Thursday, May 29, 2008

ഫീനിക്സിന്‍റെ ശരീരശാസ്ത്രം--- മറ്റ് ഉപകരണങ്ങള്‍

കൈക്കണ്ണ്...Robotic Arm Camera (RAC)

റോബോട്ടിന്‍റെ കൈയ്യില്‍ ഘടിപ്പിച്ചിരിക്കുന്ന ക്യാമറയാണിത്.
ചൊവ്വാ ഉപരിതലത്തിന്‍റെ വര്‍ണ്ണചിത്രങ്ങള്‍ നല്‍കാന്‍ ഈ ക്യാമറ ഉപകരിക്കും.
കുഴിച്ചെടുക്കുന്ന മണ്ണും ജലവും മഞ്ഞിന്‍റെയുമെല്ലാം ചിത്രങ്ങളും ഇതിലൂടെ ലഭിക്കും.

ത്രിമാനക്കണ്ണ്....
SSI(Surface Sterioscopic Imager)

ഫീനിക്സിന്‍റെ കണ്ണായി പ്രവര്‍ത്തിക്കുന്നത് SSI(Surface Sterioscopic Imager) എന്ന ഉപകരണമാണ്. ത്രിമാനചിത്രങ്ങളാണ് ഇതിലൂടെ ലഭിക്കുന്നത്. ചൊവ്വയുടെ ഉപരിതലത്തിന്‍റെ ഉയര്‍ച്ചതാഴ്ച്ചകള്‍ തിരിച്ചറിയാന്‍ ത്രിമാനചിത്രങ്ങള്‍ സഹായിക്കും.
അന്തരീക്ഷത്തിലെ പൊടിയുടെ അള വ് അറിയാനും ഖനന പ്രവര്‍ത്തനങ്ങള്‍ക്ക വേണ്ട വിവരങ്ങള്‍ ശേഖരിക്കാനും ഇതേ ക്യാമറ തന്നെ ഉപയോഗിക്കുന്നു.

ടേഗ.... Thermal and Evolved Gas Analyzer (TEGA)

ഫീനിക്സിന്‍റെ നാക്കും മൂക്കുമെല്ലാം ടേഗ എന്ന ഉപകരണമാണ്. ഉയര്‍ന്ന താപനിലയില്‍ പ്രവര്‍ത്തിക്കുന്ന ഒരു ഓവനും മാസ് സ്പെക്ട്രോമീറ്റര്‍ എന്ന ഉപകരണവും കൂട്ടിയിണക്കിയ ഒന്നാണിത്. ചൊവ്വയിലെ മണ്ണും ജലവും എല്ലാം വിശകലനം നടത്തുന്നത് ടേഗയാണ്. ചെറിയ എട്ട് ഓവനുകളാണ് ഉപയോഗിച്ചിരിക്കുന്നത്. മണ്ണും മഞ്ഞുമെല്ലാം വളരെ ചെറിയ അളവില്‍ ഓവനില്‍ വച്ച് ചൂടാക്കുന്നു. ഇതില്‍ നിന്നും പുറത്തുവരുന്ന വാതകങ്ങള്‍ മാസ് സ്പെക്ട്രോമീറ്ററ്‍ ഉപയോഗിച്ച് പരിശോധിക്കുന്നു. മണ്ണിന്‍റെയും മഞ്ഞിന്‍റെയും രാസഘടനയെക്കുറിച്ചുള്ള വിലപ്പെട്ട വിവരങ്ങളാണ് ഇതില്‍ നിന്നും ലഭിക്കുക.

മെക്ക... Microscopy, Electrochemistry, and Conductivity Analyzer(MECA)

മറ്റൊരു പരീക്ഷണനിലയമാണിത്. ഒരു രാസ പരീക്ഷണശാല,വിവിധ തരം സൂഷ്മദര്‍ശിനികള്‍,താപ വൈദ്യുത ചാലകത അളക്കാനുള്ള ഉപകരണങ്ങള്‍ തുടങ്ങിയവയാണ് പരീക്ഷണ നിലയത്തിലെ ഉപകരണങ്ങള്‍. ചൊവ്വയിലെ മണ്ണിനെ അല്പം ജലവുമായി കൂട്ടിക്കലര്‍ത്തി അതിന്‍റെ അമ്ളത്വം,ക്ഷാരത്വം,ഘടന തുടങ്ങിയവയെക്കുറിച്ച് പഠിക്കാന്‍ മെക്കക്ക് കഴിയും.സൂഷ്മദര്‍ശിനിയിലൂടെയുള്ള പഠനങ്ങളിലൂടെ അതിന്‍റെ ഉത്ഭവത്തെക്കുറിച്ചും പദാര്‍ത്ഥഘടനയെക്കുറിച്ചും നമുക്ക് അറിവ് ലഭിക്കും.

മാര്‍ഡി...Mars Descent Imager (MARDI)

പേടകത്തിന്‍റെ താഴോട്ടുള്ള ഇറക്കത്തില്‍ പ്രധാന പങ്കുവഹിച്ച ഒരു ഉപകരണമാണിത്.
ചൊവ്വയില്‍ എത്തിച്ചേരുന്നതിന് 5മൈല്‍ ഉയരത്തില്‍ വച്ച് മാര്‍ഡി പ്രവര്‍ത്തനം ആരംഭിച്ചു. ഇറങ്ങുന്ന സ്ഥലത്തിന്‍റെ നിരവധി ചിത്രങ്ങള്‍ മാര്‍ഡി ഈ സമയത്ത് എടുക്കുകയുണ്ടായി.അവസാന നിമിഷം ഇറങ്ങേണ്ട സ്ഥലത്തിന് എന്തെങ്കിലും മാറ്റം വരുത്തേണ്ടതുണ്ടെങ്കില്‍ ഈ ചിത്രങ്ങള്‍ ഫീനിക്സിനെ സഹായിക്കും


കാലാവസ്ഥാ കേന്ദ്രം Meteorological Station (MET)

ഫീനിക്സിന്‍റെ കാലാവസ്ഥാ നിരീക്ഷണ നിലയമാണിത്. എല്ലാ സമയത്തേയും കാലാവസ്ഥ ഇതിന്‍റെ നിരീക്ഷണത്തിലായിരിക്കും. താപനില, മര്‍ദ്ദം എന്നിവ അളക്കാനുള്ള ഉപകരണങ്ങള്‍ക്കു പുറമേ Light Detection and Ranging (LIDAR) instrument ഉം പൂര്‍ണ്ണമായ വിവരങ്ങള്‍ ശേഖരിക്കാന്‍ MET നെ സഹായിക്കുന്നു.

2 comments:

Joker said...

നന്ദി , ഉപകാരപ്രദമായ പോസ്റ്റ്

edukeralam said...

ഫീനിക്സിനെക്കുറിച്ച് എഴുതിയ പോസ്റ്റുകള്‍ എല്ലാം കൂട്ടിച്ചേര്‍ത്ത് വിക്കിപീഡിയയില്‍ ലേഖനം ഞാന്‍ ആരംഭിച്ചിട്ടുണ്ട്. കൂടുതല്‍ വിവരങ്ങള്‍ ഉള്‍പ്പെടുത്തി സഹായിക്കുമല്ലോ...