്കാന്‍ കഴിയും.

ഇത് എന്റെ അറിവില്‍ നിന്നും പറയുന്നത്...ഞാനും കുറെക്കാലം ഫിസിക്സ് എന്ന് പറഞ്ഞു നടന്നവനാ...ഈ മണ്ടത്തനമൊക്കെ കാണുമ്പോള്‍ ചിരിയാ വരുന്നത്...

എല്ലാ വര്‍ഷവും കാണുന്നതല്ലേ പത്രത്തിന്റെ മുന്‍‌പേജില്‍ എഞ്ചിനീയറിങ് വിദ്യാര്‍ഥികള്‍ പുതിയ ഉപകരണം കണ്ടുപിടിച്ചു...താമസിയാതെ വിപണിയില്‍ വരും എന്നൊക്കെ...എന്നിട്ട് അതൊന്നും ഇതുവരെ വിപണിയില്‍ വന്നതുമില്ല....

തിയറിറ്റിക്കലി ഇതൊക്കെ പറയാം...

ശിവ said...

ഇനി അറിവുള്ളവര്‍ പറയട്ടെ...എനിക്കും പഠിക്കാമല്ലോ കാര്യങ്ങള്‍...

ബാബുരാജ് said...

താങ്കള്‍ പറഞ്ഞ തത്വത്തില്‍ പ്രവൃത്തിക്കുന്ന, മൈലേജ്‌ കൂടുതല്‍ തരും എന്നവകാശപ്പെട്ട്‌ ചില സാധനങ്ങള്‍ കുറച്ചു നാള്‍ മുന്‍പ്‌ നമ്മുടെ നാട്ടിലും ഇറങ്ങിയിരുന്നു. (അനില്‍ പറഞ്ഞല്ലോ) ഉപകാരമൊന്നുമുണ്ടായില്ല എന്നു മാത്രം. ഫലപ്രദമായാല്‍ നന്നായിരുന്നു

മണി said...

സംഗതി ശരിയാ. ഇതു സംബന്ധമായി ഒരു പേറ്റന്റ് ഫയല്‍ ചെയ്തിട്ടുണ്ട്.കൂടുതല്‍ അറിയാന്‍ നോക്കുക: http://www.wipo.int/pctdb/images4/PATENTSCOPE/86/b5/ec/00b5ec.pdf

വിശദവിവരങ്ങള്‍ക്കായി നമുക്ക് കാത്തിരിക്കാം.

കാട്ടുപൂച്ച said...

നമ്മുടെ പാചകവാതക സിലിണ്ടറിനെയും സ്റ്റവിലെ ബ൪ണറിനെയും ബന്ധിപ്പിക്കുന്ന റബ്ബ൪ പൈപ്പിൽ പിടിപ്പിക്കാ൯ സിലിണ്ട൪ ആകൃതിയിലുള്ള കാന്തം വിപണിയിൽ ഉണ്ടായിരുന്നു. ഇതും അയണൈസേഷ൯ ഉണ്ടാക്കി ഇന്ധന ക്ഷമത 20 ശതമാനം വ൪ദ്ധിപ്പിക്കുമെന്നായിരുന്നു പ്രചാരണം. ഞാനും ഒരെണ്ണം വാങ്ങി കണക്ട് ചെയ്തു. റബ്ബ൪ പൈപ്പിന്റെ കാലാവധി കുറച്ചതായി കണ്ടു [due to corrosion of magnet ].ഇന്ധന ക്ഷമത കൂടിയോ അതോ കുറഞ്ഞോ ?ആ൪ക്കറിയാം!!!

ടോട്ടോചാന്‍ (edukeralam) said...

ഞാന്‍, ശിവ,ബാബുരാജ്,
ഞാനും നിങ്ങളുടെ പക്ഷത്തു തന്നെ, പക്ഷേ സയന്‍സ് ഡെയിലി എന്ന സൈറ്റില്‍ നിന്നുമാണ് എനിക്ക് ഈ ലിങ്ക് കിട്ടിയത്. അവിടെ പോയി നോക്കിയപ്പോള്‍ സംഗതി ശരി തന്നെ. എങ്കിലും സംശയങ്ങള്‍ മാറിയിട്ടില്ല. അതു കൊണ്ടു തന്നെയാണ് അവസാനഭാഗത്ത് കൂടുതല്‍ വിവരങ്ങള്‍ അവര്‍ പുറത്തു വിട്ടിട്ടില്ല എന്നു പറഞ്ഞതും.
വൈദ്യുതക്ഷേത്രത്തില്‍ ശ്യാനത കൂടുന്നതായാണ് ഇന്‍റര്‍നെറ്റില്‍ തപ്പിയപ്പോള്‍ കിട്ടിയത്. എന്നാല്‍ നോണ്‍-പോളാറ്‍ ആയ ദ്രാവകങ്ങള്‍ ആയിരുന്നു പലതും എന്നാണ് അറിഞ്ഞത്. ശിവ പറഞ്ഞ പോലെ തന്നെ ആവാന്‍ സാധ്യതയുണ്ട്.



ശ്യാനത കുറക്കുവാന്‍ ഇതിനെ ഇനി മറ്റു വല്ല രീതിയിലും മാറ്റുന്നുണ്ടോ എന്നും നിശ്ചയമില്ല,

ടെംപിള്‍ യൂണിവേഴ്സിറ്റിയിലേക്ക് അന്നു തന്നെ മെയില്‍ അയച്ചിരുന്നു കൂടുതല്‍ വിവരങ്ങള്‍ തരാമോ എന്നും പറഞ്ഞ്. ഇതുവരെ മറുപടി ഒന്നും കിട്ടിയിട്ടില്ല.

മണി പറഞ്ഞ ലിങ്ക് കിട്ടുന്നില്ല. ഒന്നു കൂടി നോക്കുമല്ലോ,

കാട്ടുപൂച്ച, അത്തരത്തിലുള്ള തട്ടിപ്പുകള്‍ ഒത്തിരി നടക്കുന്നുണ്ട്. ചിലപ്പോള്‍ ഇതും അത്തരത്തിലുള്ള ഒന്നാവാനും മതി. എങ്കിലും
ഇത്തരം ഒരു യൂണിവേഴ്സിറ്റിയില്‍ നിന്ന് കണ്ടതു കൊണ്ടും പേറ്റന്‍റിന് അപേക്ഷിച്ചിട്ടുണ്ട് എന്നൊക്കെ കണ്ടതു കൊണ്ടും ഇതിനെ ഒരു പോസ്റ്റാക്കി എന്നു മാത്രം.
നമുക്ക് കാത്തിരിക്കാം, വിജയിച്ചാല്‍ നല്ലത് ഇല്ലെങ്കില്‍ ജകപൊക....

ടോട്ടോചാന്‍ (edukeralam) said...

Preston M. Moretz ല്‍ നിന്നും മെയില്‍ കിട്ടിയ വിവരം അറിയിക്കുന്നു. Journal article pdf കോപ്പി അയച്ചു തന്നിട്ടുണ്ട്. വിശദവിരങ്ങള്‍ പുറകേ തരാം. കോപ്പി വേണ്ടവര്‍ ഇ മെയില്‍ തരിക.

അനില്‍@ബ്ലോഗ് said...

anilatblog@gmail.com

മണി said...

mdotani@gmail.com

മണി said...

ടോട്ടോചാന്‍ (edukeralam),
ഇപ്പോള്‍ എനിക്കും ആ ലിങ്ക് കിട്ടുന്നില്ല. പക്ഷെ ഞാന്‍ അത് സേവ് ചെയ്തിരുന്നതിന്റെ കോപ്പി അനിലിനയച്ച് കൊടുത്തിട്ടൂണ്ട്.