കാറ്റാടിയന്ത്രം

സ്കൂള്‍ വിട്ടു വന്ന ആയിഷ നേര ഓടിച്ചെന്നത് അടുക്കളയിലേക്കായിരുന്നു. അവിടെ അമ്മയും അച്ഛനും കൂടി വൈകിട്ടത്തേക്കുള്ള ആഹാരമുണ്ടാക്കുന്ന തിരക്കിലാണ്. വികസിച്ച കണ്ണുകളോടെ സന്തോഷത്തോടെ നില്‍ക്കുന്ന അവളെ നോക്കി അച്ഛന്‍ പറഞ്ഞു. "ഉം എന്തോ കോളൊത്തിട്ടുണ്ട്..". "ഇന്ന് ക്ളാസില്‍ ബാബു ഒരൂട്ടം ഉണ്ടാക്കിക്കൊണ്ടു വന്നു. വേഗം വന്നാല്‍ കാണിച്ചു തരാം. ഉടനെ തിരിച്ചവന് കോടുക്കാനുള്ളതാ" അവള്‍ ഒറ്റ ശ്വാസത്തില്‍ പറഞ്ഞു തീര്‍ത്തു. തിരക്കുണ്ടായിരുന്നെങ്കിലും അവളുടെ ആവേശം കണ്ടപ്പോള്‍ അമ്മയും അച്ഛനും ഒപ്പം കൂടി. തന്‍റെ ബാഗ് നിലത്തിട്ട് അവള്‍ അതില്‍ നിന്നും പ്ളാസ്റ്റിക്ക് കുപ്പികൊണ്ടുണ്ടാക്കിയ ഒരു പമ്പരം പുറത്തെടുത്തു. ഇതോടെ അവിടെ കളിച്ചു നടന്നിരുന്ന അനിയനും പതിയെ ചേച്ചിയുടെ സൂത്രം കാണാന്‍ കൂടെ കൂടി. പമ്പരം താഴെ വച്ച് അവള്‍ വീണ്ടും ബാഗിനകത്തേക്ക് കയ്യിട്ടു. പണ്ട് ടേപ്പ് റെക്കോര്‍ഡറുകളില്‍ ഉപയോഗിക്കുന്ന തരത്തിലുള്ള വളരെ ചെറിയ ഒരു മോട്ടറും അതില്‍ പിടിപ്പിച്ചിരിക്കുന്ന ഒരു എല്‍. ഇ.ഡി യുമായിരുന്നു അവള്‍ പുറത്തെടുത്ത അടുത്ത ഇനം.

"അമ്മേ ആ ഫാനൊന്നു ഓണാക്കോ..." പമ്പരവും മോട്ടറും കയ്യിലെടുത്ത് അവള്‍ പറഞ്ഞു. പമ്പരത്തിന്‍റെ മധ്യത്തിലുള്ള ചെറിയ ദ്വാരത്തിലേക്ക് അവള്‍ മോട്ടറിന്‍റെ കറങ്ങുന്ന ഭാഗം ശ്രദ്ധാപൂര്‍വ്വം പിടിപ്പിച്ചു. മോട്ടറില്‍ പിടിച്ച് അവള്‍ പമ്പരം കറങ്ങിത്തുടങ്ങിയ ഫാനിനു നേരേ കാണിച്ചു. പമ്പരം പതിയെ കറങ്ങാന്‍ തുടങ്ങി. "ബള്‍ബിലോട്ട് നോക്കമ്മേ ബള്‍ബിലോട്ട്.." പതിയെ തെളിഞ്ഞു തുടങ്ങിയ എല്‍. ഇ.ഡി യി ലേക്ക് നോക്കിക്കൊണ്ട് അവള്‍ ആവേശത്തോടെ വിളിച്ചു പറഞ്ഞു.
"ഇതു കൊള്ളാല്ലോ നല്ല സൂത്രം" അച്ഛന്‍ പറഞ്ഞു. "പല രാജ്യങ്ങളിലും കറണ്ടുണ്ടാക്കാന്‍ ഇതു പോലത്തെ വലിയ പമ്പരങ്ങള്‍ ഉപയോഗിക്കാറുണ്ടെത്രേ, ടീച്ചര്‍ പറഞ്ഞതാ. ഇതുണ്ടാക്കിയതിന് അവനെ അഭിനന്ദിക്കുകയും ചെയ്തു. നമുക്കും ഒരെണ്ണം ഉണ്ടാക്കി വീട്ടില്‍ പിടിപ്പിച്ചാലോ?" അവള്‍ ചോദിച്ചു. "അതിനിത്ര ചെറുതൊന്നും പോര, പിന്നെ നന്നായി കാറ്റ് കിട്ടണമെങ്കില്‍ നല്ല ഉയരത്തില്‍ പിടിപ്പിക്കുകയും വേണം." അമ്മയുടെ മറുപടി അത്രങ്ങോട്ട് ഇഷ്ടമായില്ലെങ്കിലും അവള്‍ പ്രതീക്ഷ കൈ വിട്ടില്ല. "വലിയ ഒരെണ്ണം സ്കൂളില്‍ പിടിപ്പിക്കാന്‍ ടീച്ചറോട് ഒന്നു പറഞ്ഞു നോക്കണം". "ശരി, ശരി എന്തായാലും ടീച്ചറോട് പറഞ്ഞു നോക്കൂ.." പൊട്ടിച്ചിരിച്ചു കൊണ്ട് അമ്മയും അച്ഛനും മറുപടി പറഞ്ഞു. "ഇതു തിരിച്ച് ബാബുവിനു കൊടുത്തിട്ട് ഞാനിപ്പം വരാം" കാറ്റാടിയന്ത്രം പൊതിഞ്ഞെടുത്ത് അവള്‍ പുറത്തേക്കോടി.
ചേച്ചിയുടെ സൂത്രപ്പണികളെല്ലാം കണ്ട് അന്തം വിട്ടു നിന്ന കുഞ്ഞനിയന്‍ മുകളില്‍ കറങ്ങിക്കൊണ്ടിരിക്കുന്ന ഫാനിലേക്ക് അതു വരെ തോന്നാത്ത ഒരു കൌതുകത്തോടെ നോക്കിനിന്നു.